3 մթերք, որոնք կօգնեն խթանել գլխուղեղի աշխատանքն ու բարելավել կոգնիտիվ գործառույթները

18:19 • 08.11.19

Գլխուղեղի համար նախատեսված հատուկ սնունդ, որը կպաշտպանի տարիքային խանգարումներից (օրինակ՝ Ալցհեյմերի հիվանդությունից, թուլամտությունից) գոյություն չունի, սակայն սննդակարգի նկատմամբ ուշադիր լինելը թույլ է տալիս որոշ չափով նվազեցնել նման խանդիրների զարգացման հավանականությունը: Բանն այն է, որ առողջ սննդակարգը ենթադրում է, որ օրգանիզմը ստանում է գլխուղեղի աշխատանքի համար անհրաժեշտ բոլոր սննդարար նյութերը, ինչի շնորհիվ կոգնիտիվ գործառույթները չեն թուլանում:

Մասնագետները ներկայացրել են երեք օգտակար մթերք, որոնք կբարելավեն գլխուղեղի աշխատանքն ու կխթանեն կոգնիտիվ գործառույթները:

Յուղոտ ձկնատեսակներ

Անփոխարինելի ճարպաթթուները չեն սինթեզվում օրգանզմում, ինչը նշանակում է, որ սննդակարգը պետք է պարունակի դրանցով հարուստ մթերք: Առավել օգտակար են օմեգա-3 ճարպաթթուները, որոնք պարունակվում են յուղոտ ձկնատեսակներում: Այս օգտակար տարրի բուսական աղբյուր են կտավատի սերմերը, սոյան, դդմի սերմերը, հունական ընկույզն ու նշված մթերքից ստացված յուղերը: Սակայն այնուամենայնիվ այս տարրերն առավել մեծ քանակությամբ և ճիշտ բալանսավորված պարունակվում են յուղոտ ձկնատեսակներում, ինչպիսին են սաղմոնը, կարմրախայտը, սկումբրիան, սարդինաները և այլն:

Հարկ է հիշել, որ դոկոզագեկսաենային թթվի ցածր մակարդակը կարող է կապված լինել դեմենցիայի ու Ալցհեյմերի հիվանդության զարգացման հետ, մինչդեռ էյկոսապենտաենային թթվի և դոկոզագեկսաենային թթվի բավարար մակարդակներն օգնում են հեշտությամբ հաղթահարել սթրեսն ու կարգավորել գլխուղեղում տեղի ունեցող քիմիական գործընթացները, որոնք պատասխանատու են լավ տրամադրության համար:

Հավկիթ

Հավկիթը հարուստ է B խմբի վիտամիններով, որոնցից որոշները (B6, B12, ֆոլաթթու) նվազեցնում են արյան մեջ հոմոցիստեին միացության մակարդակը, որը կապված է գլխուղեղի կաթվածի, կոգնիտիվ խանգարումների ու Ալցհեյմերի հիվանդության զարգացման բարձր հավանականության հետ:

Թույլ կոգնիտիվ խանգարումներով մի խումբ տարեց մարդկանց մասնակցությամբ հետազոտությունը ցույց է տվել, որ երկու տարի շարունակ մեծ չափաբաժնով B6 ու B12 վիտամինների, ինչպես նաև ֆոլաթթվի ընդունումը զգալիորեն նվազեցնում է գլխուղեղի չափերի կրճատման մակարդակը, ի տարբերություն այն խմբի, որը միայն պլացեբո է ստացել: Սա է պատճառը, որ գլխուղեղի աշխատանքը խթանելու համար մասնագետները խորհուրդ են տալիս օգտագործել այս վիտամիններով հարուստ մթերք:

Այս տարրերի պարունակությունն առավել բալանսավորված է հավկիթում, սակայն շատ օգտակար կարող են լինել նաև տերևավոր բանջարեղենն ու ամբողջահատիկ մթերքը:

Դդմի սերմեր

Դդմի սերմերը հարուստ են ցինկով, իսկ այս տարրը կենսական նշանակություն ունի հիշողության ու մտավոր կարողությունների բարելավման համար: Բացի այդ, դրանք պարունակում են մեծ քանակությամբ տրիպտոֆան ու մագնեզիում, իսկ դրանք հարկավոր են սերոտոնինի արտազատման համար:

Նյութի աղբյուրը՝ medikforum.ru