Որոնք են կոկորդի ցավի ու չորության հիմնական պատճառներն ու լավագույն բնական միջոցները խնդրից ազատվելու համար

Կոկորդի ցավն ու չորությունը կարող է բավական տհաճ խնդիր դառնալ յուրաքանչյուրի համար և խիստ բացասաբար անդրադառնալ կյանքի որակի վրա: Սա շատ տարածված խնդիր է, սակայն ճիշտ մոտեցման դեպքում կարելի է հեշտությամբ բուժել կոկորդն ու խուսափել հետագայում խնդրի կրկնությունից:

Առաջին հերթին հարկ է հիշել, որ հիվանդությունների կանխարգելման լավագույն միջոցը ճիշտ խնամքն է, ուստի անհրաժեշտ է հիշել կոկորդի լորձաթաղանթի խոնավեցման ու անհրաժեշտ ջերմաստիճանի պահպանման մասին: Բացի այդ, շատ կարևոր է նաև ձայնալարերի առողջության պահպանումը, քանի որ շատ հաճախ ցավի ու չորության պատճառ է դառնում ձայնալարերի գերծանրաբեռնվածությունը (օրինակ՝ բարձր բղավոցները, երկարատև ելույթները, շատ խոսելը և այլն):

Սակայն ձայնալարերի ծանրաբեռնվածությունն այս խնդրի զարգացման միակ պատճառը չէ: Հարկ է հիշել, որ չորության պատճառ կարող են դառնալ նաև շոգ եղանակը, խոնավության պակասը, վարակներն ու կոկորդի այնպիսի բորբոքային հիվանդությունները, ինչպիսին է ֆարինգիտը կամ ըմպանաբորբը: Սա է պատճառը, որ մինչ ինքնուրույն խնդիրը բուժելը նախ հարկավոր է խորհրդակցել մասնագետի հետ և պարզել դրա պատճառը:

Կոկորդի ցավից ու տհաճ չորությունից ազատվելու համար մարդիկ սովորաբար հատուկ դեղամիջոցներ ու օշարակներ են ընդունում, մինչդեռ բնությունը մարդկությանը տվել է անհրաժեշտ բոլոր բաղադրիչներն առողջական խնդիրներից խուսափելու համար: Այս խնդիրներից ազատվելու համար կան շատ արդյունավետ բնական միջոցներ, որոնք քչերին են հայտնի: Ընդ որում՝ ի տարբերություն դեղատնային միջոցների այս ժողովրդական միջոցները չեն առաջացնում կողմնակի բարդություններ և շատ ավելի հասանելի են:

Ձեր ուշադրությանն ենք ներկայացնում դրանցից մի քանիսը, որոնք կօգնեն կարճ ժամանակահատվածում ազատվել տհաճ զգացողություններից:

Կիտրոնով ու մեղրով գոլ ջուր

Սա կոկորդի ցավի ու չորության դեմ պայքարի ամենապարզ ու արդյունավետ միջոցներից մեկն է: Այն պատրաստելու համար հարկավոր է գոլ ջրին ավելացնել մի քանի կաթիլ կիտրոնի հյութ ու մի փոքր մեղր, այնուհետև լավ խառնել մինչև մեղրը լուծվի: Ստացված ըմպելիքը հարկավոր է խմել գոլ վիճակում փոքր կումերով. այդ կերպ այն արդյունավետ կերպով կխոնավեցնի կոկորդն ու կմեղմի տհաճ զգացողությունները:

Նվենու (էվկալիպտ) թուրմ

Նվենին կոկորդի հիվանդությունների դեմ պայքարի ամենաարդյունավետ միջոցներից մեկն է: Ընդ որում՝ այն շատ օգտակար է կոկորդի ցանկացած հիվանդության դեպքում: Այս բույսը ոչ միայն մեղմում է ցավը, այլև նվազեցնում է բորբոքումների մակարդակն ու ազատում է չորությունից:

Թուրմը պատրաստելու համար հարկավոր է նվենու հինգ տերևին ավելացնել մի բաժակ տաք ջուր, թրմել և մի փոքր սառչելուն պես խմել ըմպելիքը փոքր կումերով:

Խնկածաղկի և ակնամոմի թուրմ

Խնկածաղկով և ակնամոմով պատրաստված այս միջոցը լավագույններից մեկն է կոկորդի չորության դեմ պայքարի համար, ուստի մարդիկ այն հաճախ են կիրառում երկարատև ելույթներից հետո կոկորդի տհաճ չորությունից ազատվելու համար:

Դեղամիջոցը պատրաստելու համար հարկավոր է մի բաժակ ջուրը եռացնել, ավելացնել ջրին մի ճյուղ խնկածաղիկ, այնուհետև քամել թուրմն ու ավելացնել նաև ակնամոմը: Դեղամիջոցը հարկավոր է խմել օրվա ընթացքում փոքր կումերով: Այս թուրմն անհրաժեշտ է հնարավորինս դանդաղ կուլ տալ, որպեսզի այն առավելագույնս խոնավեցնի կոկորդի լորձաթաղանթը:

Սխտոր

Սխտորը շատ առողջարար մթերք է և օգնում է ազատվել տարատեսակ հիվանդություններից, սակայն մարդիկ հաճախ են խուսափում սխտորով ուտեստներից, քանի որ այն կարող է դառնալ բավական տհաճ հոտի պատճառ, որը երբեմն շատ երկար է պահպանվում: Այնուամենայնիվ սա կոկորդի ցավի ու չորության դեմ պայքարի լավագույն միջոցներից մեկն է, ուստի մասնագետները խերհուրդ են տալիս ամեն առավոտ դատարկ ստամոքսին մի պճեղ սխտոր ուտել և մի բաժակ ջուր խմել:

Այս մթերքն օժտված է հակաբիոտիկային ազդեցությամբ և շատ օգտակար է ամբողջ օրգանիզմի համար, ուստի մասնագետները հորդորում են այն անպայման ներառել ամենօրյա սննդակարգում:

Աղաջրով ողողումներ

Այս պարզ ու հասանելի լուծույթով ողողումները հիանալի միջոց են կոկորդը մաքրելու և վարակազերծելու համար, սակայն հարկ է հիշել, որ աղաջուրը ոչ մի դեպքում չի կարելի կուլ տալ: Այս լուծույթը պատրաստելու համար հարկավոր է կես լիտր սենյակային ջերմաստիճանի ջրին ավելացնել մեկ ճաշի գդալ աղ և լավ խառնել մինչև աղը լուծվի:

Նյութի աղբյուրը՝ budetezdorovy.ru