Մասնագետները ներկայացրել են՝ որոնք են թոքերի համար ամենաօգտակար սննդամթերքի տեսակները

22:02 • 29.11.19

Թոքերը կենսական նշանակություն ունեցող օրգան են, ուստի դրանց առողջության մասին հոգ տանելը շատ կարևոր է յուրաքանչյուրի համար: Առհասարակ շնչառական համակարգի օրգանները շատ կարևոր նշանակություն ունեն ամբողջ օրգանիզմի աշխատանքի համար, մինչդեռ մարդկանց վատ սովորությունները, արտաքին անբարենպաստ գործոններն ու սխալ կենսակերպը կործանարար ազդեցություն են ունենում թոքերի վրա:

Սակայն փորձը ցույց է տվել, որ կան սննդամթերքի որոշակի տեսակներ, որոնք թույլ են տալիս բարելավել թոքերի առողջությունը: Գիտնականներն ավելի քան 100 հազար մարդու մասնակցությամբ լայնամասշտաբ հետազոտության արդյունքում պարզել են, թե սննդամթերքի որ տեսակներն են առավել օգտակար թոքերի համար:

Հետազոտության շրջանակներում կամավորները կիսվել են իրենց սննդակարգի առանձնահատկություններով, որից հետո մասնագետներն ուսումնասիրել են նրանց բժշկական ցուցանիշները: Ուսումանսիրության արդյունքում գիտնականները եկել են այն եզրահանգման, որ թոքերի առողջության պահպանման համար հարկավոր է առօրյայում նախապատվությունը տալ այնպիսի մթերքին, որը հարուստ է ազատ ռադիկալների թթվայնացնող ազդեցությունը նվազագույնի հասցնող հակաօքսիդանտներով:

Հակաօքսիդանտներն ապահովում են պաշտպանություն բջջային մակարդակով, ուստի դրանք շատ կարևոր են օրգանիզմի համար: Սա է պատճառը, որ թոքերի համար առավել օգտակար սնդնամթերքի շարքին են մասնագետները դասել ծովային ձկնատեսակները, կաթնաշոռից պատրաստված մթերքը, հունական ընկույզը, նուշը, հավկիթը, մաղադանոսն ու հատապտղային մորսերը:

Բացի այդ, մասնագետները խորհուրդ են տալիս չմոռանալ ֆիզիկական ակտիվության մասին, քանի որ այն նույնպես նպաստում է շնչառական համակարգի աշխատանքի բարելավմանը: Նաև հարկավոր է անպայման հրաժարվել ծխախոտից և խուսափել դրա ծխից, քանի որ անգամ պասիվ ծխելը շատ վնասակար է թոքերի համար:

Նյութի աղբյուրը՝ actualnews.org