Վտանգավոր ինչ բարդություններ կարող են զարգանալ զարկերակային գերճնշման հետևանքով և ինչպես կարելի է խուսափել նման խնդիրներից

Զարկերակային գերճնշումը շատ վտանգավոր խնդիր է, որը կարող է լուրջ բարդություններ առաջացնել և դառնալ անգամ մահվան պատճառ: Այս հիվանդության դեպքում հաճախ միայն դեղորայքի ընդունումը բավարար չի լինում զարկերակային ճնշման ցուցանիշները վերահսկողության տակ պահելու համար, ուստի մարդիկ ստիպված են լինում ձեռնարկել նաև այլ միջոցներ:

Մասնագետների խոսքով՝ այս հիվանդության վտանգը մարդիկ հաճախ են թերագնահատում: Վիճակագրությունը ցույց է տալիս, որ միայն Եվրոպայում տարեկան 2,2 միլիոն կին և 1,8 միլիոն տղամարդ է մահանում զարկերակային բարձր ճնշման առաջացրած բարդությունների հետևանքով: Հատկապես հաճախ են լինում գլխուղեղի կաթվածի և սրտամկանի ինֆարկտի դեպքերը: Ընդ որում՝ գերմանացի սրտաբան Մարտին Հալլեի խոսքով՝ գլխուղեղի կաթվածների և սրտամկանի ինֆարկտների շուրջ 50%-ից կարելի է խուսափել՝ ժամանակին զարկերակային գերճնշումն ախտորոշելով և դրա դեմ միջոցներ ձեռնարկելով:

Հարկ է հիշել, որ զարկերակային ճնշման անգամ չնչին բարձրացումն արդեն իսկ վնասում է անոթները: Ընդամենը 10-20 մմ/սս-ով բարձրանալու դեպքում էլ արյան գործադրած ճնշումն անոթների պատերին վնասում է դրանք՝ դառնալով վտանգավոր սրտանոթային հիվանդությունների զարգացման պատճառ: Մասնագետների խոսքով՝ անոթները չեն վնասվում միայն 120/80 մմ/սս ցուցանիշի դեպքում, ուստի հարկավոր է հետևել ճնշման ցուցանիշներին ու պահել դրանք ներկայացված նորմայի սահմաններում: «Արյան ճնշման 160 և 120 ցուցանիշների միջև տարբերությունն ահռելի է և հսկայական ծանրաբեռնվածություն է ստեղծում սրտամկանի համար», - ընդգծում է սրտաբանը՝ նշելով, որ զարկերակային բարձր ճնշումը հատկապես վնասակար է գլխուղեղի, սրտամկանի և երիկամների համար: Բանն այն է, որ անոթը կարող է պատռվել ինչպես գլխուղեղում (գլխուղեղի կաթված) կամ սրտամկանում (սրտամկանի ինֆարկտ), այնպես էլ երիկամներում (երիկամային անբավարարություն), իսկ նման խնդիրները կարող են մահվան ելք ունենալ:

Այսպիսով՝ զարկերակային գերճնշումը կարող է շատ վտանգավոր լինել, սակայն ճիշտ միջոցների ձեռնարկումը կօգնի պահել ճնշման ցուցանիշները նորմայի սահմաններում: Այս խնդրի զարգացման հիմնական պատճառներն են ավելորդ քաշը, ֆիզիկական ակտիվության պակասն ու սխալ սննդակարգը, ինչը ենթադրում է, որ այս գործոններին ուշադրություն դարձնելը կօգնի խուսափել բարդություններից:

Ֆիզիկական ակտիվություն

Այս հիվանդության կանխարգելման հարցում ֆիզիկական ակտիվությունը կարող է որոշիչ նշանակություն ունենալ: Մասնագետի խոսքով՝ օրական ընդամենը 15 րոպե տևողությամբ զբոսանքն անգամ օգնում է նվազեցնել ճնշման ցուցանիշները 5-8 նիշով:

Քաշի նվազեցում

Ոչ պակաս կարևոր է նաև մարմնի զանգվածը: 10 կգ ավելորդ քաշից ազատվելն օգնում է նվազեցնել արյան ճնշման ցուցանիշները 5-10 նիշով:

Սննդակարգի փոփոխություն

Առողջ սննդակարգն առհասարակ շատ կարևոր է առողջության համար, սակայն այս գործոնն առանձնահատուկ նշանակություն ունի զարկերակային գերճնշման հարցում: Այս հիվանդության դեպքում հարկավոր է սննդակարգում ներառել հնարավորինս շատ ու բազմատեսակ բանջարեղեն և խուսափել այնպիսի վնասակար մթերքից, ինչպիսին են հացը, երշիկեղենն ու պանիրը:

Նյութի աղբյուրը՝ focus.de