Երեք անվնաս համարվող սովորություն, որոնք կարող են դառնալ քաղցկեղի զարգացման պատճառ

Քաղցկեղը համարվում է ամենավտանգավոր հիվանդություններից մեկը, որը տարեկան հազարավոր մարդկանց մահվան պատճառ է դառնում։ Սա այն հիվանդություններից է, որի բուժման արդյունավետությունը կախված է դրա վաղ ախտորոշումից, սակայն, ցավոք, մարդիկ հազվադեպ են նկատում ուռուցքը զարգացման վաղ փուլերում, ինչի հետևանքով էլ շատ հաճախ բուժումը դրական ելք չի ունենում։ Սա է պատճառը, որ մասնագետները հորդորում են ավելի զգոն լինել ու հնարավորինս խուսափել այս վտանգավոր հիվանդության զարգացումից, քանի որ այն կանխարգելելն ու վաղ փուլերում բուժելն ավելի հեշտ է, քան հետագայում դրա առաջացրած կողմնակի բարդությունների դեմ պայքարելը։

Քաղցկեղի կանխարգելման համար առաջին հերթին հարկավոր է ուշադրություն դարձնել կենսակերպին ու խուսափել վատ սովորություններից, ուստի գերմանացի գիտնականներն ուսումնասիրել ու ներկայացրել են այն սովորությունները, որոնք կարող են դառնալ օնկոլոգիական հիվանդության զարգացման պատճառ։ Մասնագետներն առանձնացրել են դրանցից երեքը, որոնք առաջին հայացքից թվում են անվնաս, մինչդեռ իրականում կարող են շատ վտանգավոր լինել։

Մարդիկ վաղուց գիտեն, որ չարորակ ուռուցքները կարող են պայմանավորված լինել մի շարք անառողջ սովորություններով, այդ թվում ծխախոտի չարաշահմամբ ու ավելորդ կիլոգրամների կուտակմամբ, սակայն պարզվում է, որ կան նաև մի շարք այլ՝ ավելի քիչ ակնհայտ գործոններ, որոնք կարող են բարձրացնել քաղցկեղի զարգացման հավանականությունը։

Մասնագետների խոսքով՝ բջիջների չարորակացման կարող է հանգեցնել առաջին հերթին սմարթֆոնների և նմանատիպ այլ գաջեթների գործածությունը։ Ընդ որում՝ առաջին հերթին ռիսկային խմբում են հայտնվում նրանք, ովքեր սիրում են քնելուց առաջ սմարթֆոնով որևէ բան կարդալ։ Բանն այն է, որ այդ սովորությունը դանդաղեցնում է մելատոնինի՝ քնի հորմոնի արտադրությունը, իսկ այս տարրի դեֆիցիտը, շատ հաճախ է հանգեցնում ուռուցքների առաջացման։

Ոչ պակաս վտանգավոր կարող է լինել նաև ինքնաթիռում միշտ պատուհանին մոտ նստատեղեր զբաղեցնելու ցանկությունը։ Սա թույլ է տալիս թռիչքի ընթացքում հիանալ բացվող գեղեցիկ տեսարաններով, սակայն միևնույն ժամանակ վտանգում է մարդու առողջությունը։ Բանն այն է, որ ինքնաթիռի պատուհանի ապակին պաշտպանում է ուղևորներին արևի ուլտրամանուշակագույն ճառագայթներից, սակայն դրանց շուրջ 47%-ն այնուամենայնիվ կարող են անցնել այդ ապակիների միջով, ինչը կհանգեցնի ոչ միայն մաշկի վաղաժամ ծերացման, այլև մաշկի քաղցկեղի զարգացման։

Մյուս վնասակար սովորությունը չափազանց տաք թեյ խմելու կամ տաք ապուր ուտելու սովորությունն է։ Բանն այն է, որ Ցելսիսուսի սանդղակով 65 աստիճանից բարձր ջերմաստիճանի հեղուկները կարող են գրգռել կերակրափողն ու վնասել դրա հյուսվածքները։ Սա էլ իր հերթին կարող է շատ վատ հետևանքներ ունենալ՝ հանգեցնելով անգամ չարորակ նորագոյացությունների առաջացման։

Նյութի աղբյուրը՝ actualnews.org