Հարբուխի դեմ պայքարի ամենատարածված միջոցները. որոնք են արդյունավետ և որոնցից է հարկավոր խուսափել

Հարբուխն ամենատարածված խնդիրներից է, որը հաճախ նաև սեզոնային բնույթ է կրում: Այս հիվանդությունը դրսևորվում է շատ տհաճ ախտանշաններով, ուստի զարմանալի չէ, որ մարդիկ փորձում են հնարավորինս արագ ազատվել դրանցից: Գոյություն ունեն հարբուխի դեմ պայքարի բազմաթիվ տարածված միջոցներ, սակայն դրանցից որոշներն իսկապես արդյունավետ են, իսկ որոշները ոչ միայն չեն օգնում հասնել որևէ արդյունքի, այլև կարող են առողջական լուրջ խնդիրներ առաջացնել:

Մասնագետները ներկայացրել են հարբուխի դեմ պայքարի ամենաարդյունավետ միջոցները և նշել են նրանք, որոնք բացարձակապես անարդյունավետ են և որոնցից հարկավոր է խուսափել:

Արդյունավետ միջոցներ հարբուխի բուժման համար

Հնարավորինս շատ հեղուկի գործածություն

Բավարար քանակությամբ հեղուկի գործածությունը շատ կարևոր է քթից ու լորձաթաղանթներից ախտածին տարրերի դուրսբերման համար: Երբ լորձաթաղանթները բավական խոնավեցված են լինում, դրանք բավարար քանակությամբ լորձ են արտազատում հիվանդության դեմ պայքարի համար:

Առատ քրտնարտադրության խթանում

Հարբուխի ախտանշանները մեղմելու արդյունավետ միջոց կարող է լինել նաև առատ քրտնարտադրությունը: Քրտինքի արտազատումը խթանում է իմունային համակարգը, իսկ վիրուսներն ու բակտերիաները դուրս են գալիս օրգանիզմից մաշկի միջոցով: Քրտնարտադրությունը խթանելու համար կարելի է տաք հագուստ կրել ու տաք ըմպելիքներ խմել:

Բավարար հանգիստ

Շատերը հարբուխի ժամանակ չեն ցանկանում բացակայել աշխատանքից և շարունակում են աշխատել՝ անտեսելով ինքնազգացողության վատթարացումը, սակայն մասնագետները հուշում են, որ արագ ապաքինվելու համար հարկավոր է շատ հանգստանալ և բավական երկար քնել: Սա կօգնի ամրապնդել իմունային համակարգն ու հնարավորություն կտա օրգանիզմին ուղղել բոլոր ուժերը վիրուսի դեմ պայքարին:

Հարբուխի դեմ պայքարի միջոցներ, որոնք անարդյունավետ են

Հակաբիոտիկներ

Շատերը փորձում են բուժել հարբուխը հակաբիոտիկներով, մինչդեռ այս դեղամիջոցներն անարդյունավետ են այս հիվանդության դեպքում: Հարկ է հիշել, որ հակաբիոտիկներն արդյունավետ են միայն բակտերիալ բնույթ կրող հիվանդությունների դեպքում, մինչդեռ հարբուխի հարուցիչը վիրուսներ են: Սա նշանակում է, որ հակաբիոտիկի ընդունումը ոչ միայն չի բուժի հարբուխը, այլև կարող է դառնալ հակաբիոտիկակայուն բակտերիաների առաջացման պատճառ՝ հետագայում հանգեցնելով լուրջ խնդիրների:

Տաք ալկոհոլային ըմպելիքներ

Հարբուխի ախտանշաններից ազատվելու համար շատերը տաք ըմպելիքներին ալկոհոլ են ավելացնում, սակայն այս սովորությունն էլ ավելի է վատթարացնում հիվանդության ընթացքը: Համարվում է, որ ալկոհոլը «ոչնչացնում է բակտերիաներն ու վիրուսները», սակայն իրականում այն դանդաղեցնում է իմունային համակարգի աշխատանքն ու խոչընդոտում հարուցիչի հայտնաբերման ու ոչնչացման գործընթացին: Նման դեպքերում շատ ավելի արդյունավետ կլինի կոճապղպեղով թեյը, որում պարունակվող վիտամին C-ն ու մագնեզիումն իսկապես ամրապնդում են իմունային համակարգը:

Նյութի աղբյուրը՝ medikforum.ru