Որոնք են կորոնավիրուսի նոր տեսակի մասին ամենատարածված «միֆերը»

Վերջին օրերին ամբողջ աշխարհում սրընթաց տարածվող կորոնավիրուսի նոր տեսակը համաշխարհային խուճապ է առաջացրել, ինչի հետևանքով փաստերի հետ  մեկտեղ առցանց տիրույթում տարածվել են նաև բազմաթիվ «միֆեր», որոնց շատերն են հավատում: Փորձագետները ներկայացրել են մահացու կորոնավիրուսի մասին ամենաանհավանական «միֆերը», որոնք տարածվել են մարդկանց շրջանում: Դրանցից ամենատարածվածն այն է, որ ոմանք այն անվանում էին «գենետիկ կենսաբանական զենք, որ ստեղծվել է ԱՄՆ-ի դեմ կիրառման համար», սակայն կան նաև այլ «միֆեր», որոնք ոչ պակաս անհավանական են:

Օրինակ՝ նախորդ շաբաթ համացանցում էր հայտնվել մի տեսանյութ, որում հատուկ համազգեստով ու ինքնաձիգով երեք տղամարդ պարեկային հսկողություն էին իրականացնում փողոցում: Այս տեսանյութը խուճապ առաջացրեց հասարակության շրջանում, քանի որ օգտատերերից շատերը ենթադրում էին, որ Չինաստանում սկսել են չեզոքացնել բոլոր վարակվածներին, մինչդեռ համաշխարհային հանրությանն են ներկայացնում միայն ընդունելի հրապարակումները: Այնուամենայնիվ ՉԺՀ-ի բնակիչներն անմիջապես նկատեցին, որ տեսանյութում մարդիկ խոսում են ոչ Ուհանի բարբառով, ուստի այն չի կարող նկարահանված լինել համաճարակի էպիկենտրոն համարվող Ուհան քաղաքում:

Ինչպես գրում է actualnews.org կայքը, մահացու կորոնավիրուսի մասին տարածված «միֆերի» շարքին է դասվում նաև այն պնդումը, համաձայն որի՝ Չինաստանից բերված ծանրոցները նույնպես կարող են վտանգավոր լինել: Նման սխալ տեղեկության տարածման ֆոնին ՌԴ Պետդումայի պատգամավոր Վիտալի Միլոնովն անգամ առաջարկել է սահմանափակել շփումը ՉԺՀ-ի հետ, սակայն փորձագետներն ընդգծել են, որ ծանրոցները որևէ կերպ չեն կարող դառնալ հիվանդության տարածման պատճառ, քանի որ արհեստական միջավայրում վիրուսը չափազանց անկայուն է:

Վիրուսի մասին մյուս տարածված «միֆը» դրա՝ ԱՄՆ-ում ստեղծված լինելու վերաբերյալ պնդումն էր, սակայն այս «միֆն» արդեն իսկ հերքում է այն փաստը, որ ԱՄՆ-ի քաղաքացիներին ու դիվանագետներին սկսել են տարհանել Չինաստանից միայն հունվարի վերջին, երբ համաճարակն արդեն մեծ թափ էր առել:

Անհավանական «միֆերի» շարքին էր դասվել նաև այն վարկածը, որ վիրուսը կարող է ախտահարել միայն չինացիներին: Բացի այդ, շատերը ենթադրում էին, որ ՉԺՀ ղեկավար Սի Ցզինփինը պարզապես մոլորեցրել է ԵՄ-ին ու ԱՄՆ-ին, քանի որ իրականում նման վիրուս գոյություն չունի:

Ինչպես ավելի վաղ հաղորդել էր Tert.am-ը, Առողջապահության համաշխարհային կազմակերպությունը Չինաստանում նոր կորոնավիրուսի բռնկումը միջազգային նշանակության արտակարգ իրավիճակ է ճանաչել: Վերջին տվյալների համաձայն՝ մայրցամաքային Չինաստանում վարակվածների թիվը գերազանցել է 24,3 հազարը, մահացել է 490 մարդ, ևս մեկ մարդ մահացել է Հոնկոնգում: Ավելի քան 170 վարակման դեպք է գրանցվել Չինաստանի սահմաններից դուրս, որից 1-ը` մահվան ելքով: