Ամենաարտասովոր ու հազվադեպ հանդիպող հիվանդությունները, որոնց մասին շատ քչերը գիտեն

Ցանկացած հիվանդություն էլ տհաճ «անակնկալ» է դառնում հիվանդի համար, սակայն կան այնպիսինները, որոնք չափազանց արտասովոր են ու հազվադեպ հանդիպող, ուստի դրանց ախտորոշումը կարող է չափազանց շոկային լինել: Մասնագետները ներկայացրել են նման հիվանդություններից հինգն ու նշել դրանց հիմնական դրսևորումները:

Բժիշկների խոսքով՝ պարբերաբար աշխարհում ի հայտ են գալիս նոր ու վտանգավոր հիվանդություններ, որոնք կարճ ժամանակահատվածում դառնում են խուճապի պատճառ, սակայն դրանց հետ մեկտեղ կան նաև մի շարք տարօրինակ հիվանդություններ, որոնք չեն առաջացնում նման անհանգստություն, մինչդեռ նույնքան վտանգավոր են և մահաբեր:

Նման հիվանդությունների շարքին է դասվում Կոտարի համախտանիշը, որի դեպքում հիվանդը կարծում է, որ արդեն մահացել է և կորցնում է մարմնի մասերը կամ մարմինն սկսել է փտել: Նման վախերի պատճառով հիվանդները հաճախ հրաժարվում են սննդից կամ լոգանք չեն ընդունում, քանի որ կարծում են, որ չունեն մարսողական համակարգ, իսկ ջուրը վտանգավոր կլինի իրենց մարմնի փխրուն մասերի համար: Գիտնականների կարծիքով՝ նմանատիպ զառանցանքը պայմանավորված է գլխուղեղի՝ հույզերի տարբերակման համար պատասխանատու հատվածում տեղի ունեցած խանգարումով, ինչը հանգեցնում է մեկուսացման:

Խիստ արտասովոր ու հազվադեպ հանդիպող հիվանդություններից է նաև օտար առոգանության համախտանիշը, որի դեպքում մարդն իր մայրելի լեզվով սկսում է խոսել օտար առոգանությամբ: Աշխարհում գրանցվել է այս հիվանդության ընդամենը 60 դեպք: Հավանական է, որ խնդիրը պայմանավորված է լինում կաթվածով կամ գանգուղեղային լուրջ վնասվածքով:

Ակվագեն եղնջացանը նույնպես շատ հազվադեպ հանդիպող խնդիր է, որի դեպքում ջրի հետ անգամ չնչին շփումը կարող է դառնալ սաստիկ ալերգիկ ռեակցիայի պատճառ: Ամբողջ աշխարհում այս հիվանդությունն ախտորոշվել է ընդամենը 30 անգամ և առավել հաճախ կանանց մոտ: Գիտնականները դեռ չեն պարզել հիվանդության զարգացման պատճառներն ու բուժման միջոցները, ուստի հիվանդները պայքարում են դրա դեմ սեփական ուժերով՝ մարմինը մեծ քանակությամբ քսուքներով պատելով:

Շատ վտանգավոր է նաև պորֆիրիան՝ խիստ հազավադեպ հանդիպող գենետիկ հիվանդությունը, որի դեպքում հարկավոր է անհապաղ բժշկական միջամտություն: Այս հիվանդության դեպքում օրգանիզմը չի արտադրում այն սպիտակուցը, որն օգնում է բջիջներին տեղափոխել թթվածին, ինչի հետևանքով պորֆիրինները կուտակվում են լյարդում և տոքսիկ ազդեցություն են ունենում օրգանիզմի վրա և փոխում են արտաթորանքի գունավորումը՝ մեզին ու կղանքին տալով մանուշակագույն երանգ:

Այս հիվանդությունների շարքին է դասվում նաև պիկացիզմը կամ պարորեքսիան, որը սննդային խանգարում է և դրսևորվում է սննդի համար ոչ պիտանի իրեր ուտելու անհագ ցանկությամբ: Այս հիվանդության դեպքում մարդը կարող է ուտել տարբեր իրեր, այդ թվում նաև ներկեր, կավ, կավիճ, օճառ, հող, քար, ապակի, թուղթ, սառույց և այլն: Ընդ որում՝ հիվանդության ախտանշաններն առավել հաճախ նկատվում են հղի կանանց ու երեխաների մոտ:

Նյութի աղբյուրը՝ actualnews.org