Որոնք են որդանման ելունի բորբոքման մասին հուշող հիմնական ախտանշանները

16:24 • 27.01.20

Որդանման ելունի բորբոքումն աղիների ամենատարածված հիվանդություններից է, որը զարգանում է կույր աղիքի որդանման ելունի բորբոքման հետևանքով: Այս օրգանը երկար ժամանակ համարվել է օրգանիզմին անպետք, մինչդեռ գիտնականները եկել են այն եզարհանգման, որ այն շատ կարևոր նշանակություն ունի իմունային համակարգի համար: Բանն այն է, որ որդանման ելունը պարունակում է օգտակար բակտերիաներ, որոնք ձևավորում են աղիների միկրոֆլորան, ուստի այն շատ կարևոր է ամբողջ օրգանիզմի համար:

Գերմանացի գիտնականները Focus.de պորտալին ներկայացրել են որդանման ելունի բորբոքման մասին հուշող հիմնական նախանշանները, որոնք ոչ մի դեպքում չի կարելի անտեսել: Բժիշկ Թոմաս Վիլհելմի խոսքով՝ այս հիվանդությունը ճիշտ ախտորոշելն ու բուժելն անչափ կարևոր է, քանի որ բուժման բացակայության դեպքում կարող են զարգանալ կյանքի համար վտանգավոր այնպիսի հետևանքներ, ինչպիսին են որովայնախոռոչի բորբոքումը կամ որովայնամզի թարախային բորբոքումը: Որդանման ելունի սուր բորբոքման դեպքում անհրաժեշտ բուժման բացակայության դեպքում ավելի քան 48 ժամ հետո կարող է մահվան ելք ունենալ, ուստի հարկավոր է հնարավորինս շուտ միջոցներ ձեռնարկել:

Նման խնդիրներից խուսափելու համար մասնագետները հորդորում են ավելի զգոն լինել՝ հիվանդությունը ժամանակին նկատելու և անհապաղ միջոցներ ձեռնարկելու համար: Որդանման ելունի բորբոքման մասին հուշող ախտանշանների շարքին են դասվում.

· պորտի վերին հատվածի կտրուկ, սուր ցավը, որը որոշ ժամանակ անց կենտրոնանում է որովայնի ստորին աջ հատվածում,

· սրտխառնոցը,

· տենդը,

· փսխումը,

· ախորժակի կորուստը:

«Եթե կան կասկածներ, որ խնդիրը պայմանավորված է որդանման ելունի բորբոքմամբ, ապա հարկավոր է անմիջապես դիմել բժշկին: Որդանման ելունի սուր բորբոքման դեպքում այն հարկավոր է հնարավորինս շուտ հեռացնել, այլապես օրգանի պայթելու հավանականությունը զգալիորեն կբարձրանա», - նախազգուշացնում է Թոմաս Վիլհելմը: