10 ախտանշան, որոնք հուշում են լյարդի՝ տոքսիններով լի լինելու մասին և 3 միջոց այս խնդրից ազատվելու համար

18:09 • 04.02.20

Լյարդն օրգանիզմի ամենակարևոր օրգաններից մեկն է, որը պատասխանատու է մի շարք կենսական նշանակություն ունեցող գործընթացների, այդ թվում նաև օրգանիզմի դետոքսիկացիայի համար, սակայն լինում են դեպքեր, երբ օրգանն ինքն արդեն չի կարողանում մաքրվել տոքսիններից, ինչը բացասաբար է անդրադառնում ամբողջ օրգանիզմի վրա:

Բժիշկ Ուիլյամ Քոուլը հիշեցնում է, որ լյարդը շատ կարևոր օրգան է, որը մաքրում է մարմինը սննդի և շրջակա միջավայրի միջոցով օրգանիզմում հայտնված տոքսիկ նյութերից, ինչպես նաև հենց օրգանիզմում արտադրվող վնասակար միացություններից: Սակայն մասնագետը հիշեցնում է, որ ինտենսիվ աշխատանքի արդյունքում օրգանը նույնպես կարող է աղտոտվել, ինչը կհանգեցնի բավական տհաճ խնդիրների:

Նման խնդիրներից խուսափելու համար բժիշկ Քոուլը նշել է այն ախտանշանները, որոնք վկայում են, որ լյարդը լի է տոքսիններով և ունի մաքրման կարիք: Այդ ախտանշանների շարքին են դասվում.

· հաճախակի որևէ քաղցր մթերք ուտելու ցանկությունը,

· մարսողական համակարգի հետ կապված հաճախակի դարձած խնդիրները,

· ալերգիկ ռեակցիաների հաճախակի ի հայտ գալը,

· ինքնազգացողության ընդհանուր վատթարացումը,

· մաշկային բորբոքումները,

· մշտական հոգնածությունն ու մտքերի «խառնաշփոթը»,

· պարբերաբար անհանգստացնող հոդացավերը,

· նիհարելու անկարողությունը, անգամ ջանքեր գործադրելու դեպքում,

· մարմնի անսպասելի տհաճ դարձած հոտը,

· մշտական սթրեսն ու անհանգստությունը,

· հերպեսը:

Վերոնշյալ ախտանշանների առկայությունը վկայում է լյարդի՝ տոքսիններով աղտոտված լինելու մասին, ինչը նշանակում է, որ հարկավոր է անհապաղ միջոցներ ձեռնարկել: Գոյություն ունի լյարդը բնական ճանապարհով մաքրելու առնվազն երեք միջոց, որոնք են օրվա ընթացքում որոշակի ժամերին չուտելը, որոշակի մթերքի գործածությունն ու ֆիզիկական ակտիվությունը:

Սննդակարգի փոփոխություն

Պարբերաբար քաղցած մնալու դեպքում օրգանիզմում արտադրվում է մի սպիտակուց, որը խթանում է շաքարի փոխանակությունն ու նվազեցնում է լյարդում կուտակված ճարպերի քանակությունը: Կարելի է կիրառել 8:16 բանաձևը, որը ենթադրում է, որ օրվա ընթացքում սնունդ կարելի է օգտագործել միայն 8 ժամվա ընթացքում, իսկ մնացած 16 ժամվա ընթացքում սնվելն արգելվում է: Այս մեթոդը ոչ միայն կմաքրի լյարդը, այլև էներգիա կհաղորդի և կապահովի բարձր տրամադրությունը:

Ճիշտ մթերքի գործածություն

Լյարդը տոքսիններից մաքրելու համար շատ կարևոր նշանակություն ունի ակտիվ նյութափոխանակությունը, որի համար առաջին հերթին հարկավոր են առողջ աղիներ, սակայն երբ աղիներում վնասակար բակտերիաների քանակությունը գերազանցում է օգտակար բակտերիաների քանակությունը, ապա ի հայտ են գալիս բորբոքային գործընթացներ, ինչը դանդաղեցնում է նյութափոխանակության համակարգի աշխատանքը:

Աղիների միկրոֆլորան վերականգնելու և դրանով իսկ լյարդը մաքրելու համար հարկավոր է սննդակարգում ներառել այնպիսի մթերք, ինչպիսին է նուշը, արտիճուկը, ճակնդեղը, բրոկոլին, ցիտրուսային մրգերը, խմորում անցած մթերքը, կանաչ թեյը, լոբազգիները, յուղոտ ձկնատեսակները և այլն:

Ֆիզիկական ակտիվություն

Ֆիզիկական ակտիվությունն ստիպում է մարդուն ակտիվ քրտնել, իսկ առատ քրտնարտադրությունը լյարդը մաքրելու և տոքսիններն օրգանիզմից դուրս բերելու ամենահայտնի միջոցներից մեկն է: Բացի այդ, ֆիզիկական վարժություններն օգնում են ազատվել ավելորդ ճարպաշերտերից: Փորձագետների խոսքով՝ մարմնի ընդհանուր զանգվածի 3-6%-ից ազատվելը թույլ է տալիս նվազեցնել լյարդում ճարպերի քանակությունը 35-40%-ով, ինչը զգալիորեն նվազեցնում է ծանրաբեռնվածությունը: Սկզբնական շրջանում բավական կլինի պարզապես օրվա ընթացքում հնարավորինս շատ քայլելը, սակայն աստիճանաբար ֆիզիկական ակտիվությունն անհրաժեշտ է ավելացնել՝ ի վերջո հասցնելով օրական կես ժամի:

Նյութի աղբյուրը՝ medikforum.ru