Որովայնի ցավի 6 տեսակ, որոնք պայմանավորված են լինում վտանգավոր հիվանդություններով

17:34 • 21.12.19

Որովայնի ցավերն ու տհաճ զգացողություններն առավել հաճախ պայմանավորված են լինում սխալ սննդակարգով, սակայն լինում են դեպքեր, երբ ցավը հուշում է առողջական լուրջ խնդիրների մասին, որոնց դեպքում հարկավոր է անհապաղ դիմել մասնագետին:

Բժիշկները նշել են ցավի վեց տեսակ, որոնք հուշում են վտանգավոր հիվանդությունների մասին: Նրանց խոսքով՝ հատկապես վտանգավոր են տհաճ զգացողությունները, որոնք ուղեկցվում են մեզի կամ կղանքի մեջ առկա արյան հետքերով: Սակայն այս դեպքում մինչ խուճապի մատնվելը հարկավոր է համոզվել, որ կարմիր հետքերը պայմանավորված չեն կարմիր գունանյութ պարունակող մթերքի գործածությամբ: Մեզի մեջ արյան հետքերի առկայությունը կարող է պայմանավորված լինել միզասեռական համակարգի խնդիրներով, իսկ կղանքում առկա արյան հետքերը վկայում են գաստրոէնտերիտի, խոցային կոլիտի և անգամ ստամոքսի խոցի կամ աղիների քաղցկեղի մասին:

Պակաս վտանգավոր չէ նաև կտրուկ սուր ցավը, որը կարող է հուշել որդանման ելունի բորբոքման, ծակող խոցի, երիկամներում քարերի առաջացման, արտարգանդային հղիության և աղիների անանցանելիության մասին:

Եթե տհաճ զգացողություններն ուղեկցվում են սրտխառնոցով, ապա խնդիրը կարող է պայմանավորված լինել լեղապարկի հետ կապված խնդիրներով, փորկապությամբ ու գրգռված աղու համախտանիշով:

Շատ վտանգավոր է ստամոքսի ցավը, որն ուղեկցվում է քաշի կորստով: Բժիշկները ենթադրում են, որ այն կարող է լինել աղիների բորբոքման, ենթաստամոքսային գեղձի բորբոքման կամ քաղցկեղի ախտանշան:

Եթե սուր ցավն ուղեկցվում է տենդով, ապա չի կարելի բացառել դիվերտիկուլիտի, որդանման ելունի բորբոքման, խոլեցիստիտի, սննդային թունավորման կամ կոնքի օրգանների վարակման վարկածը:

Բացի այդ, հարկավոր է անհապաղ դիմել բժշկին նաև այն դեպքում, երբ որովայնի երկարատև ցավն ուղեկցվում է մարսելախանգարմամբ: Առողջական լուրջ խնդիրների մասին են վկայում նաև սև կղանքը, փորափքանքը, փորկապությունը, փսխումը, մարմնի զանգվածի նվազումն ու գազերի կուտակումը, ուստի ցավի հետ մեկտեղ նման խնդիրների առկայության դեպքում հարկավոր է անհապաղ բուժզննում անցնել:

Նյութի աղբյուրը՝ actualnews.ru