Հինգ տարածված գործոն, որոնք բարձրացնում են ստամոքսի քաղցկեղի զարգացման հավանականությունը

Ստամոքսի քաղցկեղն այս հիվանդության ամենատարածված ու վտանգավոր տեսակներից է։ Այն տարեկան հազարավոր մարդկանց մահվան պատճառ է դառնում, ինչը պայմանավորված է նրանով, որ մարդիկ հազվադեպ են հայտնաբերում այն զարգացման վաղ փուլերում, ինչի հետևանքով էլ բուժումը բավական արդյունավետ չի լինում։ Սա այն հիվանդություններից է, որի կանխարգելումն ու բուժումը վաղ փուլերում զգալիորեն բարձրացնում է բարեհաջող բուժման հավանականությունը, ուստի մասնագետները հորդորում են միշտ զգոն լինել և անուշադրության չմատնել ոչ միայն հիվանդության ախտանշանները, այլև այն գործոնները, որոնք բարձրացնում են դրա զարգացման հավանականությունը։

Բժիշկների խոսքով՝ գոյություն ունի հինգ տարածված սովորություն, որոնք վտանգում են մարդու առողջությունն ու բարձրացնում ստամոքսի քաղցկեղի զարգացման հավանականությունը։ Այս սովորություններից հրաժարվելը կօգնի զգալիորեն նվազեցնել վտանգը, ուստի հարկավոր է շատ զգոն լինել։

Առաջին հերթին մասնագետները խորհուրդ են տալիս ուշադրություն դարձնել սննդակարգին ու դրանում մանրաթելերի պարունակությանը։ Մանրաթելերը կենսական նշանակություն ունեցող սննդային տարրեր են, որոնց շնորհիվ օրգանիզմն ազատվում է տոքսիններից, իսկ մարսողական համակարգն աշխատում է առանց խափանումների։ Այս կարևոր տարրի դեֆիցիտը հանգեցնում է աղեստամոքսային տրակտի հետ կապված խնդիրների, սրտանոթային հիվանդությունների, երկրորդ տիպի շաքարային դիաբետի և անգամ օնկոլոգիական հիվանդությունների զարգացման, ուստի նման խնդիրներից խուսափելու համար հարկավոր է սննդակարգում ներառել մանրաթելերով հարուստ մթերք։

Վնասակար սովորությունների շարքին է դասվում նաև ծխախոտի գործածությունը, որը նույնպես կարող է զգալիորեն բարձրացնել քաղցկեղի այս տեսակի զարգացման հավանականությունը։ Ավելին՝ այս սովորությունն առհասարակ շատ վատ է անդրադառնում ամբողջ օրգանիզմի վրա, ուստի մասնագետները հորդորում են հնարավորինս շուտ ազատվել դրանից։

Այս ցանկում է ներառվել նաև վերամշակում անցած մթերքի ու կարմիր մսի գործածությունը, որի դեպքում ի հայտ են գալիս նաև մի շարք այլ անբարենպաստ գործոններ։ Բացի այդ, ստամոքսի քաղցկեղի զարգացման հավանականության բարձրացմանն է նպաստում նաև մարինացված, ապխտած ու աղով մշակված մթերքի գործածությունը։ Բանն այն է, որ պահածոյացված մսամթերքը, ձկներն ու բանջարեղենը նախատեսված չեն պարբերաբար օգտագործելու համար։ Նման մթերքը հարկավոր է օգտագործել խիստ հազվադեպ, մինչդեռ շատեն այն իրենց ամենօրյա սննդակարգի մասն են դարձնում։

Այս հիվանդության զարգացմանը նպաստող գործոնների շարքին է դասվում նաև Helicobacter pylori բակտերիաներով պայմանավորված աղիքային ինֆեկցիան, որը հաճախ չի բուժվում ինչպես հարկն է։ Նման դեպքերում բարձրանում է չարորակ նորագոյացությունների զարգացման հավանականությունը, ինչը պայմանավորված է լինում ստամոքսի վիրահատություններով կամ ստամոքսի ցածր թթվայնությամբ։

Ինչպես ընդգծում են մասնագետները, ստամոքսի քաղցկեղը համարվում է ամենատարածված օնկոլոգիական հիվանդություններից մեկը, մինչդեռ շատերն անտեսում են դրա ախտանշանները, ինչի հետևանքով էլ ախտաբանությունը հայտնաբերվում է շատ ուշ և բուժումը բավական արդյունավետ չի լինում։ Սա է պատճառը, որ հարկավոր է նախապես միջոցներ ձեռնարկել հիվանդության զարգացումը կանխելու համար, իսկ այս գործոններից խուսափել կարող է լինել լավագույն կանխարգելիչ միջոցներից մեկը։

Նյութի աղբյուրը՝ actualnews.org