Ինչ խանգարումներով կարող է պայմամավորված լինել ձեռքերի թմրածությունը գիշերային ժամերին

Գիշերային ժամերին ձեռքերի թմրածությունը բավական տարածված խնդիր է, որին մարդը կարող է բախվել ցանկացած տարիքում: Որպես կանոն թմրածությունը պայմանավորված է լինում ողնաշարի պարանոցային հատվածի հետ կապված խնդիրներով, սակայն երբեմն թմրածության պատճառ են դառնում նաև այլ խանգարումները, այդ թվում՝ սրտի հիվանդությունները:

Ձեռքերի թմրածության ամենատարածված պատճառներն են ողնաշարի պարանոցային հատվածի հետ կապված անբարենպաստ գործընթացները, որոնք կարող են զարգանալ ինչպես երկարատև լարվածության, այնպես է պարանոցի սխալ դիրքի հետևանքով: Սա է պատճառը, որ այս խնդիրը ներկայում հաճախ է հանդիպում երիտասարդների և անգամ դեռահասների շրջանում, գրում է Medikforum.ru կայքը՝ հղում անելով Webinfo.kz պորտալին: Ընդ որում՝ առավել հաճախ պարանոցային ողերի հետ կապված խնդիրներիով պայմանավորված թմրածությունն ու տհաճ զգացողությունները նկատվում են աջ ձեռքի հատվածում:

Մասնագետների խոսքով՝ պարանոցային սպոնդիլեզը, օստեոխոնդրոզը, միջողային սկավառակի ճողվածքը կամ ողնաշարի պարանոցային հատվածի միջողային սկավառակների պրոտրուզիան բացասաբար են անդրադառնում ողնուղեղի՝ դեպի ձեռքերը ձգվող նյարդերի վրա:

Սակայն ողնաշարի հետ կապված խնդիրները միակը չեն, որ կարող են հանգեցնել ձեռքերի թմրածության: Շատ հաճախ այս խնդիրը պայմանավորված է լինում դաստակային թունելի համախտանիշով, որի դեպքում սեղմվում են դաստակի հատվածի նյարդերը: Նման խնդիր է առաջանում այն դեպքում, երբ դաստակների վրա երկար ժամանակ բավական ինտենսիվ ճնում է գործադրվում: Այս դեպքում կարող է թմրել ինչպես ամբողջ դաստակը, այնպես էլ դրա մի հատվածը կամ միայն մատները:

Եթե թմրում են բացառապես ձեռքերի մատները, ապա խնդիրը կարող է պայմանավորված լինել մանր հոդերի պոլիարթրիտով: Բացի այդ, գիշերվա ընթացքում ձեռքերի թմրածության պատճառ կարող են դառնալ նաև նյութափոխանակության խանգարումները: Այս խանգարումների հետ են կապված շաքարային դիաբետը և երիկամների ու լյարդի հիվանդությունները, ինչը նշանակում է, որ գիշերային ժամերին ձեռքերի թմրածությունը կարող է հուշել այս հիվանդությունների զարգացման մասին:

Ձեռքերի թմրածությունը կարող է լինել նաև սրտանոթային համակարգի աշխատանքի խանգարումների մասին հուշող ախտանշան, որոնց թվում կարող են լինել նաև բավական վտանգավորները (օրինակ՝ զարկերակային գերճնշումը): Եթե տհաճ զգացողութոյւնները նկատվում են միայն ձախ ձեռքում, ապա մեծ է հավանականությունը, որ դրանք կարող են պայմանավորված լինել սրտի հիվանդություններով, այդ թվում կրծքային հեղձուկով (ստենոկարդիա) կամ սրտամկանի ինֆարկտով: Եթե ձախ ձեռքի թմրածությունն ի հայտ է գալիս կտրուկ և շարունակվում է մեկ ժամ, ապա հարկավոր է դիմել մասնագետին:

«Ձեռքերում տհաճ զգացողությունների առաջացման այլ պատճառների շարքում կարելի է առանձնացնել սխալ ընտրված բարձի կիրառությունը կամ քնած ժամանակ մարմնի ու ձեռքերի սխալ դիրքը, աթերոսկլերոզը, B խմբի վիտամինների պակասը, ալկոհոլի և նիկոտինի չարաշահումը», - նշում են մասնագետները: