6 ախտանշան, որոնք կարող են հուշել անպտղության մասին

Հղիանալու հետ կապված խնդիրներին բախվում են բազմաթիվ զույգեր և շատ հաճախ խնդիրը պայմանավորված է լինում կնոջ մոտ առկա խանգարումներով: Սակայն, ցավոք, ոչ բոլորն են ուշադրություն դարձնում օրգանիզմի տված ազդանշաններին, մինչդեռ ավելի զգոն լինելու դեպքում մարդը կարող է շատ ավելի շուտ նկատել անպտղության ախտանշանները:

Ձեր ուշադրությանն ենք ներկայացնում դրանցից մի քանիսը, որոնք կօգնեն ժամանակին հայտնաբերել խնդիրն ու հնարավորինս շուտ միջոցներ ձեռնարկել:

Դաշտանային ցիկլի խանգարումներ

Անկանոն դաշտանային ցիկլը կարող է դառնալ անպտղության զարգացման պատճառ, մինչդեռ մարդիկ հաճախ անտեսում են այս խնդիրը: Այս ախտանշանի միջոցով օրգանիզմը փորձում է հուշել վերարտադրողական համակարգի հետ կապված որոշ խնդիրների առկայության մասին: Սա է պատճառը, որ հղիանալ ցանկացող կանայք պետք է առաջին հերթին ուշադրություն դարձնեն դաշտանային ցիկլին: Հարկ է հիշել, որ չափազանց հաճախակի կամ չափազանց հազվադեպ դաշտանը կարող է հուշել պտղաբերության հետ կապված խնդիրների մասին: Բացի այդ, այս դեպքում ակնհայտ ախտանշանների շարքին կարող են դասվել նաև հեշտոցային արտադրությունը, որն ունենում է տհաճ շագանակագույն երանգ, ինչպես նաև կարճատև արյունահոսությունները դաշտանների միջև:

Կոնքի ցավ սեռական ակտի կամ դեֆեկացիայի ժամանակ

Սեռական ակտի կամ դեֆեկացիայի ժամանակ անհանգստացնող կոնքի քրոնիկ ցավը կարող է պայմանավորված լինել էնդոմետրիոզով՝ հիվանդությամբ, որը հաճախ հանդիպում է վերարտադրողական տարիքի կանանց մոտ և ուղեկցվում ցավոտ դաշտանով ու առատ արյունահոսությամբ: Էնդոմետրիոզը դրսևորվում է արգանդի խոռոչի լորձաթաղանթի բջիջների գերաճով, որոնք տարածվում են անգամ արգանդից դուրս: Այս հիվանդությունը կարող է լինել անպտղության մասին հուշող ախտանշան, որը ոչ մի դեպքում չի կարելի անուշադրության մատնել:

Կոշտ մազեր մարմնի արտասովոր հատվածներում

Վերին շուրթի հատվածում, պարանոցին, կզակին, որովայնին և մարմնի այլ արտասովոր հատվածներում ի հայտ եկած կոշտ մազերը կարող են վկայել ձվարանների պոլիկիստոզ համախտանիշի մասին, իսկ այս տհաճ խնդիրը կարող է անպտղության մասին հուշող ախտանշան լինել: Սա է պատճառը, որ նման անցանկալի մազերի առկայության դեպքում հարկավոր է անպայման խորհրդակցել նաև գինեկոլոգի հետ:

Պտուկներից սպիտակավուն արտադրություն

Եթե կինը հղի չէ կամ չի կերակրում երեխային, ապա պտուկներից սպիտակավուն արտադրությունը կարող է շատ լուրջ ախտանշան լինել, որն առավել հաճախ կապված է լինում պրոլակտինի՝ մայրական կաթի արտազատման համար պատասխանատու հորմոնի հետ: Սովորաբար սա համարվում է անվնաս ախտանշան, մինչդեռ իրականում այն կարող է վկայել անպտղության մասին: Բանն այն է, որ նման արտադրությունը կարող է պայմանավորված լինել նաև վահանագեղձի հետ կապված խնդիրներով կամ բարորակ ուռուցքի առկայությամբ, ուստի նման արտասովոր արտադրության դեպքում հարկավոր է խորհրդակցել ներզատաբանի հետ:

Ջերմահորդանքներ

Ջերմահորդանքները, որոնց ժամանակ կանանց մոտ պարբերաբար նկատվում է ջերմության զգացողություն, կարող են լինել նախադաշտանադադարի կամ դաշտանադադարի մասին հուշող ախտանշան: Սովորաբար կանանց մոտ այս շրջանն սկսվում է մոտ 50 տարեկանում, սակայն լինում են դեպքեր, երբ այն շատ ավելի շուտ է սկսվում, ինչը շատ հաճախ ժառանգաբար փոխանցվող առանձնահատկություն է: Սովորաբար վաղ դաշտանադադարը վկայում է վերարտադրողական համակարգի հետ կապված խնդիրների մասին, որոնցից մեկը կարող է լինել անպտղությունը, ուստի հարկավոր է շատ զգոն լինել ու ժամանակին դիմել մասնագետին:

Ախտանշանների բացակայություն

Անպտղության մասին վկայող ամենաարտասովոր ու վտանգավոր ախտանշաններից կարող է լինել առհասարակ որևէ ախտանշանի բացակայությունը: Ակնհայտ ախտանշանների բացակայությունը կարող է շատ ավելի լուրջ խնդիր լինել, քան շատերն են ենթադրում, քանի որ նման դեպքերում մարդիկ դիմում են մասնագետին չափազանց ուշ:

Նյութի աղբյուրը՝ medikforum.ru