Ձվարանի կիստայի մասին հուշող հիմնական ախտանշաններն ու խնդրի բուժման եղանակները

13:41 • 18.01.20

Ձվարանի կիստաները բավական տարածված են և սովորաբար անցնում են առանց բժշկական միջամտության, սակայն լինում են դեպքեր, երբ կիստան ինքնուրույն չի ներծծվում, շարունակում է աճել և սկսում է դրսևորվել տհաճ ախտանշաններով: Նման դեպքերում հարկավոր է լինում անպայման դիմել մասնագետին ու միջոցներ ձեռնարկել: Ընդ որում՝ որոշ դեպքերում արդեն լինում է վիրահատական միջամտության կարիք, քանի որ խնդիրն արդեն չափազանց բարդացած է լինում:

Բրիտանացի գինեկոլոգ Ֆևզի Շաքիրի խոսքով՝ նման ախտորոշումը շատերի մոտ խուճապ է առաջացնում, մինչդեռ իրականում այն բավական տարածված է: «Փաստացիորեն նորմալ է, որ կինն ունի ֆունկցիոնալ կիստա, որը դաշտանային ցիկլի որոշակի ժամանակահատվածում պայթում է և դուրս է թողնում ձվաբջիջը: Եթե յուրաքանչյուր կին ձվազատումից անմիջապես առաջ ուլտրաձայնային հետազոտություն անցնի, ապա կիմանա, որ կիստա ունի», - բացատրում է բժիշկը:

Սակայն չպայթելու դեպքում կիստան շարունակում է աճել ու հեղուկով լցվել: Աճող կիստան կարող է պարունակել նաև այլ տեսակի արյուն (օրինակ՝ էնդոմետրիոզի առկայության դեպքում) կամ այլ հյուսվածքներ, այդ թվում՝ անգամ մաշկ կամ մազեր:

Մասնագետի խոսքով՝ գոյություն ունի երեք ախտանշան, որոնք հուշում են ձվարանի կիստայի առկայության մասին: Դրանք են.

Ցավը. եթե կիստան չափից շատ է մեծանում, այն կարող է դառնալ կտրուկ ցավերի առաջացման պատճառ: Ցավը հատկապես ուժգին է լինում, երբ կիստան ոլորվում է, ինչի հետևանքով խանգարվում է ձվարանի արյան մատակարարումը: Նման դեպքերում հարկավոր է անհապաղ դիմել մասնագետին, քանի որ անուշադրության մատնելը կարող է վտանգավոր լինել:

Սրտխառնոցը. կիստայի առկայության դեպքում ցավը կարող է ուղեկցվել նաև սրտխառնոցով:

Հաճախակի դեֆեկացիան կամ միզազատությունը. երբ կիստան չափազանց մեծ է լինում, այն կարող է ճնշում գործադրել հարակից օրգանների վրա՝ ազդելով աղիների ու միզապարկի աշխատանքի վրա:

Վերոնշյալ ախտանշանների դեպքում հարկավոր է անհապաղ դիմել բժշկին ու միջոցներ ձեռնարկել, սակայն որոշ դեպքերում կանայք կարող են կիստայի մասին հուշող որևէ ախտանշան չնկատել: Սա է պատճառը, որ հարկավոր է նաև պարբերաբար բուժզննում անցնել, քանի որ երբեմն կիստաները հայտնաբերվում են պատահաբար հերթական ուլտրաձայնային հետազոտության ժամանակ:

Ինչ է հարկավոր անել կիստայի առկայության դեպքում

Եթե կիստայի առկայությունը պայմանավորված է դաշտանային ցիկլով, ապա որևէ միջոց ձեռնարկելու անհրաժեշտություն չկա, քանի որ կիստան ժամանակի ընթացքում կպայթի առանց միջամտության:

Որոշ դեպքերում կիստաների աճը կարող են արգելակել հակաբեղմնավորիչ հորմոնալ դեղամիջոցները, ուստի կարելի է դիմել մասնագետին և փորձել ազատվել խնդրից դեղորայքային ճանապարհով:

Եթե կիստան ինքնուրույն չի ներծծվում կամ հանդիսանում է դերմոիդային կամ էնդոմետրիոտային կիստա, որը ցավ ու այլ տհաճ զգացողություններ է առաջացնում, ապա հարկավոր է անհապաղ դիմել մասնագետին: Նման դեպքերում միակ բուժումը վիրահատականն է, ուստի հապաղել չի կարելի:

Նյութի աղբյուրը՝ medikforum.ru