Որոնք են կորոնավիրուսի նոր տեսակի առաջին ախտանշաններն ու ովքեր են ռիսկային խմբում

Վերջին օրերին ամբողջ աշխարհում մարդիկ խուճապի են մատնվել սրընթաց տարածվող մահացու կորոնավիրուսի պատճառով: Հիվանդների ու զոհերի թիվն օրեցօր աճում է, իսկ վարակման դեպքեր են արձանագրվել նաև Չինաստանից դուրս, ինչը հանգեցրել է համաշխարհային խուճապի:

Ինչպես գրում է medikforum.ru կայքը, ՌԴ սպառողների իրավունքների պաշտպանության ոլորտում հսկողություն իրականացնող «Ռոսպոտրեբնադզոր» դաշնային ծառայությունը ներկայացրել է հիվանդության ախտանշաններն ու փաստեր կորոնավիրուսի մասին, որոնք թույլ կտան ժամանակին հայտնաբերել խնդիրը:

Ինչ ախտանշաններով է դրսևորվում կորոնավիրուսի նոր տեսակը

Չինաստանում կորոնավիրուսի նոր տեսակի տարածումն սկսեց 2019 թվականի դեկտեմբերին, որից հետո այն ստացավ 2019-nCoV անվանումը: Ըստ էության՝ սա վիրուսի շատ վտանգավոր շտամ է, որն ատիպիկ ախտածին ազդեցություն է ունենում:

Վարակումը տեղի է ունենում օդակաթիլային ճանապարհով, սակայն վերջերս չինացի բժիշկները հայտնել են, որ վիրուստ կարող է օրգանիզմում հայտնվել նաև վարակված ձեռքով աչքը տրորելու հետևանքով:

Կորոնավիրուսի նոր տեսակով վարակվածների մոտ նկատվում են գրիպին ու մրսածությանը բնորոշ ախտանշաններ: Դրանք են.

·         մարմնի բարձր ջերմաստիճանը (38°C և բարձր),

·         հևոցը,

·         թաց հազը,

·         հոգնածությունը:

Այս ախտանշանները գիտնականները նշել են դեռ վիրուսի տարածման առաջին օրերին, սակայն ավելի ուշ պարզ դարձավ, որ որոշ դեպքերում հիվանդությունը կարող է առհասարակ չդրսևորվել որևէ ախտանշաննով: Այլ կերպ ասած՝ որոշ դեպքերում հիվանդի ինքնազգացողությունը կարող է չվատթարանալ, իսկ որոշ դեպքերում կարող են ի հայտ գալ ծանր թոքաբորբին բնորոշ ախտանշաններ, որոնք ուղեկցվում են շնչառական անբավարարությամբ ու հանգեցնում մահվան: Առավել ծանր դեպքերում հիվանդների մոտ գրանցվում է շնչառության կանգ, որի դեպքում հարկավոր է հիվանդին անհապաղ արհեստական շնչառության սարք միացնել:

Բացի այդ, որոշ դեպքերում կորոնավիրուսի նոր տեսակով վարակվածների մոտ նկատվում են նաև աղեստամոքսային տրակտի աշխատանքի խանգարումներ ու փորլուծություն, ուստի հարկավոր է ուշադրություն դարձնել նաև նմանատիպ ախտանշաններին:

Մասնագետները գրանցել են նաև որևէ ախտանշանով չդրսևորվող վարակման դեպք. 10-ամյա մի տղայի մոտ ախտորոշվել է կորոնավիրուսի նոր տեսակ, սակայն հիվանդությունը որևէ կերպ չի դրսևորվել:

Ովքեր են ռիսկային խմբում

Չինաստանից տարածվող կորոնավիրուսի նոր տեսակը խիստ վտանգավոր է այն մարդկանց համար, որոնց իմունային համակարգը թուլացած է: Սա է պատճառը, որ առաջին հերթին ռիսկային խմբում են տարեցները և շաքարային դիաբետով ու թոքերի քրոնիկ հիվանդություններով հիվանդները:

Հիվանդությունը չունի միայն իրեն բնորոշ ախտանշաններ և իր դրսևորումներով կարող է նման լինել շնչառական համակարգի այլ հիվանդություններին, ուստի ախտորոշման համար մասնագետները հաշվի են առնում նաև համաճարակաբանական անամնեզը: Կորոնավիրուսի դեպքում շատ կարևոր են ինչպես ախտանշանները, այնպես էլ հիվանդի գնվելու վայրի, պայմանների և այլ կարևոր հանգամանքների մասին փաստերը:

Վտանգավոր հետևանքներից խուսափելու համար մասնագետները հորդորում են անմիջապես դիմել բժշկին մարմնի ջերմաստիճանի բարձրացման, փռշտոցի, հազի և շնչառության վատթարացման դեպքում: Բացի այդ, Չինաստան կամ Հարավարևելյան Ասիայի երկրներ կատարած այցելությունների դեպքում հարկավոր է անպայման տեղեկացնել այս մասին բուժող բժշկին:

Հիշեցնենք, որ 2019 թվականի դեկտեմբերի 31-ին Չինաստանի իշխանություններն Առողջապահության համաշխարհային կազմակերպությանը հայտնել էին երկրի կենտրոնական հատվածում գտնվող Ուհան քաղաքում (Հուբեյ նահանգ) թոքաբորբի անհայտ տեսակի բռնկման մասին: Մասնագետների խոսքով` հիվանդության հարուցիչ է համարվում 2019-nCoV նոր տեսակի կորոնավիուսը:

ՉԺՀ առողջապահության պետական կոմիտեի վերջին տվյալների համաձայն` Չինաստանում նոր տեսակի կորոնավիրուսով վարակվածների ընդհանուր թիվը հասել է 7711-ի, 170 մարդ մահացել է:

Չինաստանի մայրցամաքային հատվածից դուրս վարակման դեպքեր են գրանցվել Հոնկոնգում, Մակաոյում և Թայվանում, ինչպես նաև Թաիլանդում, Ճապոնիայում, Հարավային Կորեայում, ԱՄՆ-ում, Կանադայում, Վիետնամում, Սինգապուրում, Նեպալում, Ֆրանսիայում, Ավստրալիայում, Մալայզիայում, Ֆինլանդիայում:

Ինչպես ավելի վաղ հայտնել էր Tert.am-ը, Չինաստանի առաջատար վարակաբանները նախազգուշացրել են, որ համաճարակի էպիկենտրոն Ուհան քաղաքում իրավիճակն արդեն անվերահսկելի է: Նրանք կանխատեսում են, որ վատագույնը դեռ առջևում է, և չի բացառվում, որ համաճարակն իր գագաթնակետին հասնի հաջորդ ամիս:

ՉԺՀ կառավարության ներկայացուցչի խոսքով` Չինաստանում 2019-nCoV նոր կորոնավիրուսի համաճարակը կնահանջի փետրվարի կեսերին և կավարտվի մարտի վերջին: