Քաղցկեղի մասին հուշող 5 ախտանշան, որոնք մարդիկ հաճախ անտեսում են

Մասնագետների խոսքով՝ քաղցկեղի ախտանշանները կարող են տարատեսակ լինել, սակայն շատերն ուշադրություն չեն դարձնում դրանց, ինչը հանգեցնում է հիվանդության հետագա զարգացման: Այնուամենայնիվ, հարկ է հիշել, որ քաղցկեղն այն հիվանդություններից է, որի վաղ ախտորոշումը զգալիորեն բարձրացնում է բարեհաջող բուժման հավանականությունը, ուստի ձեր ուշադրությանն ենք ներկայացնում այն ախտանշանները, որոնք հուշում են այս հիվանդության զարգացման մասին:

Հազ

Սովորաբար հազը մարդիկ վերագրում են մրսածությանը կամ ալերգիաներին և անուշադրության են մատնում, մինչդեռ այն ոչ միշտ է պայմանավորված լինում նման խնդիրներով: «Հիմնականում հազը կապված չի լինում քաղցկեղի հետ, սակայն երկարատև հազի դեպքում հարկավոր է բուժզննում անցնել թոքերի քաղցկեղի հավանականությունը բացառելու համար», - նշում է Քաղցկեղի կանխարգելման կենտրոնի մասնագետ Թերեզա Վարֆոլոմեյը: Փորձագետի խոսքով՝ ավելի քան երկու շաբաթ չմեղմվող հազը կամ խռպոտությունը, որոնցից չի հաջողվում ազատվել անգամ դեղորայքի միջոցով, լուրջ պատճառ է բուժզննում անցնելու համար:

Ստամոքսի այրոց

Ստամոքսի այրոցը կարող է պայմանավորված լինել տարբեր պատճառներով, այդ թվում՝ լուրջ սթրեսով, չափազանց յուղոտ մթերքով կամ քաղցր ուտեստներով: Եթե այն ի հայտ է գալիս հազվադեպ, ապա անհանգստանալու պատճառ չկա, մինչդեռ հաճախակի կրկնվող այրոցը կարող է լինել կոկորդի կամ կերակրափողի քաղցկեղի ախտանշան:

Մաշկային քոր

Գերմանացի մասնագետների խոսքով՝ մաշկին պիգմենտային հետքերի և խալերի ի հայտ գալու վտանգը շատերը թերագնահատում են, մինչդեռ դրանք կարող են վերափոխվել՝ վերածվելով մելանոմայի: Վերափոխման այս գործընթացը հաճախ ուղեկցվում է մի շարք տհաճ ախտանշաններով, այդ թվում քորով ու այրոցով: Սա է պատճառը, որ նման ախտանշանների ի հայտ գալու դեպքում հարկավոր է անպայման դիմել մաշկաբանին:

Կղանքում արյան հետքերի առկայություն

Կղանքում արյան առկայությունը մեծ մասամբ պայմանավորված է լինում անվնաս խնդիրներով: Առավել հաճախ նման ախտանշանի պատճառ են դառնում թութքն ու աղիքի լորձաթաղանթի չնչին վնասվածքները, սակայն 50-ն անց մադրիկ պետք է շատ զգոն լինեն և նման խնդրի ի հայտ գալու դեպքում անհապաղ բուժզննում անցնեն, քանի որ լինում են դեպքեր, երբ նման ախտանշանով է դրսևորվում նաև քաղցկեղը:

Ավշային հանգույցների այտուցվածություն

Եթե ավշային հանգույցները նորմայից մեծ են, սակայն ցավոտ զգացողություններ չեն նկատվում, ապա մեծ է հավանականությունը, որ խնդիրը պայմանավորված է ավշային հանգույցների քաղցկեղով: Այս ախտորոշման հաստատման հավանականությունը հատկապես մեծ է, եթե այտուցը չի անհետանում կամ գոնե չի փոքրանում բավական երկար ժամանակ: Նման դեպքերում բուժզննումը պարտադիր է:

Նյութի աղբյուրը՝ medikforum.ru