7 խորհուրդ սրտաբանից, որոնք կօգնեն խուսափել սրտանոթային հիվանդություններից

13:32 • 02.10.19

Սրտի հիվանդությունները համարվում են մարդկանց մահացության հիմնական պատճառը, ուստի դրանցից պաշտպանվելը շատ կարևոր է յուրաքանչյուրի համար: Գերմանացի բժիշկ Հելմուտ Գոլկեն, սակայն, պնդում է, որ կենսակերպում արված որոշ պարզ փոփոխությունները կօգնեն հեշտությամբ խուսափել սրտանոթային հիվանդությունների զարգացումից:

Հրաժարվել ծխախոտից

Սրտաբանի խոսքով՝ ծխախոտի գործածությունը սրտանոթային հիվանդությունների զարգացմանը նպաստող հիմնական գործոնն է: Արյան թանձրացման հավանականությունը բարձրանում է անգամ ընդամենը մեկ գլանակի գործածությունից հետո: Ընդ որում՝ այդ ազդեցությունը պահպանվում է 4-6 ժամ: Արդյունքում արյան մակարդուկները կարող են խցանել անոթները՝ բարձրացնելով սրտամկանի ինֆարկտի և գլխուղեղի կաթվածի զարգացման հավանականությունը:

Խուսափել վնասակար ճարպերից

Ճիշտ սննդակարգը թույլ է տալիս զգալիորեն նվազեցնել սրտանոթային հիվանդությունների զարգացման հավանականությունը, ուստի մասնագետները խորհուրդ են տալիս սահմանափակել վերամշակված մսամթերքի ու կենդանական ճարպերի գործածությունը: Հարկ է հիշել, որ ճարպերով հարուստ մթերքը պետք է կազմի մարդու սննդակարգի առավելագույնը 30%-ը: Ընդ որում՝ հարկավոր է օգտագործել օգտակար ճարպեր, որոնք չեն նպաստի վատ խոլեստերինի մակարդակի բարձրացմանը:

Օգտագործել մանրաթելեր

Մանրաթելերը ոչ միայն բարելավում են մարսողությունը, այլև դանդաղեցնում են «արագ» ածխաջրերի յուրացումը, ինչը թույլ է տալիս խուսափել արյան մեջ շաքարի ու ինսուլինի մակարդակների բարձրացումից: Այս կերպ մանրաթելերը պաշտպանում են շաքարային դիաբետից, որն էլ իր հերթին համարվում է սրտանոթային հիվանդությունների զարգացմանը նպաստող գործոն:

Ավելի շատ վիտամիններ օգտագործել

Ազատ ռադիկալները վնասում են օրգանիզմի բջիջներն ու նպաստում անոթներում վտանգավոր վահանիկներիառաջացմանը, սակայն մրգերում և բանջարեղենում պարունակվող վիտամիններն ու հակաօքսիդանտային ազդեցությամբ օժտված այլ օրգանական նյութերը կանխում են այդ վնասակար գործընթացը:

Նվազեցնել օգտագործվող աղի քանակությունը

Աղի մթերքը խիստ վնասակար է սրտանոթային համակարգի համար: Բանն այն է, որ աղը նպաստում է զարկերակային ճնշման բարձրացմանը, օրգանիզմում հեղուկի կուտակմանն ու անոթների նեղացմանը, ինչը կարող է լուրջ խնդիրներ առաջացնել:

Լինել ֆիզիկապես ակտիվ

Մասնագետն ընդգծում է, որ ընդամենը 1.5 ժամ արագ քայլքն արդեն իսկ նվազեցնում է սրտանոթային հիվանդությունների զարգացման հավանականությունը15%-ով, իսկ շաբաթական 4-5 անգամ 30-40 րոպե մարզվելը կօգնի նվազեցնել այդ հավանականությունն արդեն 40%-ով: Պարբերաբար մարզվելը կօգնի ամրապնդել ոչ միայն սրտամկանը, այլև անոթների ներքին թաղանթը, ինչն ամրապնդում է անոթներն ու պաշտպանում վնասվածքներից: Բացի այդ, ֆիզիկական ակտիվությունն արդյունավետ կերպով նվազեցնում է սթրեսի մակարդակը, իսկ սթրեսը սրտանոթային հիվանդությունների զարգացմանը նպաստող հիմնական գործոններից է:

Վերահսկողության տակ պահել զարկերակային ճնշումը

Զարկերակային բարձր ճնշումը համարվում է սրտանոթային հիվանդությունների զարգացմանը նպաստող հիմնական գործոններից մեկը, ուստի այն վերահսկողության տակ պահելը շատ կարևոր է խնդրի ախտորոշման ու բուժման համար: Մասնագետն ընդգծում է, որ 40 տարեկանից հետո մարդը պետք է պարբերաբար ստուգի զարկերակային ճնշումը, ինչը թույլ կտա ժամանակին հայտնաբերել խնդիրն ու միջոցներ ձեռնարկել:

Նյութի աղբյուրը՝ medikforum.ru