Մասնագետները ներկայացրել են լեյկոզի մասին հուշող հիմնական ախտանշանները

Լեյկոզը կամ արյան քաղցկեղը դասվում է օնկոլոգիական ամենածանր հիվանդությունների շարքին, որը հազարավոր մարդկանց մահվան պատճառ է դառնում: Սա այն հիվանդություններից է, որի վաղ հայտնաբերումը զգալիորեն բարձրացնում է բարեհաջող բուժման հավանականությունը, սակայն խնդիրն այն է, որ հիվանդությունը ժամանակին ախտորոշելու համար հարկավոր է պարբերաբար բուժզննում անցնել կամ իմանալ խնդրի հիմնական դրսևորումները:

Մասնագետները ներկայացրել են արյունաստեղծ համակարգն ախտահարող այս հիվանդության հիմնական ախտանշանները, որոնք կօգնեն հնարավորինս շուտ հայտնաբերել խնդիրն ու սկսել բուժումը:

Առաջին հերթին մասնագետները խորհուրդ են տալիս ուշադրություն դարձնել մեզի գույնին, որն այս հիվանդության դեպքում հաճախ մուգ երանգ է ստանում: Բացի այդ, անհրաժեշտ է ուշադրություն դարձնել նաև քթային արյունահոսություններին ու լնդերի արյունահոսություններին, քանի որ լեյկոզը երբեմն դրսևորվում է հենց այս կերպ:

Արյան քաղցկեղին բնորոշ ախտանշանների շարքին է դասվում նաև սակավարյունությունը (անեմիա), որը դրսևորվում է հոգնածության զգացումով, մաշկի գունատությամբ, գլխապտույտներով և կենտրոնացման վատթարացմամբ: Բացի այդ, այս հիվանդության մասին կարող են հուշել կապտուկները, ուստի դրանք նույնպես չի կարելի անուշադրության մատնել:

Լեյկոզի դեպքում նկատվում է նաև վարակումների թվի ավելացում և հիվանդը դառնում է ավելի խոցելի վարակների նկատմամբ: Բացի այդ, կարող են նկատվել նաև այնպիսի խնդիրներ, ինչպիսին են բերանի խոռոչի խոցերը, մաշկային ցանն ու բրոնխաթոքաբորբը:

Ոչ մի դեպքում չի կարելի անուշադրության մատնել նաև աճուկային հատվածի, թևատակերի և պարանոցի հատվածի ավշային գեղձերի մեծացումն ու այտուցը, քանի որ այս ախտանշանը նույնպես կարող է վկայել լեյկեմիայի մասին: Ավշի քանակության փոփոխությունը պայմանավորված է լինում վարակներով ու սթրեսով, իսկ որոշ դեպքերում հիվանդը կորցնում է ախորժակն ու նրա քաշը նվազում է: Այս հիվանդությունը չի ախտահարում մարսողական համակարգը, սակայն չարորակ բջիջներն արտադրում են տարրեր, որոնք ազդում են սննդարար նյութերի յուրացման գործընթացի արագության վրա:

Հիվանդության մասին հուշող ախտանշանների շարքին կարող է դասվել նաև ձախ կողատակի ցավը, ինչը պայմանավորված է լինում փայծաղի մեծացմամբ: Այս հիվանդության մասին կարող են հուշել նաև գիշերային առատ քրտնարտադրությունն ու անբացատրելի տենդը: Բացի այդ, արյան քաղցկեղի դեպքում մարդը կարող է շատ արագ հագենալ անգամ քիչ քանակությամբ սննդի ընդունումից հետո, ուստի նման փոփոխությունը նույնպես չի կարելի անտեսել:

Նյութի աղբյուրը՝ actualnews.org