9 ախտանշան, որոնք հուշում են գլխուղեղի կաթվածի զարգացման բարձր հավանականության մասին

Գլխուղեղի կաթվածի դեպքում արյունատար անոթի խցանման կամ վնասման հետևանքով նյարդային բջիջները դադարում են ստանալ բավարար քանակությամբ թթվածին, սակայն մինչ վտանգավոր խանգարման ի հայտ գալն օրգանիզմը որոշ ախտանշանների միջոցով նախազգուշացնում է նման հավանականության մասին:

Ինչպես գրում է medikforum.ru կայքը, գլխուղեղի կաթվածն այն խանգարումներից է, որի դեպքում հարկավոր է անհապաղ միջոցներ ձեռնարկել, քանի որ միայն այդ կերպ հնարավոր կլինի խուսափել վտանգավոր ու անդառնալի հետևանքներից: Սակայն ժամանակին միջոցներ ձեռնարկելու համար նախ հարկավոր է սովորել տարբերել խնդրի ախտանշանները, ուստի ձեր ուշադրությանն ենք ներկայացնում դրանցից հիմնականները:

Գլխապտույտ ու գլխացավ

Գլխուղեղի հյուսվածքներում թթվածնի պակասի հետևանքով կարող է նկատվել գլխապտույտ, որը պայմանավորված կլինի անոթի պատռվածքով: Բացի այդ, այս խնդրի մասին կարող է հուշել նաև կտրուկ ի հայտ եկող և չափազանց սաստիկ գլխացավը:

Բերանի մի անկյունի ծռվածություն

Կաթվածը սովորաբար ախտահարում է գլխուղեղի միայն մի հատվածը, իսկ շարժողական ակտիվության խանգարումներ են նկատվում մարմնի հակառակ կողմում:

Թուլություն մարմնի մի հատվածում

Կաթվածի մասին հուշող ախտանշաններից է նաև մարմնի մի կողմի թուլությունը, ինչը նույնպես պայմանավորված է գլխուղեղի մի կիսագնդում արյան շրջանառության խանգարմամբ: Այս դեպքում մարդու աջ և ձախ ձեռքերի ձեռքսեղմումների ուժգնությունները տարբեր կլինեն:

Լեզվի ծռվածություն

Շարժողական գործառույթների խանգարման դեպքում մարդը չի կարողանա ցույց տալ լեզուն և այն ուղիղ պահել:

Խոսքի խանգարումներ

Կաթվածի բարձր հավանականության մասին են հուշում նաև խոսքի խանգարումները, ուստի եթե մարդը չի կարողանում հիշել կամ հստակ արտաբերել անհրաժեշտ բառը, ապա հարկավոր է անհապաղ միջոցներ ձեռնարկել:

Հեմիպլեգիա

Կաթվածի հավանականության մասին կարող է հուշել մաև մարմնի մի կեսի մկանների թուլացումը: Այս դեպքում տուժածը սովորաբար փորձում է ավելի ակտիվ կերպով օգտագործել մարմնի առողջ կողմը, ինչը պետք է ակնհայտ լինի նրա հարազատներին:

Լսողության խանգարումներ

Լսողողության զգալի և կտրուկ վատթարացումը նույնպես կարող է նախազգուշացնել կաթվածի մասին: Սակայն միևնույն ժամանակ այս խանգարման մասին կարող է հուշել նաև աղմուկի նկատմամբ գերզգայունությունը:

Բիբերի միջև ակնհայտ տարբերություն

Գլխուղեղի վնասված կիսագնդում ներգանգային բարձր ճնշումը մեխանիկորեն խթանում է գլխուղեղի՝ բիբի լայնությունը կարգավորող հատվածը, ինչի հետևանքով բիբն այլևս չի կարող արձագանքել լույսին և իր չափերով տարբերվում է առողջ կողմի բիբից:

Կոգնիտիվ գործառույթների խանգարում

Գլխուղեղին անհրաժեշտ թթվածնի պակասը հանգեցնում է կոգնիտիվ գործառույթների դանդաղ վատթարացման, ուստի հիշողության հետ կապված խնդիրները կամ կոգնիտիվ կարողությունների կտրուկ թուլացումը ոչ մի դեպքում չի կարելի անտեսել: