Ինչ է ենթաստամոքսային գեղձի բորբոքումը, որոնք են դրա զարգացմանը նպաստող գործոններն ու ինչ ախտանշաններով է այն դրսևորվում

Ենթաստամոքսային գեղձի բորբոքումը հիվանդություն է, որն ուղեկցվում է օրգանում ի հայտ եկած բորբոքային գործընթացներով։ Հիվանդության զարգացմանը նպաստող հիմնական գործոններն են ալկոհոլի, յուղոտ ու տապակած մթերքի չարաշահումն ու ճարպակալումը։

Ենթաստամոքսային գեղձի բորբոքման պատճառ են համարվում լեղապարկի ու լեղուղիների հիվանդությունները, ինչպես նաև գաստրիտը, տասներկումատնյա աղիքի հիվանդությունները, շաքարային դիաբետը, զարկերակային գերճնշումն ու անոթների հիվանդությունները։ Այս խանգարման զարգացմանը նպաստող գործոնների շարքին են դասվում թունավորումները սննդից, ալկոհոլից ու տարբեր քիմիական տարերից։ Բացի այդ, ենթաստամոքսային գեղձի բորբոքման հավանականությունը զգալիորեն բարձրանում է ավելորդ քաշի, սննդի չարաշահման, ինֆեկցիոն հիվանդությունների, ալերգիաների ու որովայնի վնասվածքների դեպքում, ուստի նման գործոնների առկայության դեպքում ևս հարկավոր է զգոն լինել։

Ենթաստամոքսային գեղձի բորբոքման ախտանշանները

Այս հիվանդությունը կարող է ուղեկցվել տարբեր ախտանշաններով, որոնք ոչ մի դեպքում չի կարելի անուշադրության մատնել։ Ենթաստամոքսային գեղձի բորբոքման մասին հուշող ախտանշանների շարքին են դասվում.

սաստիկ բութ ցավերը որովայնի վերին հատվածում, որոնք գոտևորող բնույթ են կրում,

գունատությունը,

մարմնի ջերմաստիճանի բարձրացումը,

զարկերակային ճնշման փոփոխությունը (նվազումը կամ բարձրացումը),

մաշկային հյուսվածքների կապտավուն երանգը,

փորափքանքը,

գխտոցը, սրտխառնոցն ու փսխումը, որը կարող է պարունակել նաև լեղի,

փորլուծությունը կամ փորկապությունը։

Երբ է հարկավոր դիմել բժշկին

Ենթաստամոքսային գեղձի բորբոքումը կարող է բավական լուրջ խնդիրներ առաջացնել, ուստի ժամանակին մասնագետին դիմելը շատը կարևոր է։ Եթե հիվանդի մոտ նկատվում է ծանրություն որովայնի վերին հատվածում, ինչպես նաև հաճախակի գխտոց, ապա հարկավոր է դիմել գաստրոէնտերոլոգին։ Սա կօգնի հստակ պարզել խնդրի պատճառն ու բացառել աղեստամոքսային տրակտի հետ կապված այլ հիվանդությունները։ Նման դեպքերում մեծ է հավանականությունը, որ խնդրից հնարավոր կլինի ազատվել պարզապես սննդակարգում որոշակի փոփոխություններ անելով։ Եթե որոշ ախտանշաններ պահպանվում են ու շարունակում են անհանգստացնել, ապա հարկավոր է անհապաղ դիմել բժշկին։ Նման ախտանշաններն են.

էպիգաստրալ հատվածի վառ արտահայտված ցավերը,

սրտխառնոցը,

փսխումը,

հեղուկ կղանքը,

մարմնի ջերմաստիճանի բարձրացումը։

Ենթաստամոքսային գեղձի բորբոքումը լինում է քրոնիկ կամ սուր։ Այս հիվանդության համար հարկավոր է բուժզննում անցնել թերապևտի, գաստրոէնտերոլոգի և վիրաբույժի մոտ։ Որպես կանոն հստակ ախտորոշման համար մասնագետները նշանակում են արյան կեսաքիմիական ու կլինիկական հետազոտութուն, կղանքի կլինիկական հետազոտություն և կղանքի մեջ պանկրեատիկ էլաստազի (էլաստազ I) որոշում։ Բացի այդ, հիվանդությունը կարելի է հայտնաբերել նաև գործիքային ախտորոշման միջոցով։

Նյութի աղբյուրը՝ med2.ru