Ինչպես տարբերել ստամոքսի քաղցկեղի ախտանշանները գաստրիտի և ստամոքսի խոցի ախտանշաններից

Ստամոքսի քաղցկեղը հաճախ դրսևորվում է ախտանշաններով, որոնք հիշեցնում են խոցային հիվանդության կամ գաստրիտի ախտանշաններ, սակայն բժիշկները նշում են, որ կան որոշ տարբերություններ, որոնք կօգնեն տարբերել այդ հիվանդությունները միմյանցից:

Մասնագետների խոսքով՝ ստամոքսի քաղցկեղի զարգացման վաղ փուլերում վառ ու ակնհայտ ախտանշաններ կարող են և չլինել: Հարկավոր է հաշվի առնել, որ ստամոքսի քաղցկեղի զարգացման հավանականությունն առավել բարձր է լինում 55 տարեկանից բարձր տղամարդկանց, ինչպես նաև մեծ քանակությամբ աղի, թթու և ապխտած մթերք օգտագործող մարդկանց մոտ: Ավելին՝ ստամոքսի վիրահատությունները նույնպես բարձրացնում են այս հիվանդության զարգացման հավանականությունը, ուստի նման դեպքերում հարկավոր է շատ ավելի զգոն լինել:

Ինչպես նշում են փորձագետները, օնկոլոգիական հիվանդության զարգացման մասին կարող են հուշել մի շարք ախտանշաններ, որոնք կարող են անգամ բավական անվնաս թվալ: Ստամոքսի քաղցկեղի մասին, մասնավորապես, կարող են վկայել հաճախակի դարձած այնպիսի խնդիրները, ինչպիսին են փորափքանքը սնվելուց հետո, որովայնի ցավերը, այրոցը, սրտխառնոցն ու փսխումը, ախորժակի կորուստը, փորլուծությունը, փորկապությունը, թուլությունն ու գերհոգնածությունը, սնունդը դժվարությամբ կուլ տալը, արյունոտ զանգվածի փսխումը կամ կղանքի մեջ արյան հետքերի առկայությունը: Նման դեպքերում հարկավոր է անհապաղ դիմել մասնագետին, ներկայացնել բոլոր ախտանշաններն ու բուժզննում անցնել:

Շատ հաճախ վերոնշյալ ախտանշանները մարդիկ վերագրում են ստամոքսի խոցային հիվանդությանը կամ գաստրիտին, ինչի հետևանքով խնդիրը շարունակում է խորանալ և բարեհաջող բուժման հավանականությունը նվազում է: Նման խնդիրներից խուսափելու համար հարկավոր է հիշել, որ ստամոքսի խոցային հիվանդությունն իսկապես կարող է դրսևորվել նմանատիպ ախտանշաններով, սակայն դրանք կտարբերվեն իրենց ինտենսիվությամբ ու հաճախականությամբ: Այս դեպքում ախտանշանները կանհանգստացնեն շատ ավելի հազվադեպ և չեն լինի այդքան վառ արտահայտված:

Ինչ վերաբերում է գատրիտին, ապա այս դեպքում ախտանշանները տարբերվում են քաղցկեղի և խոցային հիվանդության ախտանշաններից: Այս խանգարման մասին կարող են հուշել այնպիսի տհաճ փոփոխությունները, ինչպիսին են հաճախակի գխտոցը և որովայնի վերին ձախ հատվածի ցավն ու տհաճ զգացողությունները:

Նյութի աղբյուրը՝ medikforum.ru