Որ ախտանշաններն են հուշում լյարդի աշխատանքի խանգարումների մասին

Լյարդը մարդու օրգանիզմի կարևորագույն օրգաններից մեկն է, որի աշխատանքի խանգարումը լուրջ վնաս է հասցնում ամբողջ օրգանիզմին: Այս օրգանի վիճակի վրա բացասաբար կարող են անդրադառնալ ինչպես սխալ սննդակարգը, այնպես էլ վատ սովորությունները, սակայն խնդիրն այն է, որ մարդիկ ոչ միշտ են ժամանակին նկատում վտանգավոր հիվանդությունները: Լյարդի հետ կապված խնդիրները հնարավորինս շուտ հայտնաբերելու համար MedikForum.ru կայքը ներկայացրել է այն հիմնական ախտանշանները, որոնց միջոցով օրգանիզմը հուշում է խանգարումների մասին:

Ճակատին ի հայտ եկած կնճիռներ

Գրեթե ցանկացած խանգարում առաջին հերթին արտացոլվում է մարդու դեմքին և լյարդի հետ կապված խնդիրները նույնպես բացառություն չեն: Ճակատին ի հայտ եկած կնճիռները որպես կանոն ասոցացվում են օրգանիզմի բնական ծերացման գործընթացի հետ, սակայն որոշ դեպքերում դրանք վկայում են առողջական խնդիրների մասին: Լյարդի հետ կապված խնդիրների դեպքում սովորաբար ի հայտ են գալիս ուղղահայաց կնճիռներ հոնքերի միջև: Նման խորը կնճիռները հուշում են լյարդի աշխատանքի լուրջ դիսֆունկցիայի մասին, ուստի դրանք չի կարելի անտեսել:

Դեմքին ի հյատ եկած պիգմենտային հետքեր

Այտերին, ճակատին կամ քթին ի հայտ եկած պիգմենտային հետքերը նույնպես կարող են հուշել լյարդի հետ կապված խնդիրների մասին: Սա պայմանավորված է նրանով, որ լյարդը մասնակցում է կենսաքիմիական բազում գործընթացներին, որոնց խանգարման դեպքում խանգարվում է նաև մելանին պիգմենտի փոխանակությունը: Հիվանդության մասին կարող է հուշել մաշկի սխալ պիգմենտացիան: Այս դեպքում պիգմենտային հետքերն առավել հաճախ ի հայտ են գալիս ճակատին ու քունքերի հատվածում և ունենում են շագանակագույն կամ կանաչավուն երանգ: Տարիքային պիգմենտացիան իր հերթին դրսևորվում է անկանոն տեղակայված մուգ հետքերի տեսքով: Ընդ որում՝ լյարդի խնդիրներով պայմանավորված բծերի դեպքում գունաբացող կոսմետիկ միջոցները բացարձակապես անարդյունավետ են լինում:

Մաշկի յուղոտություն

Լյարդն օրգանիզմի զտիչն է, որը վնասազերծում ու դուրս է բերում բոլոր վտանգավոր նյութերը, սակայն երբեմն այն չի կարողանում մաքրել օրգանիզմը մեծ քանակությամբ ճարպերից, ինչի հետևանքով դրանք կուտակվում են ճարպագեղձերի ծորաններում և դարձնում մաշկն ավելի յուղոտ: Յուղոտությունը նկատվում է ճակատի և քթի հատվածում: Բացի այդ, կարող են ի հայտ գալ նաև բշտիկներ, կորյակներ ու սև կետեր:

Մազերի ճերմակում ու ճաղատացում

Լյարդի սխալ աշխատանքի դեպքում խանգարվում է սննդարար նյութերի յուրացման գործընթացը, ինչը բացասաբար է անդրադառնում մազերի աճի վրա: Սա կարող է հանգեցնել վաղաժամ ճերմակման ու ճաղատացման: Ընդ որում՝ հատկապես վտանգավոր է, երբ փոփոխություններն առաջին հերթին նկատվում են մազածածկույթի մուգ հատվածներում:

Աչքերում նկատվող փոփոխություններ ու լորձաթաղանթների բորբոքումներ

Լյարդի վատ աշխատանքն իր ազդեցությունն է ունենում նաև աչքերի վիճակի վրա: Խանգարումների դեպքում աչքերի լորձաթացանթներում ու մաշկի վերջին շերտերում կարող է բիլիռուբին կուտակվել, ինչի հետևանքով դրանք կարող են դեղնավուն երանգ ստանալ: Հիվանդությունն անտեսելու դեպքում փոփոխություններ են ի հայտ գալիս նաև աչքերի այլ հատվածներում. բիբերը սպիտակում են, ծիածանաթաղանթը խամրում է, իսկ աչքերի տակի մաշկը ստանում է դեղնավուն երանգ: Բացի այդ, փոփոխվում են նաև լորձաթաղանթները. խնդրին բնորոշ են չորությունը, լեզվի ու քիմքի գույնի փոփոխությունը, լնդերի արյունահոսությունն ու այտուցները:

Կղանքի չափազանց տհաճ հոտ

Լյարդի հիվանդությունների դեպքում փոփոխվում է նաև կղանքը: Եթե այն ունենում է չափազանց տհաճ հոտ, նկատվում են կազմության կամ գույնի փոփոխություններ, ապա հարկավոր է անհապաղ բուժզննում անցնել:

Մասնագետները նախազգուշացնում են, որ լյարդի հիվանդությունները հաճախ զարգանում են առանց որևէ ախտանշանի, քանի որ օրգանը չունի նյարդային վերջավորություններ և  ցավոտ զգացողություններ չեն առաջանում: Սա է պատճառը, որ հարկավոր է շատ զգոն լինել վերոնշյալ ախտանշանները ժամանակին նկատելու և բուժումն սկսելու համար: Բացի այդ, հարկավոր է նաև պարբերաբար բուժզննում անցնել, ինչը կօգնի կանխել խնդիրների զարգացումը կամ հայտնաբերել հիվանդությունը վաղ փուլերում: