Որոնք են բերանի խոռոչի քաղցկեղի մասին հուշող առաջին ախտանշանները

Քաղցկեղը համարվում է ամենավտանգավոր հիվանդություններից մեկը, որը տարեկան հազարավոր մարդկանց մահվան պատճառ է դառնում: Սա այն հիվանդություններից է, որոնց վաղ ախտորոշումը զգալիորեն բարձրացնում է բարեհաջող բուժման հավանականությունը, ուստի դրա զարգացման մասին հուշող ախտանշաններն իմանալը շատ կարևոր է:

Բերանի խոռոչի քաղցկեղը չի դասվում այս հիվանդության ամենատարածված տեսակների շարքին, սակայն այն նույնպես հանդիպում է բավական հաճախ: Այս հիվանդության ախտանշաններին մարդիկ ոչ միշտ են ուշադրություն դարձնում՝ հաճախ վերագրելով դրանք այլ խնդիրներին, սակայն մասնագետները պնդում են, որ ժամանակին միջոցներ ձեռնարկելը կօգնի ազատվել հիվանդությունից և խուսափել մետաստազների տարածումից: Լուրջ հետևանքների չբախվելու համար բժիշկները ներկայացրել են բերանի խոռոչի քաղցկեղի հիմնական ախտանշանները՝ հորդորելով դրանց առկայության դեպքում անհապաղ բուժզննում անցնել:

Վիճակագրական տվյալներով՝ բերանի խոռոչի քաղցկեղն առավել հաճախ ախտորոշվում է 60 տարեկանից բարձր տարիքի տղամարդկանց մոտ, ուստի մասնագետները խորհուրդ են տալիս տարիքային այս խմբին պատկանող անձանց առավել զգոն լինել: Սակայն նորագոյացություններ կարող են ի հայտ գալ նաև ավելի երիտասարդ տարիքում և անգամ կանանց մոտ, ուստի առողջական վիճակն այնուամենայնիվ ոչ մի դեպքում չի կարելի անուշադրության մատնել:

Այս հիվանդությունը հաճախ ախտորոշվում է բավական ուշ, ինչի հետևանքով բուժումն անարդյունավետ է լինում: Սա պայմանավորված է նրանով, որ վաղ փուլերում բերանի խոռոչի քաղցկեղը տարբեր դրսևորումներ է ունենում, որոնք նման են լինում այլ՝ ոչ շատ վտանգավոր հիվանդությունների ախտանշաններին, ինչը շփոթության մեջ է գցում հիվանդներին: Այս հիվանդության ամենավաղ ախտանշանների շարքին են դասվում արյունահոսությունները, ատամների կորուստը, կլման ժամանակ նկատվող ցավը, ատամների պրոթեզների հետ կապված խնդիրները, պարանոցի հատվածում արտասովոր անհարթությունները, գլխացավերը, դեմքի ձևի փոփոխությունները, ինչպես նաև տհաճ զգացողությունները բերանի խոռոչի, պարանոցի կամ գլխի հատվածում:

Բացի այդ, հիվանդությունը կարող է դրսևորվել նաև բավական արտասովոր ախտանշաններով, այդ թվում զարկերակային ճնշման տատանումներով, բերանի խոռոչի չորությամբ, վարակումների հաճախականության աճով, առատ մազաթափությամբ, վահանաձև գեղձի աշխատանքի խանգարումներով, սրտխառնոցով, փսխումով, փորլուծությամբ ու ձայնի փոփոխությամբ:

Չի կարելի անուշադրության մատնել նաև հիվանդության արտաքին դրսևորումները, ուստի եթե բերանի խոռոչում ի հայտ են եկել փոքրիկ խոցեր, ինչպես նաև կարմիր կամ սպիտակ բծեր, որոնք չեն անհետանում երկար ժամանակ, ապա հարկավոր է դիմել մասնագետին ու բուժզննում անցնել քաղցկեղի հավանականությունը բացառելու կամ անհրաժեշտության դեպքում բուժումը հնարավորինս շուտ սկսելու համար:

Նյութի աղբյուրը՝ actualnews.org