Առողջական ինչ խնդիրների մասին կարող է հուշել ատամներին առաջացած փառը

Սովորաբար ատամների գույնը վերագրվում է ատամների էմալին, մինչդեռ շատ հաճախ էմալի գույնը կարող է որևէ կապ չունենալ ատամները պատող փառի գույնի հետ, քանի որ երբեմն փառ է առաջանում անգամ ձյունաճերմակ էմալով ատամների վրա։

Ատամնափառի գույնը կարող է տարբեր լինել՝ սկսած սպիտակից մինչև գրեթե սև, սակայն որպես կանոն այն կախված է լինում փառի բնույթից։ Շատ հաճախ ատամնափառը պայմանավորված է լինում առողջական որոշակի խնդիրներով, իսկ դրա գույնը նման դեպքերում կարող է հուշել, թե ինչին է հարկավոր ուշադրություն դարձնել և ինչ բուժզննում է հարկավոր անցնել։

Սպիտակ կամ դեղնավուն ատամնափառ

Սպիտակ կամ դեղնավուն փառ առաջանում է գրեթե բոլորի ատամներին և մեծ մասամբ կուտակվում է ատամների միջև, լնդերին մոտ գտնվող հատվածներում և խոզանակների համար դժվար հասանելի ատամների վրա։ Փառի այս տեսակը կարելի է հեշտությամբ հեռացնել ատամնաբույժի օգնությամբ և հատուկ պրացեդուրայի արդյունքում։ Ճիշտ խնամքի դեպքում այն չի առաջանա, ուստի մասնագետները հշեցնում են, որ հարկավոր է լավ լվանալ ատամները, օգտագործել ատամները մաքրող հատուկ թել և առանձնահատուկ ուշադրություն դարձնել դժվար հասանելի հատվածներին:

Դեղին ու շագանակագույն ատամնափառ

Ատամնափառի այս տեսակն ավելի դժվար է մաքրվում և առավել հաճախ առաջանում է ծխող, ինչպես նաև թունդ թեյ կամ սուրճ խմող մարդկանց ատամներին։ Դեղին կամ շագանակագույն փառի առաջացման պատճառ կարող են դառնալ նաև պղինձ պարունակող պրոթեզները կամ ատամնալիցքը։ Բացի այդ, նման ատամնափառը կարող է պայմանավորված լինել նյութափոխանակության որոշ խանգարումների հետևանքով թքի հետ արտազատվող երկաթով, ուստի ատամնափառի այս տեսակից ազատվելուց առաջ հարկավոր է պարզել դրա պատճառը։

Կանաչավուն ատամնափառ

Ատամնափառի այս տեսակը սովորաբար նկատվում է երեխաների ատամներին։ Այն պայմանավորված է լինում սնկերով, որոնք քլորոֆիլ են արտազատում։ Նման դեպքերում բուժումը հարկավոր է վստահել մասնագետին։

Մոխրագույն ատամնափառ

Մոխրագույն ատամնափառից հնարավոր է ազատվել միայն ատամնաբույժի օգնությամբ։ Այն առաջանում է էմալի հիպոպլազիայի հետևանքով, ուստի ինքնուրույն խնդիրը լուծել չի հաջողվի։ Ավելին՝ ատամնափառը մաքրելուց հետո հարկավոր է նաև էմալի վերականգնման պրոցեդուրա անցնել։

Սև ատամնափառ

Սև ատամնափառը բավական լուրջ խնդիր է, որից ազատվելու համար միայն ատամնաբույժին դիմելը կարող է բավական չլինել։ Գոյություն ունի սև ատամնափառի տեսակ, որն առաջանում է երեխաների ու դեռահասների ատամներին, սակայն որևէ առողջական խնդիր չի առաջացնում։ Այն անվնաս է և ժամանակի ընթացքում անցնում է ինքնուրույն, ուստի մասնագետները պարզապես հատուկ պրոցեդուրայի միջոցով այն քողարկում են։ Սակայն լինում է նաև սև ատամնափառի մեկ այլ տեսակ, որի դեպքում հարկավոր է անհապաղ միջոցներ ձեռնարկել։ Նման ատամնափառը հուշում է լեղուղիների հիվանդությունների, ինչպես նաև աղիքային մակաբույծների կամ սնկերի առկայության մասին։ Նման դեպքերում հարկավոր է համալիր բուժզննում անցնել և սկսել բուժումը հիմնական խնդրից։

Ատամնաքարեր

Վերոնշյալ փառի ցանկացած տեսակ ժամանակին չմաքրելու հետևանքով կարող է կարծրանալ ու վերածվել առամնաքարերի։ Նման քարերն ունենում են ծակոտկեն կառուցվածք, ուստի հիանալ բարենպաստ միջավայր են ստեղծում ատամները քայքայող բակտերիաների բազմացման համար։ Այս խնդրից ինքնուրույն ազատվել հնարավոր չէ, քանի որ այն բավական ամուր է կպչում ատամներին, իսկ այն տարածված միջոցները որոնք թույլ են տալիս ինքնուրույն մաքրել ատամնաքարերը, քայքայում են ոչ միայն կարծրացած փառը, այլև ատամների էմալը։ Նման խնդիրներից խուսափելու համար հարկավոր է հետևել ատամների հիգիենային, իսկ քարերի առկայության դեպքում դիմել ատամնաբույժին։

Նյութի աղբյուրը՝ neboley.com.ua