5 կանոն, որոնց հետևելը կօգնի կանխել հաստ աղիքի քաղցկեղի զարգացումը կամ հայտնաբերել այն վաղ փուլերում

Հաստ աղիքի քաղցկեղը համարվում է այս հիվանդության ամենավտանգավոր տեսակներից մեկը, ուստի դրա դեմ պայքարի մեթոդների մեջ պետք է ներառվեն նաև վաղաժամ ախտորոշմանն ու հիվանդության կանխարգելմանն ուղղված միջոցների կիրառումը:

Այս հիվանդության հայտնաբերման ու կանխարգելման լավագույն միջոցներից մեկը պարբերաբար սքրինինգ անցնելն է, սակայն կան նաև ստուգման ու վերահսկման այլ մեթոդներ, որոնք կարող են նույնքան կարևոր լինել: Ձեր ուշադրությանն ենք ներկայացնում մի քանի պարզ կանոն, որոնց հետևելը կօգնի խուսափել հաստ աղիքի քաղցկեղից կամ հայտնաբերել այն զարգացման վաղ փուլերում:

50 տարեկանից հետո պարբերաբար սքրինինգ անել

Պարբերաբար բուժզննում անցնելը շատ կարևոր է, քանի որ օգնում է ժամանակին հայտնաբերել խնդիրը: Սա հատկապես կարևոր է այն դեպքերում, երբ հարազատների շրջանում կան նման ախտորոշմամբ մարդիկ: Ընտանեկան անամնեզում հաստ աղիքի քաղցկեղի ախտորոշման դեպքերի առկայությունը ենթադրում է, որ մարդիկ պետք է 45 տարեկանից հետո պարբերաբար բուժզննում անցնեն: Բացի այդ, պետք է շատ զգոն լինեն նաև նրանք, որոնց հարազանտների շրջանում կան աղիների բորբոքային հիվանդությունների կամ Կրոնի հիվանդության ախտորոշմամբ մարդիկ:

Բուժզննման ամենաարդյունավետ մեթոդը կոլոնոսկոպիկ հետազոտությունն է

Գոյություն ունի սքրինինգի մի քանի եղանակ, սակայն դրանցից ամենաարդյունավետն ու տարածվածը մասնագետները համարում են կոլոնոսկոպիկ հետազոտությունը: Այս պրոցեդուրան թույլ է տալիս մասնագետներին հետազոտել հաստ աղիներն ամբողջությամբ, ինչն էլ զգալիորեն նվազեցնում է սխալ ախտորոշման հավանականությունը:

Հաստ աղիքի քաղցկեղն ավելի ու ավելի հաճախ է ախտորոշվում երիտասարդների մոտ

Հաստ աղիքի քաղցկեղի դեպքերի ավելի քան 90%-ն ախտորոշվում է 50 տարեկանից բարձր հիվանդների մոտ, սակայն վերջերս անցկացված հետազոտությունը ցույց է տվել, որ երիտասարդներն այս հիվանդությանն ավելի ու ավելի հաճախ են բախվում: Այժմ գիտնականները նկատել են, որ 20-40 տարեկան անձանց շրջանում հիվանդության ախտորոշման հաճախականությունը զգալիորեն աճել է, ուստի հարկավոր է շատ զգոն լինել նաև երիտասարդ տարիքում:

Ախտանշաններն իմանալը կօգնի ժամանակին հայտնաբերել հիվանդությունը

Հաստ աղիքի քաղցկեղը ժամանակին հայտնաբերելու համար հարկավոր է առաջին հերթին տարբերել հիվանդության ախտանշաններն ու հետևել դրանց: Այս հիվանդությանը բնորոշ են ռեկտալ արյունահոսությունը և աղիների աշխատանքի փոփոխությունը: Բացի այդ, հիվանդի մոտ հաճախ նախտվում է նաև քաշի կորուստ, որովայնի ցավեր, թուլություն ու ախորժակի կորուստ, ուստի նման խնդիրների առկայության դեպքում հարկավոր է անհապաղ բուժզննում անցնել:

Կանխարգելման հիանալի միջոց կարող են լինել նաև առողջ կենսակերպն ու ճիշտ սննդակարգը

Այս վտանգավոր հիվանդության կանխարգելման համար հարկավոր է անպայման հետևել սննդակարգին ու կենսակերպին: Մանրաթելերով հարուստ մրգերի ու բանջարեղենի, ինչպես նաև ձկների առկայությունը սննդակարգում կօգնի զգալիորեն նվազեցնել հաստ աղիքի զարգացումը: Միևնույն ժամանակ կարմիր մսի գործածությունը կապված է հիվանդության զարգացման բարձր ռիսկի հետ: Շատ կարևոր է նաև առողջ կենսակերպը, ուստի հաստ աղիքի քաղցկեղից խուսափելու համար հարկավոր է առաջին հերթին հրաժարվել վատ սովորություններից, այդ թվում՝ ծխախոտից ու ալկոհոլի չարաշահումից:

Նյութի աղբյուրը՝ medikforum.ru