Հեպատիտ C-ի մասին հուշող 5 ախտանշան, որոնք պետք է իմանան բոլորը

Հեպատիտ C-ն լյարդի վիրուսային հիվանդություն է, որի դեպքում հյուսվածքների քայքայման հետևանքով օրգանը դանդաղ կորցնում է իր գործոնների մի մասը: Այս վիրուսը կարող է փոխանցվել արյան չնչին կաթիլի միջոցով, որը կարող է անգամ անզեն աչքով տեսանելի չլինել, ուստի հարկավոր է շատ զգոն լինել և սովորել տարբերել այս հիվանդության մասին հուշող ախտանշանները:

Medikforum.ru կայքը ներկայացրել է մի քանի ախտանշան, որոնք կարող են պայմանավորված լինել հեպատիտ C-ով:

Դեղնուկ

Սա ամենաակնհայտ ախտանշանն է, որը բնորոշվում է մաշկի, լորձաթաղանթների ու աչքերի սպիտակուցային թաղանթի դեղնավուն երանգով, ինչը պայմանավորված է լինում բիլիռուբին մոլեկուլի ազդեցությամբ:

Ցավ

Լյարդը գտնվում է որովայնի վերին աջ հատվածում և, ինչպես ցանկացած այլ օրգան, այն նույնպես մեծանում է բորբոքման դեպքում: Լյարդում չկան զգայուն նյարդեր, ինչը նշանակում է, որ մարդը չի զգում իր լյարդը, սակայն կան որոշ նյարդեր, որոնք կապված են օրգանը պատող շարակցական հյուսվածքների հետ, ինչի հետևանքով էլ լյարդի ախտահարումը դրսևորվում է ցավոտ զգացողություններով:

Դժգույն արտաթորանք

Առողջ լյարդի դեպքում հեմոգլոբինի փոխանակության արգասիքները դուրս են գալիս օրգանիզմից լեղու միջոցով: Լեղին հայտնվում է աղիներում, օգնում է յուրացնել սնունդն ու դուրս գալիս օրգանիզմից արտաթորանքի հետ: Հենց լեղիով է պայմանավորված արտաթորանքի շագանակագույն երանգը: Լեղու գունային մոլեկուլների պակասի դեպքում արտաթորանքը ստանում է բաց շագանակագույն, դեղին կամ անգամ մոխրագույն երանգ:

Քաշի և ախորժակի կորուստ

Ախորժակի և քաշի կորուստը հեպատիտի ընդհանուր ախտանշանների շարքին է դասվում: Առայժմ հայտնի չէ, թե ինչով է պայմանավորված լյարդի խնդիրների դեպքում ախորժակի կորուստը, սակայն որոշ հետազոտություններ ցույց են տվել, որ նման դեպքերում փոխվում է հիվանդների համի ընկալումը: Ախորժակի կորուստն, իր հերթին, հանգեցնում է քաշի նվազման ու հյուծվածության:

Մաշկային քոր

Լյարդի հիվանդությունների մասին հուշող ամենավառ ախտանշաններից մեկը մաշկային քորն է: Լյարդի հիմնական գործառույթներից մեկը տոքսինների վերամշակումն ու դուրսբերումն է օրգանիզմից: Եթե օրգանը չի կարողանում ինչպես հարկն է կատարել իր գործառույթները, այդ տոքսինները հայտնվում են արյան մեջ ու տարածվում՝ կուտակվելով որոշ հատվածներում, որտեղից էլ նյարդային վերջավորություններն ազդանշաններ են ուղարկում գլխուղեղին: