Որոնք են ցիստիտի զարգացման պատճառները, ախտանշաններն ու բուժման առանձնահատկությունները

Ցիստիտը միզապարկի բորբոքային հիվանդություն է, որը դրսևորվում է այնպիսի ախտանշաններով, ինչպիսին են որովայնի ստորին հատվածի ցավերը, հաճախամիզությունն ու ցավով ու այրոցով ուղեկցվող միզարձակությունը:

Այս հիվանդության զարգացման հիմնական պատճառներն են երկարատև նստակյաց աշխատանքը, միզապարկը հազվադեպ դատարկելու սովորությունը, նեղ ներքնազգեստը, գերսառեցումն ու հաճախակի փորկապությունը:

Սա պայմանավորված է նրանով, որ նշված գրեթե բոլոր գործոնները դառնում են որովայնի ստորին հատվածում արյան հոսքի խանգարման և լճացումների առաջացման պատճառ, ինչն էլ հանգեցնում է բորբոքումների: Բացի այդ, միզուկի բորբոքման պատճառ կարող է դառնալ նաև որոշակի դեղամիջոցների ընդունումը:

Այս խնդիրն առավել հաճախ ախտորոշվում է կանանց մոտ, ինչը պայմանավորված է կանանց ու տղամարդկանց անատոմիական տարբերություններով: Ֆիզիոլոգիական առանձնահատկությունների պատճառով ախտածին միկրոօրգանիզմներն ավելի հեշտ են հայտնվում կանանց օրգանիզմում, մինչդեռ տղամարդկանց դեպքում ցիստիտը սովորաբար պայմանավորված է լինում գերսառեցմամբ, միզուկի վարակմամբ և շագանակագեղձի բորբոքմամբ:

Ցիստիտի զարգացմանը նպաստող գործոնների շարքին է դասվում նաև կոշտ զուգարանի թղթի գործածությունը, ինչը կարող է դառնալ վնասվածքների պատճառ, ինչպես նաև անձնական հիգիենայի պարագաներից առաջացած ալերգիաները:

Այս հիվանդության դեպքում հարկավոր է անպայման դիմել բժշկին և հետևել նրա բոլոր ցուցումներին: Խնդրի ախտանշանները մեղմելու համար խորհուրդ է տրվում մեծ քանակությամբ գոլ հեղուկ խմել: Շատ արդյունավետ կարող են լինել անանուխի, մաղադանոսի, հազարատերևուկի, տատրակի, դաշտային ձիաձետի թուրմերը: Սակայն հարկավոր է բացառել թեյը, սուրճը, ալկոհոլային ըմպելիքները, ինչպես նաև կծու համեմունքները և ապխտած ու թթու մթերքը, քանի որ նման մթերքն էլ ավելի է գրգռում միզապարկը:

Ներկայում դեղատներում կան տարատեսակ բուսական խառնուրդներ, որոնք օժտված են հակաբորբոքային ու միզամուղ հատկություններով և նախատեսված ե նման խանգարումների համար: Բացի այդ, ցավոտ զգացողությունները մեղմելու համար կարելի է ընդունել սպազմոլիտիկներ, սակայն միայն հակացուցումների բացակայության դեպքում:

Հարկ է հիշել, որ ցիստիտի դեպքում ժողովրդական միջոցները միայն հավելում են լինում հիմնական բուժմանը, որը նշանակում է բժիշկը: Նման միջոցները կօգնեն մեղմել տհաճ զգացողությունները, սակայն չեն կարող լիարժեք բուժել, քանի որ ցիստիտից կարելի է ազատվել միայն հակաբակտերիալ դեղամիջոցների ընդունման դեպքում:

Նյութի աղբյուրը՝ planet-today.ru