Որ դեպքերում է որովայնի ցավը պայմանավորված լինում խիստ վտանգավոր խանգարումներով

Որովայնի ցավը բավական տարածված խնդիր է, որը սովորաբար ասոցացվում է վատ սննդի ընդունման ու մարսելախանգարման հետ, սակայն լինում են դեպքեր, երբ այն պայմանավորված է լինում վտանգավոր հիվանդություններով, որոնց մասին մարդն անգամ գաղափար չունի: Նման դեպքերում հարկավոր է լինում անհապաղ դիմել բժշկին, քանի որ խնդին անուշադրության մատնելը կհանգեցնի դրա խորացման և կարող է լուրջ բարդություններ առաջացնել:

Health պարբերականը ներկայացրել է, թե որովայնի ցավը որ դեպքերում է խիստ վտանգավոր և երբ է ենթադրում անհապաղ բուժօգնություն

Փորլուծությամբ ու արյունահոսությամբ ուղեկցվող ցավ

Անսպասելի ի հայտ գալու դեպքում այս խնդիրը կարող է պայմանավորված լինել սննդային ծագման որևէ վտանգավոր հիվանդությամբ, ինչպիսին է աղիքային ցուպիկով կամ սալմոնելայով վարակումը: Փորլուծությամբ ու արյունահոսությամբ ուղեկցվող և պարբերաբար անհանգստացնող ինտենսիվ ցավը կարող է վկայել աղիների բորբոքային հիվանդությունների մասին: Նման դեպքերում խնդիրը կարող է պայմանավորված լինել խոցային կոլիտով կամ նմանատիպ այլ վտանգավոր հիվանդությամբ, ուստի այն ոչ մի դեպքում չի կարելի անուշադրության մատնել: Խնդրի ախտանշանների շարքին են դասվում նաև հոգնածության զգացումը, սրտխառնոցը, քաշի կորուստն ու անեմիան (սակավարյունություն), ուստի եթե ցավն ուղեկցվում է վերոնշյալ ախտանշաններով, ապա հարկավոր է անհապաղ բուժզննում անցնել:

Փսխումով ուղեկցվող և անսպասելի ի հայտ եկող ցավ

Նման ցավը սովորաբար պայմանավորված է լինում սննդային թունավորմամբ, սակայն այն կարող է հուշել նաև սուր գաստրոէնտերիտի զարգացման մասին, որը աղիների լորձաթաղանթի բորբոքումն է և ունենում է վիրուսային կամ բակտերիալ ծագում: Գաստրոէնտերիտը թունավորումից տարբերվում է նրանով, որ այս դեպքում փորլուծությունը չի ուղեկցվում արյունահոսությամբ, սակայն այն կարող է դառնալ օրգանիզմի ջրազրկման, զարկերակային ճնշման անկման, անոթազարկի թուլացման և կյանքի համար խիստ վտանգավոր հիպովոլեմիկ շոկի պատճառ:

Ավելի քան մեկ օր չմեղմվող ցավ, որը տարածվում է նաև մեջքի հատվածում

Որովայնի երկարատև ցավը, որը տարածվում է նաև մեջքի շրջանում, կարող է պայմանավորված լինել ենթաստամոքսային գեղձի սուր բորբոքումով կամ խոլեցիստիտով, որն էլ լեղապարկի բորբոքումն է: Ենթաստամոքսային գեղձի բորբոքուման մասին հուշող մյուս ախտանշաններն են որովայնի վերին հատվածի ցավը, որն ի հայտ է գալիս հիվանդության զարգացման սկզբնական փուլում, ինչպես նաև տենդը, սրտխառնոցը, սրտի զարկերի արագացումը, փորափքանքն ու ցավոտ զգացողությունները: Խոլեցիստիտի մասին են հուշում որովանի վերին աջ հատվածի կամ կենտրոնական հատվածի ցավը, որն այնուհետև տարածվում է նաև աջ ուսի կամ մեջքի հատվածում, ինչպես նաև սրտխառնոցը, ջերմության բարձրացումն ու ստամոքսի ցավը: Այս հիվանդությունները շատ վտանգավոր են, ուստի վերոնշյալ ախտանշանների առկայության դեպքում հարկավոր է անհապաղ դիմել բժշկին:

Որովայնի ստորին աջ հատվածի ցավ, որն աստիճանաբար ուժգնանում է

Նման ցավը կարող է հուշել կույր աղիքի որդանման ելունի բորբոքման մասին, իսկ սա շատ լուրջ խնդիր է: Այս դեպքում ցավը նախ ի հայտ է գալիս պորտի հատվածում, որից հետո միայն կենտրոնանում է աջ կողմում: Այն ուժգնանում է շարժվելիս խորը շնչելիս և հազալիս, ուստի նման ախտանշանի առկայության դեպքում հարկավոր է անհապաղ գնալ հիվանդանոց: Որդանման ելունի բորբոքման դեպքում անհապաղ միջոցներ չձեռնարկելը կարող է հանգեցնել լուրջ բարդությունների, այդ թվում՝ որովայնամզի թարախային բորբոքման (гнойный перитонит), որը կարող է մահվան ելք ունենալ:

Որովայնի ստորին հատվածի ցավոտ սպազմներ, որոնք մեղմվում են դեֆեկացիայից հետո

Որովայնի ցավի այս տեսակը կարող է պայմանավորված լինել գրգռված աղու համախտանիշով: Այս դեպքում խնդիրը հաճախ ուղեկցվում է փորափքանփով, ինչպես նաև պարբերաբար ի հայտ եկող փորկապությամբ ու փորլուծությամբ: Ընդ որում՝ ախտանշանները կարող են որոշ ժամանակով անհետանալ, այնուհետև նորից հայտ գալ:

Կոնքի մի կողմի կտրուկ սուր ցավ, որն ուղեկցվում է որովայնի ստորին հատվածի բութ ցավով

Նման ցավը վկայում է ձվարանի կիստայի պատռվելու մասին: Սա ոչ միշտ է համարվում վտանգավոր խնդիր, սակայն եթե ցավը չափազանց ուժգին է և ուղեկցվում է տենդով, փսխումով, սառը քրտինքով, արագացած շնչառությամբ ու գլխապտույտով, ապա հարկավոր է դիմել բժշկին կյանքի համար վտանգավոր խանգարումները բացառելու համար:

Նյութի աղբյուրը՝ medikforum.ru