4 վտանգավոր հիվանդություն, որոնք կարող են փոխանցվել շներից մարդուն

17:23 • 02.03.20

Կենդանիների հետ շփումը շատ կարևոր է մարդու համար, քանի որ գիտականորեն ապացուցված է, որ կենդանիներն օգնում են պայաքարել տարբեր հիվանդությունների դեմ և հիանալի ընկեր են դառնում մարդու համար: Շներն ամենատարածված ընտանի կենդանիներից են, որոնք ընտելացվել են դեռ հազարամյակներ առաջ: Այս կենդանիները մարդկանց ամենահավատարիմ ընկերներն են, որոնք դառնում են ընտանիքի անդամ, սակայն անգամ լավագույն խնամքը երբեմն չի պաշտպանում մեր չորքոտանի ընկերներին տարբեր հիվանդություններից:

Շներին բնորոշ հիվանդությունների մեծ մասը վտանգավոր չեն ոչ միայն մարդու, այլև ընտանի այլ կենդանիների համար, ուստի նման դեպքերում հարկավոր է կենտրոնանալ կենդանու բուժման վրա և չմտածել վարակման հավանականության մասին: Սակայն կան նաև այնպիսի հիվանդություններ, որոնք կարող են լուրջ խնդիրներ առաջացնել և անգամ փոխանցվել մարդուն: Մասնագետները ներկայացրել են դրանցից ամեմավտանգավորները:

Ճիճվակրություն (հելմինթոզ)

Շներից մարդուն փոխանցվող ամենատհաճ ու վտանգավոր խնդիրներից է ճիճվակրությունը, որի ժամանակ մակաբույծները «բնակություն են հաստատում» աղեստամոքսային տրակտում: Այս մակաբույծները հանգեցնում են այնպիսի խնդիրների, ինչպիսին են.

· սննդամթերքի մեջ պարունակվող օգտակար նյութերի կլանման խանգարումը,

· մկանային զանգվածի կորուստը,

· սրտխառնոցը, թուլությունն ու գլխապտույտը:

Այս մակաբույծները բնության մեջ տարածվում են կենդանու կղանքի միջոցով, իսկ քանի որ շները մաքրասեր կենդանիներ են և միշտ մաքրում են իրենց մորթին լիզելով, ապա դրանց ձվերը կարող են հայտնվել կենդանու բերանում և փոխանցվել մարդուն: Սա է պատճառը, որ մասնագետները խորհուրդ են տալիս թույլ չտալ կենդանուն լիզել մարդու դեմքը և լվանալ ձեռքերը շան հետ շփումից հետո: Հարկ է հիշել, որ մակաբույծների ոչնչացման համար կիրառվում են տոքսիկ վտանգավոր միջոցներ, որոնք խիստ բացասաբար են անդրադառնում իմունային համակարգի և կարևորագույն օրգանների վրա:

Քոս

Քոսը մակաբույծներով պայմանավորված հիվանդություն է, որի հարուցիչը քոսի տիզն է: Հիվանդությունը ինչպես մարդկանց, այնպես էլ կենդանիների մոտ դրսևորվում է սաստիկ քորով, որի ֆոնին տզի ձվադրման հատվածում առաջացած շատ տհաճ բշտիկներն անկարևոր խնդիր են թվում: Բուժումն իրականացվում է հատուկ դեղամիջոցներով, որոնց ընտրությունը բավական բարդ է լինում, քանի որ հարուցիչները լինում են մի քանի տեսակի: Մարդը կարող է վարակվել վարակված կենդանու հետ սերտ շփման դեպքում, անգամ եթե որևէ մաշկային վնասվածք չունի:

Դերմատոմիկոզ

Դերմատոմիկոզը կամ խուզող որքինը մաշկային հիվանդություն է, որը շատերի համար սարսափելի խնդիր է: Հիվանդությունն իսկապես բավական ծանր է: Այն էպիդերմիսի խորը ախտահարում է, որից ազատվելու համար հարկավոր է հատուկ թերապիա, որը ներառում է քսուքների, վիտամինների և մաշկի վերականգնմանը նպաստող դեղամիջոցների կիրառում:

Այս խանգարումը մարդկանց մոտ դրսևորվում է քորով և կարմիր կլոր բծերի առաջացմամբ, մինչդեռ շները նաև կորցնում են մազածածկույթի որոշ մասը: Այս հիվանդությամբ վարակումը կարող է տեղի ունենալ հիվանդ շանը շոյելու դեպքում, եթե նրա մաշկին կան անգամ չնչին վնասվածքներ: Այնուամենայնիվ դերմատոմիկոզը հեշտությամբ բուժվում է, ուստի պետք չէ խուճապի մատնվել:

Կատաղություն

Սա վիրուսային հիվանդություն է, որը հանգեցնում է մարդկանց և այլ կաթնասունների գլխուղեղի բորբոքման: Ի տարբերություն վերոնշյալ հիվանդություների՝ կենդանիների դեպքում կատաղությունը չի բուժվում և կենտրոնական ու ծայրամասային նյարդային համակարգերի ախտահարումը մահվան ելք է ունենում: Մարդկանց դեպքում վարակվածներից միայն հատուկենտ անձանց է հաջողվում փրկել: Կատաղությունը փոխանցվում է արյան միջոցով, սակայն որոշ գիտնականներ կարծում են, որ թույլ իմունային համակարգի դեպքում մարդը կարող է վարակվել նաև մաշկային հյուսվածքների միջոցով: Այս հիվանդության դեմ պայքարի միակ միջոցը շներին պարբերաբար կատաղության դեմ պատվաստելն է: Կատաղությամբ վարակված կենդանու հետ շփում ունենալու դեպքում մարդը նույնպես կարող է հատուկ ներարկումների կուրս անցնել:

Նյութի աղբյուրը՝ med2.ru