Ուռուցքաբանը հերքել է քաղցկեղի մասին ամենատարածված «միֆերը»

13:45 • 28.02.20

Քաղցկեղն ամենավտանգավոր հիվանդություններից մեկն է, որը կարող է ախտահարել օրգանիզմի ցանկացած հյուսվածք: Այս հիվանդությունը տարեկան հազարավոր մարդկանց մահվան պատճառ է դառնում, ուստի զարմանալի չէ, որ մարդիկ խուճապի են մատնվում նման ախտորոշման մասին լսելիս: Միևնույն ժամանակ գոյություն ունեն այս հիվանդության մասին բազմաթիվ տարածված «միֆեր», որոնց մարդիկ շարունակում են հավատալ և ինչն էլ ավելի է բարձրացնում խուճապի մակարդակը:

Ուռուցքաբան-արյունաբան Միխայիլ Լասկովն անդրադարձել է այս խնդրին և հերքել օնկոլոգիական հիվանդությունների մասին ամենատարածված «միֆերը»: Մասնագետի խոսքով՝ ամենատարածված թյուր կարծիքներից մեկն այն է, որ առողջ կենսակերպը քաղցկեղից պաշտպանված լինելու երաշխիքն է, մինչդեռ իրականում այս պնդումը չի համապատասխանում իրականությանը, քանի որ քաղցկեղը կարող է փոխանցվել նաև ժառանգաբար: Միևնույն ժամանակ մասնագետը նախազգուշացնում է, առողջության մասին հոգ տանելը շատ կարևոր է, այլապես քաղցկեղի զարգացման պատճառ կարող է դառնալ սեփական օրգանիզմն անուշադրության մատնելը:

Շատերը ենթադրում են, որ օնկոլոգիական հիվանդությունները կարելի է ախտորոշել միայն մեզի և արյան անալիզների միջոցով, մինչդեռ սա նույնպես չի համապատասխանում իրականությանը: Որոշ դեպքերում քաղցկեղը հնարավոր է լինում հայտնաբերել միայն այլ անալիզների միջոցով: Օրինակ՝ ՊԱՊ-թեստը թույլ է տալիս հայտնաբերել արգանդի վզիկի քաղցկեղը, կղանքի անալիզը, կոլոնոսկոպիկ ու սիգմոսկոպիկ հետազոտությունները կիրառվում են աղիների ախտահարումների հայտնաբերման համար և այլն:

Մյուս տարածված «միֆը» քաղցկեղի տարածվածության մասին վարկածն է: Շատերը կարծում են, որ վերջին տարիներին այս հիվանդության ախտորոշման դեպքերն ավելի ու ավելի հաճախ են գրանցվում, մինչդեռ Միխայիլ Լասկովը նշում է, որ մարդիկ քաղցկեղով միշտ են հիվանդացել և այս հիվանդության զարգացումը որևէ կապ չունի տեխնիկական զարգացման ու նոր տեխնոլոգիաների հետ:

Նյութի աղբյուրը՝ actualnews.org