Քաղցկեղի զարգացմանը նպաստող գործոններ, որոնք քչերին են հայտնի

Քաղցկեղն ամենավտանգավոր հիվանդություններից մեկն է, որը տարեկան հազարավոր մարդկանց մահվան պատճառն է դառնում, սակայն քչերին է հայտնի, որ այս վտանգավոր հիվանդության զարգացման հավանականությունը կարող են բարձրացնել առաջին հայացքից անվտանգ թվացող գործոնները, որոնց մարդիկ ոչ միշտ են ուշադրություն դարձնում:

Գերմանական Focus.de պորտալը ներկայացրել է քաղցկեղի զարգացման հավանականությունը բարձրացնող ամենաարտասովոր գործոնները:

Ինքնաթիռում պատուհանի մոտ նստելու սովորություն

Ճանապարհորդելիս շատերը գերադասում են նստել պատուհանին մոտ և ուսումնասիրել ամպերն ու հետաքրքիր տեսարանները, սակայն հաճախ ճանապարհորդելու դեպքում այս սովորությունը կարող է վտանգավոր լինել մաշկի համար: Բանն այն է, որ չնայած հատուկ պաշտպանիչ ապակիների առկայությանը, այնուամենայնիվ ուլտրամանուշակագույն ճառագայթների 47%-ը հասնում է մարդու մաշկին, ինչը կարող է դառնալ վաղաժամ ծերացման պատճառ և բարձրացնել մաշկի քաղցկեղի զարգացման հավանականությունը: Սա է պատճառը, որ պատուհանի մոտ նստելու դեպքում հարկավոր է միշտ հիշել արևապաշտպան քսուքի անհրաժեշտության մասին:

Անդորրագրերի ու կտրոնների համար օգտագործվող թղթեր

Անդորրագրերի ու կտրոնների համար կիրառվող թղթերը պարունակում են բիսֆենոլ A` նյութ, որը ԵՄ-ի կողմից դասակարգվում է որպես «առանձնահատուկ անհանգստացնող»: Բանն այն է, որ այս նյութի ազդեցության հետ են կապված մոր արգանդում երեխայի գլխուղեղի զարգացման հետ կապված խնդիրների առաջացումը, ինչպես նաև տղամարդկանց անպտղությունը, սրտի հիվանդություններն ու քաղցկեղի տարբեր տեսակները: Ամեն անգամ նման թղթերին դիպչելիս այս նյութը մաշկի միջոցով ներթափանցում է օրգանիզմ ու կուտակվում, ինչը հետագայում կարող է լուրջ խնդիրներ առաջացնել:

Տաք ըմպելիքներ

Շատերը սիրում են շատ տաք ապուրներ ուտել կամ թեյ խմել, մինչդեռ մասնագետները նախազգուշացնում են, որ 65˚C-ից բարձր ջերմաստիճանի հեղուկներ օգտագործելու դեպքում մարդը վտանգում է իր կերակրափողը, քանի որ չափազանց տաք ըմպելիք գրգռում է հյուսվածքներն ու ի վերջո հանգեցնում բջիջների վնասման, ինչն էլ կարող է դառնալ քաղցկեղի զարգացման պատճառ:

Պիկ ժամերին բաց պատուհանով մեքենա վարելու սովորություն

Դիզելային վառելիքի արտանետումները զգալիորեն բարձրացնում են թոքերի կամ միզապարկի քաղցկեղի զարգացման հավանականությունը: Ընդ որում՝ վտանգն առավել բարձր է պրոֆեսիոնալ վարորդների կամ հաճախ երթևեկողների մոտ: Սա է պատճառը, որ ինտենսիվ երթևեկության կամ խցանումների դեպքում չի կարելի բացել մեքենայի պատուհանները:

Աշխատանքից հետո գարեջուր կամ գինի խմելու սովորություն

Ալկոհոլի գործածությունը բարձրացնում է ոչ միայն լյարդի քաղցկեղի, այլև բերանի, քաղցկեղի, կոկորդի քաղցկեղի և կրծքագեղձի քաղցկեղի զարգացման հավանականությունը: Ընդ որում՝ ալկոհոլի քանակության ավելացման հետ մեկտեղ օնկոլոգիական հիվանդությունների զարգացման հավանականությունը նույնպես բարձրանում է: Մասնագետներն ընդգծում են, որ ոգելից խմիչքների գործածության «անվնաս» նվազագույն քանակություն գոյություն չունի և այն շատ վտանգավոր է ցանկացած քանակությամբ օգտագործելու դեպքում: Հատկապես բարձր է կրծքագեղձի քաղցկեղի և լյարդի քաղցկեղի զարգացման հավանականությունը:

Գիշերվա ժամերին սմարթֆոն օգտագործելու սովորություն

Հետազոտությունները ցույց են տվել, որ քաղցկեղի զարգացման բարձր հավանականության հետ է կապված նաև մելատոնինի՝ քնի հորմոնի ցածր մակարդակը, իսկ այս հորմոնի արտադրությունը խանգարվում է երբ գիշերը սենյակում լույսի աղբյուր է լինում: Մեր օրերում մութ սենյակում վառ լույսի հիմնական աղբյուրը լինում են սմարթֆոններն ու այլ գաջեթները, որոնք թույլ չեն տալիս շուտ քնել, ինչպես նաև պարբերաբար արթնացնում են ստացված հաղորդագրությունների պատճառով: Այս դեպքում քնի ռիթմերը խանգարվում են, ինչն էլ ի վերջո հանգեցնում է քնի քրոնիկ խանգարումների և մելատոնինի մակարդակի քրոնիկ նվազման, իսկ սա էլ, իր հերթին, նպաստում է քաղցկեղի զարգացմանը: