Բժիշկը ներկայացրել է քաղցկեղի մասին հուշող ամենավաղ ախտանշանները

17:25 • 07.10.19

Բժիշկ ու հեռուստահաղորդավար Ալեքսանդր Մյասնիկովի խոսքով՝ օնկոլոգիական հիվանդություններին բնորոշ ախտանշանների ի հայտ գալը խոսում է այն մասին, որ քաղցկեղի զարգացման սկզբնական փուլն աննկատ է մնացել, ուստի նշանակված բուժումը կարող է անարդյունավետ լինել: Մասնագետն ընդգծում է, որ քաղցկեղն անհրաժեշտ է փնտրել՝ չսպասելով դրա ախտանշանների ի հայտ գալուն, քանի որ մասնագետի միջամտությունն այս փուլում կարող է բոլորովի այլ արդյունք տալ:

«Դուք վախենում եք քաղցկեղից, սակայն չեք փնտրում այն», - ընդգծել է բժիշկ Մյասնիկովը՝ նշելով, որ քաղցկեղը կարող է դրսևորվել ախտանշաններով, որոնք ի հայտ են գալիս մարդու մարմնին: Մասնագետի խոսքով՝ օնկոլոգիական հիվանդության զարգացման մասին կարող են հուշել այնպիսի ախտանշանները, ինչպիսին են.

մաշկի որևէ հատվածի դեֆորմացիան, հանգույցներն ու անհարթությունները,
աղիների աշխատանքի փոփոխությունները,
մեզի կամ կղանքի մեջ արյան հետքերի առկայությունը,
արտասովոր հազը,
ձայնի խռպոտությունն ու այլ փոփոխությունները,
նոր խալերի առաջացումն ու հների ձևի կամ չափի փոփոխությունը,
չապաքինվող վերքերի կամ այլ վնասվածքների առկայությունը,
անբացատրելի քորը,
իխթիոզը (մաշկային հիվանդություն, որը անվանում են նաև «ձկան խրթեշ»)
կրծքի տակ ու թևատակերի հատվածում մաշկի չորությունը:

Մյասնիկովի խոսքով՝ գոյություն ունեն գործոններ, որոնք բարձրացնում են Օնկոլոգիական հիվանդության զարգացման հավանականությունը: Նման գործոնների շարքին են դասվում ծխախոտի գործածությունը, յուղոտ մթերքի չարաշահումը, նստակյաց կենսակերպը, ալկոհոլի չարաշահումը, ուլտրամանուշակագույն ճառագայթների ազդեցությունը, քրոնիկ հիվանդությունների առկայությունը և այլն: Այս գործոնների առկայության դեպքում վերոնշյալ ախտանշանների ի հայտ գալը բավական վտանգավոր նախանշան է, ուստի հարկավոր է շատ զգոն լինել ու ցանկացած կասկածելի ախտանշանի դեպքում դիմել մասնագետին ու բուժզննում անցնել:

Նյութի աղբյուրը՝ medikforum.ru