Ինչ վտանգավոր հիվանդություններ կարող են առաջանալ գրիպի հետևանքով

13:51 • 17.02.20

Գրիպը շատ վտանգավոր վիրուսային հիվանդություն է, որը կարող է լուրջ բարդությունների պատճառ դառնալ, սակայն մարդիկ հազվադեպ են դրան պատշաճ ուշադրություն դարձնում, ինչն էլ հանգեցնում է լուրջ խնդրների: Steady Health կայքը ներկայացրել է ամենավտանգավոր հիվանդությունները, որոնք կարող են առաջանալ գրիպի հետևանքով:

Սրտամկանի բորբոքում (միոկարտիտ)

Նման խնդիր առաջանում է, եթե գրիպի վիրուսը հայտվում է այս կենսական նշանակություն ունեցող օրգանում: Հիվանդությունը կարող է դրսևորվել այնպիսի ախտանշաններով, ինչպիսին են կրծքավանդակի ցավը, ձեռքերի ու ոտքերի սառնությունը, շնչառության ու սրտի զարկերի արագացումը, ոտքերի այտուցները, հոգնածությունն ու բարձր ջերմությունը: Այս խնդրի դեպքում ոմանք շատ արագ վերանագնվում են առանց որևէ խնդրի, մինչդեռ լինում են դեպքեր, երբ հիվանդի մոտ զարգանում է սրտային անբավարարություն:

Գիյեն-Բարեի համախտանիշ

Սա աուտոիմունային նյարդաբանական խանգարում է, որն առավել հաճախ զարգանում է որևէ ինֆեկցիոն հիվանդության բուժումից հետո: Խնդիրը դրսևորվում է այնպիսի ախտանշաններով, ինչպիսին են մկանային թուլությունը, տեսողության վատթարացումը, հավասարակշռության խանգարումը, սրտի ռիթմի փոփոխությունն ու զարկերակային ճնշման ցուցանիշների փոփոխությունը:

Նարկոլեպսիա

Նարկոլեպսիան նյարդաբանական հիվանդություն է, որը դրսևորվում է անբնական քնկոտությամբ: Այս խանգարման հետևանքով մարդիկ կարող են անսպասելիորեն քնել անգամ ամենօրյա գործերն անելու ընթացքում:

Գլխուղեղի բորբոքում (էնցեֆալիտ)

Այս հիվանդությունը սովորաբար վիրուսային բնույթ է կրում և կարող է առաջանալ նաև գրիպի վիրուսի հետևանքվ: Այն դրսևորվում է մտքերի «խառնաշփոթով» դյուրագրգիռությամբ, հավասարակշռության խանգարումներով ու լույսի նկատմամբ զգայունությամբ:

Թոքաբորբ

Թոքաբորբը կարող է պայմանավորված լինել ոչ միայն սնկերով ու բակտերիաներով, այլև վիրուսներով: Առհասարակ, շնչառական համակարգի ցանկացած հիվանդություն սխալ բուժման դեպքում կարող է վերածվել թոքաբորբի, այդ թվում նաև գրիպը: Այս խնդիրը կարող է բավական վտանգավոր լինել, քանի որ դրա ախտանշանները կարող են չտարբերվել գրիպի ախտանշաններից: Այն նույնպես դրսևորվում է հազով, տենդով ու դողով, ուստի մարդիկ ոչ միշտ են ժամանակին հայտնաբերում խնդիրը: Մասնագետների խոսքով՝ թոքաբորբը գրիպից կամ մրսածությունից տարբերվում է շնչառական խնդիրներով ու կրծքավանդակի ցավով, ուստի նման խնդիրների դեպքում հարկավոր է անհապաղ դիմել բժշկին:

Հարկ է հիշել, որ գրիպը շատ վտանգավոր հիվանդություն է, ուստի դրա ախտանշանների կամ առհասարակ կասկածների առկայության դեպքում հարկավոր է դիմել մասնագետին ու հստակ ախտորոշել խնդիրը: Ճիշտ բուժումը կօգնի ազատվել տհաճ ախտանշաններից ու նվազեցնել հնարավոր բարդությունների առաջացման հավանականությունը, մինչդեռ ինքնաբուժությունը կարող է էլ ավելի վատթարացնել հիվանդի վիճակը՝ հանգեցնելով մահացու բարդությունների: