Առողջական ինչ խնդիրների ախտանշան կարող են լինել աչքերի հետ կապված տարատեսակ խանգարումները

Մարդու օրգանիզմի աշխատանքի հետ կապված ցանկացած խնդիր դրսևորվում է տարբեր ախտանշանների միջոցով, ուստի երբեմն այս կամ այն խանգարման դեպքում հարկավոր է ուշադրություն դարձնել նաև այլ օրգաններին ու համակարգերին: Օրինակ՝ աչքերի հետ կապված խնդիրները երբեմն հանդես են գալիս ոչ թե որպես առանձին հիվանդություն, այլ որպես ախտանշան՝ հուշելով այլ խնդրի մասին:

Գերմանացի ակնավիրաբույժ Էլիզաբետ Հոսը ներկայացրել է, թե առողջական ինչ խնդիրների մասին կարող են հուշել մարդու աչքերը:

Աչքերի կարմրածություն

Գերմանացի բժշկի խոսքով՝ աչքերի կարմրածությունը կարող է պայմանավորված լինել տարբեր պատճառներով, այդ թվում՝ ալերգիայով, վարակով, ներակնային բարձր ճնշմամբ կամ բորբոքումով: Բացի այդ, նման ախտանշան կարող է ի հայտ գալ նաև կոնտակտային ոսպնյակների սխալ գործածության կամ դրանցով քնելու դեպքում: Որպես կանոն նման կարմրածությունն անհետանում է որոշ ժամանակ անց, սակայն եթե այն ուղեկցվում է նաև ուժգին ցավով կամ չի անհետանում երկար ժամանակ, ապա հարկավոր է դիմել բժշկին:

Աղոտ տեղոցություն

Ինչպես նշում է մասնագետը, աղոտ տեսողությունը կարող է հուշել ինչպես անվնաս խանգարման մասին, ինչպիսին է աչքերի չորությունը, այնպես էլ վտանգավոր  խանգարման մասին, ինչպիսին է գլխուղեղի կաթվածը: Սա է պատճառը, որ եթե պատկերն աչքերի առջև հստակ չէ, ապա հարկավոր է անհապաղ դիմել ակնաբույժին:

Կոպի թրթռոց

Կոպի թրթռոցը կարող է պայմանավորված լինել հոգնածությամբ, ուստի շատերն են բախվում այս խնդրին քնի պակասի կամ սթրեսի դեպքում: Բացի այդ, թրթռացող կոպը կարող է հուշել օրգանիզմում մագնեզիումի պակասի, զարկերակային ճնշման բարձրացման և վահանագեղձի աշխատանքի խանգարման մասին:

Սպիտակուցային թաղանթի դեղին երանգ

Աչքերի սպիտակուցային թաղանթի դեղին երանգը հուշում է օրգանիզմում լեղու պիգմենտի՝ բիլիռուբինի բարձր մակարդակի մասին: Այս խանգարումը հաճախ է հանդիպում լյարդի հիվանդութոյւնների դեպքում:

Արցունքահոսություն

Լույսի կամ քամու նկատմամբ գերզգայունությունը կարող է դառնալ արցունքահոսության պատճառ, ուստի նման խնդրից խուսափելու համար հարկավոր է արևային ակնոց կրել: Ընդ որում՝ առավել հաճախ այս զգայունությունը զարգանում է տարիքի հետ: Սակայն որոշ դեպքերում արցունքահոսությունը կարող է պայմանավորված լինել նաև արցունքագեղձի ծորանի վարակով կամ բորբոքումով, ուստի նման խնդրի առկայության դեպքում հարկավոր է դիմել ակնաբույժին:

Աչքերի չորություն

Աչքերի չորությունն առավել հաճախ պայմանավորված է լինում նրանով, որ օրգանիզմը չի արտադրում բավարար քանակությամբ հեղուկ տեսողության օրգանների պաշտպանության համար:  Բացի այդ, չորության պատճառ կարող է դառնալ նաև համակարգչի առջև աշխատելը, քանի որ այս դեպքում մարդը բավական հաճախ չի թարթում աչքերը:

Սակայն աչքերի չորությունը կարող է պայմանավորված լինել նաև այլ՝ ավելի վտանգավոր խնդիրներով: Օրինակ՝ չորության պատճառ կարող է հանդիսանալ կոպի քրոնիկ բորբոքումը, որից պաշտպանվելու համար հարկավոր է բավարար քանակությամբ օմեգա-3 ճարպաթթու ընդունել և հրաժարվել ծխախոտից, քանի որ ծխող մարդկանց մոտ այս տհաճ խնդիրը երկու անգամ հաճախ է հանդիպում:

Բացի այդ, աչքերի չորությունը կարող է պայմանավորված լինել նաև շպարը կոսմետիկ հատուկ միջոցով մաքրելու սովորությամբ, քանի որ այդ դեպքում շպարի ու կոսմետիկ միջոցների բաղադրիչները կարող են խցանել մեյբոմյան գեղձերը, որոնք արտազատում են արցունքի լիպիդային բաղադրիչները: Այս ամենի հետևանքով կոպը բորբոքվում է և ի հայտ են գալիս չորություն ու տհաճ զգացողություններ:

Նյութի աղբյուրը՝ medikforum.ru