Տարածված «միֆեր» գաստրիտի մասին, որոնց մարդիկ դեռ շարունակում են հավատալ

Գաստրիտը կամ ստամոքսաբորբը ստամոքսի ամենատարածված հիվանդություններից է, սակայն այնուամենայնիվ մինչ օրս կան այս հիվանդության մասին մի շարք «միֆեր», որոնց մարդիկ շարունակում են հավատալ: Բժիշկ-գաստրոէնտերոլոգ Ալեքսեյ Պարամոնովը ներկայացրել է դրանցից ամենատարածվածները:

Գաստրիտն առաջանում է վնասակար մթերքի հետևանքով

Փորձագետի խոսքով՝ սա գաստրիտի մասին ամենատարածված «միֆերից» մեկն է, մինչդեռ իրականում սննդակարգն այս հիվանդության զարգացման հարցում էական նշանակություն չունի: Ինչպես նշում է մասնագետը՝ գաստրիտի զարգացման գլխավոր գործոններն են օրգանիզմում Helicobacter pylori բակտերիայի ակտիվացումն ու ծխախոտի գործածությունը: Բացի այդ, այս հիվանդության զարգացման հավանականության վրա կարող է ազդել նաև ժառանգական նախատրամադրվածությունը:

Գաստրիտը դրսևորվում է ստամոքսի ցավով, այոցով ու սրտխառնոցով

Մյուս տարածված «միֆը» գաստրիտի ախտանշանների մասին պնդումն է, սակայն Ալեքսեյ Պարամոնովն ընդգծում է, որ ստամոքսի հետ կապված տհաճ ախտանշանները բնորոշ են այլ հիվանդություններին (ֆունկցիոնալ դիսպեպսիա, գաստրոէզոֆագեալ ռեֆլյուքս հիվանդություն և այլն), մինչդեռ գաստրիտը սովորաբար որևէ կերպ չի դրսևորվում: Հարկ է հիշել, որ այս հիվանդությունը հնարավոր չէ հայտնաբերել արտաքին ախտանշանների օգնությամբ, իսկ այն ախտորոշելու համար հարկավոր կլինի գաստրոսկոպիկ հետազոտության ժամանակ ստամոքսի պատերից վերցված հյուսածքների անալիզ անել:

Գաստրիտի ժամանակ հարկավոր է խիստ սննդակարգի հետևել

Մասնագետը համաձայն չէ նաև այս պնդման հետ, քանի որ սննդակարգը որևէ նշանակություն չունի գաստրիտի բուժման հարցում: Պարամոնովի խոսքով՝ գիտնականները չեն գտել որևէ փաստ, որը կապացուցի, որ գաստրիտի դեպքում այս կան այն սննդակարգը կարող է բուժիչ ազդեցություն ունենալ:

Գաստրիտի զարգացման պատճառ կարող է դառնալ դեղորայքի ընդունումը

Ինչպես բացատրում է բժիշկը, այս «միֆի» տարածման պատճառ է դարձել այն, որ ասպիրինն ու ոչ ստերոիդային հակաբորբոքային այլ դեղամիջոցները (ցավազրկողներ ու ջերմիջեցնող դեղամիջոցներ) կարող են դառնալ ստամոքսի լորձաթաղանթի վնասման պատճառ: Նման վնասվածքները մարդիկ հաճախ են շփոթում գաստրիտի հետ, մինչդեռ իրականում դրանք որևէ կապ չունեն միմյանց հետ:Մասնագետը նախազգուշացնում է, որ ոչ մի դեպքում չի կարելի ընդունել նմանատիպ դեղամիջոցներ պարզապես կանխարգելիչ նպատակներով կամ արյունը ջրիկացնելու համար, քանի որ դրանք կարող են վտանգավոր լինել: Օրինակ՝ ասպիրինի ընդունումը գլխուղեղի կաթվածի ցածր հավանականության դեպքում ավելի շատ վնասակար է, քան օգտակար, քանի որ բարձրացնում է ստամոքսի խոցերի և արյունահոսությունների զարգացման հավանականությունը:

Ինչ վերաբերում է ցավազրկող ու ջերմիջեցնող դեղամիջոցներին, ապա նման դեպքերում մասնագետը խորհուրդ է տալիս ընդունել պարացետամոլի հիման վրա ստեղծված դեղեր, քանի որ դրանք համարվում են ստամոքսի համար համեմատաբար անվնաս դեղամիջոցները:

Նյութի աղբյուրը՝ med2.ru