Առողջական ինչ խնդիրների մասին կարող է հուշել առատ քրտնարտադրությունը

11:44 • 18.02.20

Առատ քրտնարտադրությունը բնական երևույթ է տարվա շոգ եղանակներին, սակայն լինում են դեպքեր, երբ մարդը քրտնում է անգամ բավական ցուրտ եղանակին կամ քնած ժամանակ: Նման դեպքերում գիշերային առատ քրտնարտադրությունը կարող է կրել ախտաբանական բնույթ, ուստի խնդիրներից խուսափելու համար հարկավոր է ժամանակին ախտորոշել խնդիրն ու միջոցներ ձեռնարկել դրանից ազատվելու համար:

Հիվանդություններով պայմանավորված առատ քրտնարտադրությունը կարող է ուղեկցվել այնպիսի խնդիրներով, ինչպիսին են ցանը, տենդն ու այլ բացասական գործոնները: Եթե առատ քրտնարտադրությունը նկատվում է 2-3 ամիս շարունակ և առավել հաճախ անհանգստացնում է քնած ժամանակ (անկախ սենյակի ջերմաստիճանից), ապա հարկավոր է բուժզննում անցնել, քանի որ խնդիրը կարող է պայմանավորված լինել տարբեր պատճառներով:

Առավել հաճախ հանդիպող պատճառը հորմոնալ խանգարումներն են, որոնք սովորաբար ախտորոշվում են երիտասարդ կանանց մոտ: Առատ քրտնարտադրության պատճառ կարող է դառնալ նաև դաշտանադադարի շրջանում էստրոգենի մակարդակի նվազումը, ուստի հարկավոր է ուշադիր լինել նաև այս հորմոնի մակարդակի տատանումներին:

Առատ քրտնարտադրություն կարող է նկատվել նաև ջերմաստիճանի կտրուկ նվազման դեպքում: Ընդ որում՝ այս դեպքում պատճառը կարող է լինել օրգանիզմում հայտնված վարակը, ինչը բավական վտանգավոր է:

Բացի այդ, նման ախտանշանով կարող են դրսևորվել նաև վեգետաանոթային խնդիրները, սրտի և անոթների հիվանդությունները, վիրուսային բնույթի հիվանդություններն ու անգամ սեռական ճանապարհով փոխանցվող հիվանդությունները: Եթե քրտինքը կպչուն է, ապա հարկավոր է խորհրդակցել սրտաբանի հետ, քանի որ նման դեպքերում խնդիրը կարող է պայմանավորված լինել սրտի հիվանդություններով, այդ թվում նաև առիթմիայով: Եթե քրտինքը չունի որևէ հոտ, ապա առատ քրտնարտադրությունը կարող է լինել հոգեսոմատիկ խնդիրների ախտանշան:

Նյութի աղբյուրը՝ actualnews.org