Մասնագետները ներկայացրել են ստամոքսի քաղցկեղի զարգացման վաղ փուլերի մասին հուշող հիմնական ախտանշանները

Քաղցկեղը համարվում է ամենավտանգավոր հիվանդություններից մեկը, որը տարեկան հազարավոր մարդկանց մահվան պատճառ է դառնում։ Սա այն հիվանդություններից է, որի բուժման արդյունավետությունը կախված է դրա վաղ ախտորոշումից, սակայն, ցավոք, մարդիկ հազվադեպ են նկատում ուռուցքը զարգացման վաղ փուլերում, այն շարունակում է զարգանալ ու ախտահարել նաև այլ հյուսվածքներ, ինչի հետևանքով էլ շատ հաճախ բուժումը դրական ելք չի ունենում։ Սա է պատճառը, որ մասնագետները հորդորում են ավելի զգոն լինել ու հնարավորինս խուսափել այս վտանգավոր հիվանդության զարգացումից, քանի որ այն կանխարգելելն ու վաղ փուլերում բուժելը շատ ավելի հեշտ է, քան հետագայում դրա առաջացրած կողմնակի բարդությունների դեմ պայքարելը։

Առողջական ցանկացած խնդրի դեպքում օրգանիզմը նախազգուշացնում է որոշակի ախտանշանների միջոցով և քաղցկեղը նույնպես բացառություն չէ։ Այս հիվանդության վաղ ախտորոշման համար առաջին հերթին հարկավոր է սովորել տարբերել դրա մասին հուշող ախտանշանները, ուստի մասնագետները ներկայացրել են քաղցկեղի ամենավտանգավոր տեսակներից մեկի՝ ստամոքսի քաղցկեղի զարգացման մասին հուշող ամենավաղ ախտանշանները, որոնք կօգնեն ժամանակին հայտնաբերել չարորակ նորագոյացությունն ու միջոցներ կիրառել դրանից ազատվելու համար։

Քաղցկեղի հետազոտությամբ զբաղվող Cancer Research UK բարեգործական կազմակերպության ուռուցքաբանների խոսքով՝ չարորակ ուռուցքների առկայության դեպքում մարմնի ախտահարված հյուսվածքներում բջիջներն սկսում են շատ արագ կիսվել և այդ գործընթացն անվերահսկելի է լինում։ Նման դեպքերում զարգանում են չարորակ նորագոյացություններ, որոնց մասին էլ օրգանիզմը փորձում է նախազգուշացնել այս կամ այն ախտանշանի միջոցով։

Ստամոքսի չարորակ ուռուցքի առկայության դեպքում հիվանդների մոտ հաճախ են նկատվում այնպիսի խնդիրներ, ինչպիսին են սրտխառնոցը, փսխումն ու տհաճ զգացողությունները որովայնի վերին հատվածում։ Նման ախտանշանները պայմանավորված են լինում ուռուցքի աճով, քանի որ այն «խցանում» է ստամոքսն ու թույլ չի տալիս, որ սնունդն անարգելք անցնի։ Որոշ դեպքերում փսխումը կարող է ուղեկցվել վառ կարմիր կամ շագանակագույն արնային արտադրությամբ։

Ստամոքսի չարորակ ուռուցքի մասին կարող են հուշել նաև սննդի և անգամ հեղուկի կլման հետ հետ կապված խնդիրները, ինչպես նաև գխտոցը,  ստամոքսի այրոցն ու մշտական հոգնածությունն անգամ ֆիզիկական ակտիվության բացակայության դեպքում։

Բացի այդ, գոյություն ունեն նաև այս վտանգավոր նորագոյացության առկայության մասին հուշող անուղղակի ախտանշաններ, որոնց շարքին են դասվում քիչ քանակությամբ սննդով հագենալն ու քաշի նվազումը ֆիզիկական ակտիվության բացակայության և բալանսավորված սննդակարգին հետևելու դեպքում։

Միևնույն ժամանակ ուռուցքաբանները հիշեցնում են, որ վերոնշյալ ախտանշանները կարող են ի հայտ գալ նաև առողջական այլ խնդիրների ժամանակ, ուստի դրանց առկայության դեպքում պետք չէ խուճապի մատնվել և հուսալքվել։ Նման դեպքերում հարկավոր է անհապաղ դիմել բժշկին, բուժզննում անցնել և սկսել անհրաժեշտ բուժումը միայն ախտանշանների պատճառը պարզելուց հետո։

Նյութի աղբյուրը՝ actualnews.org