Գերմանացի վիրուսաբանը ներկայացրել է կորոնավիրուսային վարակին բնորոշ տիպիկ ու ատիպիկ ախտանշանները. Focus

Նոր տեսակի կորոնավիրուսով պայմանավորված COVID-19-ի տարածման ֆոնին ամենահաճախ տրվող հարցը մասնագետներին լինում է հիվանդության ախտանշանների վերաբերյալ, ուստի գերմանացի վիրուսաբան Քրիստիան Դրոսթենը գերմանական Focus պորտալի հետ զրույցում ներկայացրել է այս ախտաբանության տիպիկ ու ատիպիկ ախտանշանները։ Մասնագետի խոսքով՝ կորոնավիրուսային վարակին բնորոշ ամենատարածված ախտանշաններն են չոր հազն ու տենդը, սակայն խնդրի դրսևորումները միայն դրանցով չեն սահմանափակվում։

«Երբ խոսքը COVID-19-ով վարակման մասին է, չոր հազը դառնում է առաջնային։ Բացի այդ, կարող է նկատվել նաև բարձր ջերմություն, որը կդրսևորվի դողի տեսքով», - նշում է մասնագետը՝ ընդգծելով, որ հարբուխի ի հայտ գալը համարվում է ատիպիկ ախտանշան։ 

Միևնույն ժամանակ կորոնավիրուսով վարակվածների մի մասը որպես վաղ ախտանշան նշում են կտրուկ ի հայտ եկող վիրուսային սինուսիտը, որն ուղեկցվում է քթի խոռոչների ցավով ու ճնշման զգացողությամբ։ Քրիստիան Դրոսթենի կարծիքով՝ հարբուխի զարգացումն այս հիվանդության դեպքում կարող է խոսել ինֆեկցիոն բնույթի այլ խնդրի մասին, որը զարգանում է կորոնավիրուսին զուգահեռ։ Օրինակ՝ նման հիվանդություն կարող է լինել հասարակ մրսածությունը։ Մասնագետն ընդգծում է, որ նման հավանականությունը չի բացառվում՝ ելնելով նախորդ տարիներին SARS կորոնավիրուսային վարակի բռնկման ժամանակ արված հետևություններից։ Այն ժամանակ SARS-ով վարակված մարդկանց մոտ նկատվում էին նաև այլ վիրուսներ։

«COVID-19-ով հիվանդների մոտ կարող է լինել մինչև երկու ուղեկցող հիվանդություն», - կարծում է մասնագետը։

Ըստ Դրոսթենի՝ առանձնահատուկ ուշադրության են արժանի այն դեպքերը, երբ  հիվանդների մոտ կորոնավիրուսային վարակն բնորոշ ախտանշանները բացակայում են կամ դրսևորվում են մասամբ՝ չնայած վարակմանը։ «Սա տարօրինակ է թվում, սակայն մարդիկ կարող են վարակվել ու առհասարակ չնկատել դա. նրանց մոտ բացակայում են հազը, տենդն ու մյուս տիպիկ ախտանշանները։ Բացի այդ, կորոնավիրուսային վարակով հիվանդացած ու բուժված հիվանդները կարող են բախվել երկարատև հետևանքների և անգամ մեկ ամիս անց դեռ նկատել թուլություն։ Եթե հիվանդությունը ծանր ընթացք է ունեցել, ապա թոքի գործառույթները կարող են վերականգնվել շատ դանդաղ»,- նախազգուշացնում է վիրուսաբանը։

Հիշեցնենք, որ  Չինաստանի իշխանություններն անհայտ տեսակի վիրուսի համաճարակի մասին ԱՀԿ-ին տեղյակ էին պահել դեկտեմբերի 31-ին: Հայտնի է, որ համաճարակը բռնկվել է Չինաստանի Հուբեյ նահանգի 11 մլն բնակչություն ունեցող Ուհան քաղաքում: 

Այս պահի դրությամբ՝ ամբողջ աշխարհում նոր տեսակի կորոնավիրուսով վարակվածների թիվը հասել է 614 052-ի, որից 28 238-ը՝ մահվան ելքով։ Հիվանդությունից ապաքինվել է ավելի քան 137 272 մարդ։ Հայաստանում կորոնավիրուսով վարակված քաղաքացիների ընդհանուր թիվն այս պահին 372 է, բուժվածների թիվը 28 է, փաստացի բուժվողներինը՝ 343, բացասական թեստերը՝ 2172, մահվան ելքերը՝ 1։