Գերմանացի բժիշկները ներկայացրել են այն նախանշանները, որոնք կօգնեն ժամանակին հայտնաբերել մաշկի քաղցկեղը

Մաշկի քաղցկեղի ախտորոշման դեպքերի թիվն օրեցօր ավելանում է, ուստի գերմանացի մասնագետները ներկայացրել են այն առանձնահատկությունները, որոնք կօգնեն ժամանակին հայտնաբերել մաշկի քաղցկեղը: Ինչպես գրում է Focus ամսագիրը, այս հիվանդության բարեհաջող բուժման համար շատ կարևոր է այն վաղ փուլերում հայտնաբերելը, ինչը գրեթե անհնարին կլինի խնդրի մասին հուշող ախտանշանները չիմանալու դեպքում:

Մասնագետների կարծիքով՝ մարդու մաշկը «չի մոռանում» ագրեսիվ ազդեցության դեպքերը: «Մանուկ հասակում հաճախ կիզիչ արևի տակ խաղացած, իսկ երիտասարդության շրջանում պարբերաբար սոլյարի հաճախած յուրաքանչյուր մարդ տարեց հասակում կարող է բախվել մաշկի քաղցկեղի զարգացման խնդրին», - նշում են մասնագետները:

Վիճակագրական տվյալներով՝ 2009-2015 թվականներն ընկած ժամանակահատվածում մաշկի քաղցկեղի ամենաագրեսիվ տեսակներից մեկի՝ մելանոմայի ախտորոշման դեպքերի թիվն աճել է ավելի քան 30%-ով: Ընդ որում՝ առավել հաճախ քաղցկեղի այս տեսակն ախտորոշվում է 75-79 տարեկան անձանց մոտ: Ավելին՝ այս հիվանդությունը շատ ավելի հաճախ ախտորոշվում է 45-54 տարեկան կանանց մոտ, քան տղամարդկանց: Բժիշկների կարծիքով՝ սա պայմանավորված է նրանով, որ կանայք ավելի հաճախ են արևայրուք ստանում և սոլյարի այցելում, քան տղամարդիկ:

Մասնագետների խոսքով՝ քաղցկեղի այս տեսակը ժամանակին ախտորոշելու համար հարկավոր է պարբերաբար այցելել մաշկաբանին և բուժզննում անցնել: Բացի այդ, կարելի է ավելի ուշադիր լինել և պարբերաբար ինքնուրույն հետազոտել մաշկը՝ առաջնորդվելով ABCDE կանոնով:

A (asymmetry)՝ անհամաչափություն

Եթե խալն ունի համաչափ կլոր ձև, ապա անհանգստանալու կարիք չկա, մինչդեռ անհամաչափության դեպքում հարկավոր է անհապաղ այցելել մասնագետին:

B (border irregularity)` եզրերի համաչափություն

Եթե խալը հարթ է ու հստակ եզրագծված ապա այն անվնաս է: Անհանգստանալու պատճառ պետք է դառնա անհամաչափ, անհարթ ու վատ եզրագծված խալը, որի դեպքում հարկավոր է բուժզննում անցնել:

C (color)՝ գույն

Առողջ խալն ունենում է համաչափ գույն, ուստի խալի վրա ավելի մուգ կամ բաց բծերի առկայության դեպքում հարկավոր է խորհրդակցել մասնագետի հետ:

D (diameter)՝ տրամագիծ

Եթե խալի տրամագիծն ամենալայն հատվածում կազմում է առավելագույնը 5 մմ, ապա այն բարորակ է, մինչդեռ ավելի մեծ լինելու դեպքում այն կարող է և չարորակ լինել: Ընդ որում՝ առավել վտանգավոր է լինում անհամաչափ մեծ խալը:

E (evolving)`զարգացում

Եթե խալը միշտ հարթ է և չի փոխում իր ձևը, ապա անհանգստանալու կարիք չկա: Չարորակացման գործընթացի մասին է վկայում խալի ձևի փոփոխությունը, ուստի եթե այն մեծանում է (ավելի քան մեկ միլիմետրով), շարունակում է զարգանալ ու աճել, ապա հարկավոր է անհապաղ դիմել մասնագետին: