7 վտանգավոր խանգարում, որոնք կարող են զարգանալ օրգանիզմում վիտամին D-ի դեֆիցիտի հետևանքով

20:32 • 20.12.19

Մարդկային օրգանիզմն արևի ճառագայթների ազդեցության ներքո ունակ է բնական ճանապարհիվ վիտամին D սինթեզել, սակայն ձմռանը եղանակային ոչ շատ բարենպաստ պայմանների պատճառով այս գործընթացի ինտենսիվությունը նվազում է, ինչը կարող է դառնալ այս կարևոր տարրի դեֆիցիտի պատճառ: Այնուամենայնիվ, շատերն անուշադրության են մատնում այս խնդիրը և չեն պատկերացնում, թե օրգանիզմի համար ինչ վտանգավոր հետևանքներ կարող է ունենալ վիտամին D-ի դեֆիցիտը:

Զարկերակային բարձր ճնշում

Վիտամին D-ի պակասի դեպքում զարկերակային գերճնշման զարգացման հավանականությունը բարձրանում է 32%-ով: Այս վիտամինը վերահսկում է օրգանիզմում բորբոքային գործընթացները, ուստի զարմանալի չէ, որ դրա դեֆիցիտի դեպքում ի հայտ են գալիս քրոնիկ բորբոքային գործընթացներ, որոնք անդրադառնում են նաև անոթների վրա:

Ասթմա

Վիճակագրական տվյալներով՝ ասթմայով հիվանդ երեխաների զգալի մասի մոտ առկա է վիտամին D-ի դեֆիցիտ: Այս տարրի բավարար քանակությունն օգնում է մաքրել շնչառական ուղիներն ու թեթևացնել շնչառությունը, ուստի այն շատ կարևոր է ասթմայով հիվանդների համար:

Ատամների քայքայում

Վիտամին D-ն հարկավոր է կալցիումի և ֆոսֆորի կլանման համար, իսկ այս սննդակար նյութերը խիստ անհրաժեշտ են առողջ ոսկորների և ատամների ձևավորման համար: Սա նշանակում է, որ այս վիտամինի դեֆիցիտը կարող է հանգեցնել ինչպես հոդերի ու ոսկորների, այնպես էլ ատամների թուլացման, և կարող է դառնալ անգամ կարիեսի զարգացման պատճառ:

Քաղցկեղ

Շատ գիտնականներ կարծում են, որ վիտամին D-ի դեֆիցիտը բարձրացնում է չարորակ ուռուցքների զարգացման հավանականությունը, ուստի բավարար քանակությամբ վիտամին D ստանալն օգնում է նվազեցնել քաղցկեղի զարգացման հավանականությունը: Գիտափորձերը ցույց են տվել, որ վիտամին D-ն պաշտպանում է բջիջներն անցանկալի մուտացիաներից և խոչընդոտում արատավոր բջիջների բազմացմանը: Մասնագետների խոսքով՝ այս վիտամինի բարձր մակարդակի դեպքում քաղցկեղով հիվանդներն ավելի երկար են մնում ռեմիսիայի փուլում: Ընդ որում՝ վիտամին D-ն հատկապես օգտակար է կոլոռեկտալ քաղցկեղով ու կրծքագեղձի քաղցկեղով հիվանդների համար:

Գրիպ ու մրսածություն

Վիտամին D-ն շատ կարևոր է իմունային համակարգի համար. այն նվազեցնում է արյան սպիտակ բջիջներում բորբոքային վնասվածքների թիվն ու խթանում իմունային բջիջների արտադրությունը՝ օգնելով օրգանիզմին պայքարել գրիպի, մրսածության և այլ վտանգավոր վարակների դեմ: Վիտամին D-ի դեֆիցիտի դեպքում իմունային համակարգը կտրուկ թուլանում է, և մարդն սկսում է ավելի հաճախ հիվանդանալ:

Շաքարային դիաբետ ու ճարպակալում

Ճարպակալուման ու դրա հետ կապված երկրորդ տիպի շաքարային դիաբետի զարգացումը նույնպես որոշ դեպքերում կախված է վիտամին D-ի մակարդակից: Այն նպաստում է պարաթիրեոիդային հորմոնի մակարդակի նվազմանը, իսկ այս հորմոնն օգնում է ազատվել ավելորդ քաշից, բարձրացնում է լեպտինի՝ ճարպի կուտակման գործընթացը կարգավորող ու հագեցածության զգացման համար պատասխանատու հորմոնի մակարդակը, ինչպես նաև վերահսկողության տակ է պահում կորտիզոլի՝ սթրեսի հորմոնի մակարդակը, որի մշտական ակտիվությունը նպաստում է ճարպակալմանը: Այս ամենի հետևանքով վիտամին D-ի պակասի դեպքում դանդաղում է նյութափոխանակությունը, ինչն էլ հանգեցնում է ճարպի կուտակման և բարձրացնում է բորբոքումների և շաքարային դիաբետի զարգացման հավանականությունը:

Ռևմատոիդ արթրիտ

Ռևմատոիդ արթրիտով հիվանդների գրեթե կեսի մոտ նկատվում է նաև վիտամին D-ի դեֆիցիտ: Ավելին՝ պսորիատիկ արթրիտով հիվանդների շրջանում այս վիտամինի դեֆիցիտն ունեցողների թիվն էլ ավելի բարձր է՝ 62%: Բժիշկները կարծում են, որ իր հակաբորբոքային հատկությունների շնորհիվ վիտամին D-ն օգնում է մեղմել արթրիտի ախտանշանները, մինչդեռ այս վիտամինի դեֆիցիտը, համապատասխանաբար, սրում է հիվանդության ընթացքը:

Նյութի աղբյուրը՝ medikforum.ru