Ականջի ցավ և վերքերի դանդաղ ապաքինում. որոնք են կոկորդի քաղցկեղի մասին նախազգուշացնող հիմնական ախտանշանները

18:34 • 20.02.20

Կոկորդի քաղցկեղը հիվանդություն է, որը դրսևորվում է կոկորդում և ձայնալարերի ու նշագեղձերի հատվածում չարորակ ուռուցքների առաջացմամբ: Քաղցկեղի այս տեսակի ախտանշաններին քչերն են ծանոթ, ուստի Express պարբերականը ներկայացրել է դրանցից ամենատարածվածները, որոնք ոչ մի դեպքում չի կարելի անուշադրության մատնել:

Բրիտանացի գիտնականների խոսքով՝ այս հիվանդությունը զարգանում է մարմնի այդ հատվածի բջիջներում զարգացող գենետիկ մուտացիաների հետևանքով: Չարորակացման այս գործընթացն ուղեկցվում է որոշ ախտանշաններով, որոնք հաճախ վերագրվում են առողջական այլ խնդիրներին, սակայն մասնագետները հորդորում են ավելի զգոն լինել և նման տհաճ դրսևորումների առկայության դեպքում անպայման բուժզննում անցնել:

Կոկորդի քաղցկեղի զարգացման մասին հուշող ախտանշանների շարքին են դասվում.

· հազը,

· ձայնի փոփոխությունը (խռպոտություն կամ ոչ հստակ խոսք),

· կոկորդում օտար մարմնի առկայության զգացողությունը,

· կլման ակտի հետ կապված խնդիրները,

· վերքերի դանդաղ ապաքինումը,

· քաշի անբացատրելի կորուստը,

· պարանոցի ավշային հանգույցների այտուցները:

Այս ախտանշանները կարող են պայմանավորված լինել նման վտանգավոր խանգարմամբ, ուստի դրանք անտեսելը կարող է ճակատագրական լինել, սակայն դրանք քաղցկեղի այս տեսակի մասին հուշող միակ ախտանշանները չեն: Որոշ դեպքերում այն ուղեկցվում է բավական արտասովոր նախանշանով՝ ականջի ցավով, որը ոչ միշտ է ասոցացվում կոկորդի հետ կապված խնդիրների հետ:

«Հասուն մարդը ավելի քան երկու շաբաթ անհանգստացնող ականջի անբացատրելի ցավի դեպքում պետք է անպայման բուժզննում անցնի: Կոկորդի ետին հատվածի քաղցկեղը կարող է թաքնված լինել քիմքի, նշագեղձերի կամ լեզվի հետևում, և այն կարող են չնկատել հասարակ բուժզննման ժամանակ», - նախազգուշացնում են մասնագետները:

Նրանց խոսքով՝ միջին ականջի խոռոչը կապված է քթըմպանի հետ, և կոկորդի ցավը մարդիկ հաճախ դիտարկում են որպես ականջի ցավ: Սա է պատճառը, որ մասնագետները հորդորում են երբեք չանտեսել ականջի ցավը, քանի որ այն կարող է հուշել կոկորդում ընթացող օնկոլոգիական գործընթացի մասին:

Գիտնականներն ընդգծում են, որ քաղցկեղով պայմանավորված լինելու դեպքում ականջի ցավն ունենում է որոշակի առանձնահատկություններ, որոնք էլ հուշում են լուրջ խնդրի առկայության մասին: Նման դեպքերում.

· լսողության վատթարանում է,

· ականջի ցավն աստիճանաբար սկսում է կրել մշտական բնույթ,

· մեծ մասամբ ցավը տարածվում է միայն մի ականջի հատվածում, սակայն կարող է ախտահարել նաև երկրորդը,

· տհաճ զգացողությունները կրում են մշտական բնույթ կամ ի հայտ են գալիս պարբերաբար,

· ցավը լինում է բութ, սուր կամ այրող:

Այս հիվանդությունը դասվում է այն խնդիրների շարքին, որոնց բուժման արդյունավետությունը կախված է լինում դրա վաղ ախտորոշումից, ուստի հարկավոր է շատ զգոն լինել ախտանշանները հնարավորինս շուտ հայտնաբերելու և բուժումը ժամանակին սկսելու համար: Բացի այդ, դրա զարգացման հավանականությունը նվազեցնելու համար հարկավոր է խուսափել դրա զարգացմանը նպաստող գործոններից, որոնց շարքին են դասվում ծխախոտի գործածությունը, ալկոհոլի չարաշահումը, մարդու պապիլոմավիրուսի առկայությունը, քիչ քանակությամբ մրգերի ու բանջարեղենի գործածությունը և ռեֆլյուքսային հիվանդությունը: