Ինչ է սրտային անբավարարությունը, որոնք են դրա ախտանշաններն ու կանխարգելման միջոցները

Սրտային անբավարարությունը բավական լուրջ խնդիր է, որի դեպքում սրտամկանը չի կարողանում ինչպես հարկն է իրականացնել արյան շրջանառությունը, ինչի հետևանքով խանգարվում է արյան հոսքն օրգանիզմի բոլոր օրգաններում ու հյուսվածքներում։ Սրտի գրեթե բոլոր հիվանդություններն էլ (սրտի իշեմիկ հիվանդություն, սրտամկանի բորբոքում, սրտի բնածին արատ, կարդիոմիոպաթիա, առիթմիաներ) կարող են հանգեցնել սրտային անբավարարության, ուստի հարկավոր է շատ ուշադիր լինել սրտանոթային համակարգի աշխատանքի նկատմամբ։

Սրտային անբավարարության մասին հուշող առաջին ախտանշանները կարող են լինել ֆիզիկական ակտիվության դեպքում նկատվող հևոցը, սրտի զարկերի արագացումը և շուրթերի ու ականջաբլթակների կապտավուն երանգը։ Եթե հիվանդությունը շարունակում է զարգանալ, ապա նշված ախտանշանները կարող են ի հայտ գալ նաև հանգստի ժամանակ։ Նման դեպքերում հիվանդի մոտ կարող է նկատվել շնչահեղձություն, ինչը հատկապես ակնհայտ է դառնում հորիզոնական դիրքով լինելու դեպքում։ Սա է պատճառը, որ հիվանդները հաճախ գերադասում են քնել նստած դիրքով։

Սրտային անբավարարության մասին կարող են վկայել նաև ոտքերի այտուցները, որոնք դառնում են շատ ավելի տարածուն հիվանդության խորացման դեպքում։ Լուրջ բարդություններից խուսափելու համար հարկավոր է ժամանակին սկսել սրտային անբավարարության բուժումը, որը ենթադրում է գլիկոզիդների, միզամուղ դեղամիջոցների և հակաառիթմիկ միջոցների գործածություն։

Այս հիվանդությունը կարող է շատ վտանգավոր լինել, ուստի այն կանխարգելելը շատ կարևոր է։ Սրտային անբավարարությունից և սրտանոթային համակարգի հետ կապված մի շարք այլ խնդիրներից խուսափելու համար հարկավոր է վարել առողջ կենսակերպ և հետևել մի քանի պարզ կանոնի։ Նման խնդիրների կանխարգելման համար մասնագետները խորհուրդ են տալիս.

• հետևել առողջ սննդակարգին ու ներառել դրանում ֆոլատով, մագնեզիումով, В խմբի վիտամիններով հարուստ մթերք (անյուղ միս, ամբողջահատիկ հաց, կանաչ բանջարեղեն, լոբազգիներ, սերմեր ու ընկույզներ),
• բացառել յուղոտ մթերքը սննդակարգից,
• ազատվել ավելորդ քաշից՝ դրանով իսկ նվազեցնելով արյան մատակարարում պահանջող հյուսվածքների մակարդակն ու սրտանկանի վրա գործադրվող ծանրաբեռնվածությունը,
• հետևել զարկերակային ճնշմանը,
• չօգտագործել ծխախոտ,
• չչարաշահել ալկոհոլը,
• պարբերաբար մարմնամարզություն անել,
• խուսափել սթրեսներից,
• հաճախ զբոսնել մաքուր օդին։

Հարկ է հիշել, որ մասնագետին անհրաժեշտ է դիմել արտասովոր մարսելախանգարման, կրծքավանդակի ցավերի ու հոգնածության, ինչպես նաև հևոցի ու փսխման դեպքում։ Եթե նկատվում է կրծքավանդակի սաստիկ ցավ, որը տարածվում է նաև ստորին ծնոտի, պարանոցի ու ձեռքի հատվածում, ինչպես նաև առատ քրտնարտադրություն, կտրուկ թուլություն, անհանգստություն կամ սրտխառնոց, ապա մասնագետին հարկավոր է դիմել անհապաղ, քանի որ նման դեպքերում ժամանակ կորցնելը կարող է շատ վտանագվոր լինել։

Նյութի աղբյուրը՝ healthinfo.ua