5 սխալ, որոնք մարդիկ գործում են գրիպի ու մրսածության բուժման ժամանակ

14:02 • 11.10.19

Սուր վարակիչ շնչառական հիվանդությունները բավական տարածված են տարվա ցուրտ եղանակներին և ախտորոշվում են գրեթե յուրաքանչյուր երկրորդի մոտ: Այս հիվանդությունները կարող են բավական տհաճ ախտանշաններ առաջացնել, սակայն մարդիկ, որպես կանոն, նախընտրում են բուժվել ինքնուրույն և չդիմել մասնագետին, ինչի հետևանքով հաճախ բավական լուրջ սխալներ են գործում:

Բժիշկները նշել են այն սխալները, որոնք մարդիկ թույլ են տալիս տան պայմաններում գրիպն ու մրսածությունը բուժելու ընթացքում:

Ջերմիջեցում

Հաճախ մարդիկ ջերմիջեցնող դեղամիջոցներ են ընդունում կամ փորձում են որևէ այլ միջոցով նվազեցնել ջերմությունը, երբ մարմնի ջերմաստիճանի ցուցանիշը դեռ չի հասել 38,5˚C-ին, սակայն այս դեպքում բժիշկները խորհուրդ չեն տալիս իջեցնել ջերմությունը: Բանն այն է, որ մարմնի ջերմաստիճանի բարձրացումը վկայում է, որ իմունային համակարգը պայքարում է վիրուսի դեմ, ուստի այդ պահին ջերմիջեցնող դեղամիջոցի ընդունումն էլ ավելի կթուլացնի իմունային համակարգը և այն կդադարի պայքարել:

Հակաբիոտիկների ընդունում

Սուր վարակիչ շնչառական հիվանդությունների բուժումը հակաբիոտիկներով կարող է շատ վտանգավոր լինել, մինչդեռ մարդիկ հաճախ են հակաբիոտիկներ ընդունում այս հիվանդությունների դեպքում: Մասնագետները նախազգուշացնում են, որ հակաբիոտիկները նախատեսված չեն վիրուսային հիվանդությունների բուժման համար, իսկ դրանց ընդունումն առանց բժշկի նշանակման կարող է վտանգավոր լինել առողջության ու կյանքի համար, ուստի ինքնաբուժությամբ զբաղվելու փոխարեն հարկավոր է դիմել մասնագետին:

Առոջական վիճակի անտեսում

Շատ հաճախ մարդիկ պատշաճ ուշադրություն չեն դարձնում իրենց առողջությանը, մինչդեռ իմունային համակարգը հարկավոր է ամրապնդել ինչպես վարակվելուց առաջ, այնպես էլ վարակվելուց հետո, իսկ հիվանդության ախտանշանների ի հայտ գալու դեպքում անմիջապես դիմել բժշկին:

Անկողնային ռեժիմ

Գրիպի ու մրսածության դեպքում շատերը փակվում են տանն ու անցնում անկողնային ռեժիմի, սակայն մասնագետները նշում են, որ հիվանդին անհրաժեշտ է մաքուր օդ, հարմարավետ հագուստ ու մաքուր անկողին: Հարկ է հիշել, որ պատուհանները փակելը և մի քանի ծածկոցով ծածկվելն անիմաստ է, քանի որ նման միջոցների ձեռնարկումը չի օգնի ազատվել վիրուսից:

Հիվանդությունը «ոտքի վրա» անցկացնել

Առավոտյան մի քանի դեղահաբ ընդունելն ու ինքնազգացողությունը մի փոքր բարելավելը դեռ չի նշանակում, որ մարդը կարող է աշխատանքի գնալ: Առաջին հերթին հարկ է հիշել, որ օրգանիզմին հանգիստ ու էներգիա է հարկավոր վիրուսի դեմ պայքարելու համար: Բացի այդ, պետք չէ մոռանալ, որ այս հիվանդությունները վարակիչ են, ուստի աշխատանքի գնալու դեպքում մարդը կարող է վարակել նաև մյուսներին:

Նյութի աղբյուրը՝ med2.ru