Ինչ վտանգավոր պատճառներով կարող է պայմանավորված լինել ոտքերի դողը

Ոտքերի դողը կարող է բավական անվնաս թվացող խնդիր է, ուստի մարդիկ հաճախ անտեսում են այն՝ վերագրելով պարզապես հոգնածությանը, սակայն իրականում ոտքերի դողի իրական պատճառը միայն ախտանշանների միջոցով պարզել հնարավոր չի լինի, և հենց սա է պատճառը, որ նման խնդրի դեպքում հարկավոր է անպայման դիմել մասնագետին (թերապևտին կամ նյարդաբանին) և համապատասխան բուժզննումն անցնել:

Որպես կանոն ոտքերի դողն իսկապես պայմանավորված է լինում ոչ շատ կարևոր խնդրով, սակայն բժիշկները նախազգուշացնում են, որ երբեմն նման խնդիրը հուշում է բավական լուրջ առողջական խնդիրների մասին: Մասնագետները ներկայացրել են այն վտանգավոր խանգարումները, որոնք կարող են դառնալ ոտքերի դողի պատճառ:

Տագնապ ու նևրոզ

Անհանգստությունը, տագնապն ու խուճապը կարող են դառնալ ոտքերի ժամանակավոր դողի պատճառ: Այս կերպ օրգանիզմն արձագանքում է սթրեսին. միանում է «պայքարիր կամ փախիր» վիճակը, որը կապված է էվոլյուցիոն մեխանիզմների հետ: Սակայն երբեմն սաստիկ անհանգստության ու տագնապի դեպքում զարգանում է քրոնիկ դող կամ դողի նոպաներ: Նման դեպքերում բուժումը պետք է ուղված լինի նյարդային վիճակի կարգավորմանը, քանի որ միայն այդ կերպ հնարավոր կլինի ազատվել դողից:

Ալկոհոլի չարաշահում

Ալկոհոլի չարաշահումն ու զրկանքի համախտանիշը կարող են ազդել գլխուղեղի և նյարդային համակարգի ռեակցիաների վրա և անգամ դառնալ դողի պատճառ:

Նեյրոպաթիա

Սա նյարդի վնասվածքի տեսակ է, որը կարող է դառնալ վերջույթներում արտասովոր ծակծկոցի կամ ցավոտ զգացողությունների պատճառ: Երբեմն նեյրոպաթիան դրսևորվում է դողի կամ արտասովոր շարժումների տեսքով:

Նեյրոպաթիայի զարգացմանը նպաստող ամենավտանգավոր գործոններից մեկը շաքարային դիաբետն է: Այս դեպքում նման խնդիրը հուշում է, որ ընթացիկ բուժումն անարդյունավետ է:

Դեմենցիա (թուլամտություն)

Դեմենցիայի դեպքում գլխուղեղի աստիճանաբար խորացող վնասվածքն ազդում է մարդու գլխուղեղի գործառույթների բոլոր ասպեկտների, այդ թվում՝ շարժումների վրա: Սա է պատճառը, որ ոմանց մոտ դեմենցիայի դեպքում զարգանում է ոտքերի կամ ձեռքերի դող: Որոշ դեպքերում նման դողը, փաստացիորեն, վտանգավոր նեյրոդեգեներատիվ խանգարման մասին հուշող առաջին ախտանշանն է լինում:

Հիպերթիրեոզ

Հիշերթիրեոզը վահանագեղձի գերակտիվությունն է, որի դեպքում արագանում են նաև օրգանիզմի որոշ գործառույթներ: Շատ դեպքերում վահանագեղձի աշխատանքի նման խանգարումները պայմանավորված են լինում Գրեյվսի հիվանդությամբ: Հիպերթիրեոզի դեպքում հիվանդի մոտ կարող են նկատվել մկանային սպազմներ, ոտքերի կամ ձեռքերի դող, անհանգստություն և անբացատրելի քաշի կորուստ:

Պարկինսոնի հիվանդություն

Սա նյարդային համակարգի մի վիճակ է, որն ազդում է գլխուղեղի և նյարդերի վրա՝ առաջացնելով դող և այլ անկառավարելի շարժումներ: Ընդ որում՝ ժամանակի ընթացքում հիվանդի վիճակն էլ ավելի է վատթարանում: Պարկինսոնի հիվանդությունով որոշ մարդկանց համար դողը հիվանդության մասին հուշող առաջին ախտանշանն է լինում:

Որ դեպքերում է հարկավոր դիմել մասնագետին

Մեծ մասամբ ոտքերի կամ միայն մի ոտքի դողը պայմանավորված չի լինում լուրջ հիվանդությամբ, ուստի դրանից հաջողվում է խուսափել հանգստի և ժամանակավորապես կոֆեինից հրաժարվելու միջոցով:

Սակայն եթե դողն ավելի ինտենսիվ է դառնում կամ սկսում է ավելի հաճախ անհանգստացնել, ապա հարկավոր է անհապաղ դիմել բժշկին: Հարկավոր է անպայման բուժզննում անցնել, եթե դողն ուղեկցվում է այնպիսի ախտանշաններով, ինչպիսին են.

• հիշողության հետ կապված խնդիրները,
• տրամադրության տատանումները,
• անկառավարելի շարժումները,
• շարժունակության հետ կապված խնդիրները,
• անհանգստությունը,
• քնի հետ կապված խնդիրները,
• ոտքերին կամ ձեռքերին ի հայտ եկած վերքերը (ինչպես նաև շաքարային դիաբետի այլ ախտանշանները):

Նյութի աղբյուրը՝ medikforum.ru