Մասնագետները նշել են՝ որ դեպքերում է հազը հուշում քաղցկեղի մասին

16:29 • 11.04.20

Հազը շնչառական համակարգն ախտահարող հիվանդությունների հիմնական ախտանշաններից մեկն է։ Այն կարող է հուշել ինչպես ոչ շատ լուրջ խնդիրների, այնպես էլ բավական ծանր հիվանդությունների մասին, սակայն մարդիկ, այնուամենայնիվ, բավարար ուշադրություն չեն դարձնում այս ախտանշանին։

Մասնագետների խոսքով՝ հազը որոշ դեպքերում հուշում է օնկոլոգիական հիվանդությունների մասին, ուստի դրան ուշադրություն դարձնելը կօգնի ժամանակին հայտնաբերել խնդիրը։ Հասարակ հազը քաղցկեղով պայմանավորված հազից տարբերելու համար հարկավոր է առաջին հերթին ուշադրություն դարձնել դրա տևողությանը։ Եթե հազը պահպանվում է բավական երկար ժամանակ, ապա հարկավոր է դիմել բժշկին։ Հատկապես վտանգավոր է սաստիկ հևոցով, խռպոտությամբ ու կրծքավանդակի ցավերով ուղեկցվող հազը, քանի որ դրանք չարորակ ուռուցքի մասին հուշող ամենաակնհայտ ախտանշաններից են։

Ինչպես նշում են բրիտանացի բժիշկները, թոքերի քաղցկեղի դեպքում հազը կարող է պահպանվել շատ երկար ժամանակ և չուղեկցվել մրսածության որևէ այլ ախտանշանով, ինչը նշանակում է, որ նման հազի դեպքում հարկավոր է անպայման դիմել բժշկին ու անհրաժեշտության դեպքում բուժզննում անցնել։ Հազին հարկավոր է ուշադրություն դարձնել, եթե այն պահպանվում է ավելի քան երեք շաբաթ։ Եթե այս ամենի հետ մեկտեղ հիվանդը նկատում է նաև արյան հետքեր խորխի մեջ, ապա բուժզննում պետք է անցնի անհապաղ։

Միևնույն ժամանակ փորձագետները հիշեցնում են, որ անգամ նման վառ ախտանշանը, ինչպիսին է խորխի մեջ արյան առկայությունը, ոչ միշտ է պայմանավորված լինում քաղցկեղով, ուստի հարկավոր է շատ ուշադիր լինել։ Արյան հետքեր կարող են նկատվել նաև բրոնխաբորբի, թոքաբորբի, քթային արյունահոսության, տուբերկուլոզի, մուկովիսցիդոզի և կրծքավանդակի մի շարք այլ վարակների դեպքում, ուստի լուրջ բարդությունների չբախվելու համար հարկավոր է անհապաղ դիմել մասնագետին և պարզել տհաճ ախտանշանների պատճառը, գրում է actualnews.org առցանց պարբերականը։