Արտասովոր ախտանշաններ, որոնք կարող են հուշել ենթաստամոքսային գեղձի քաղցկեղի մասին

Ենթաստամոքսային գեղձի քաղցկեղը համարվում է այս հիվանդության ամենավտանգավոր ու մահաբեր տեսակներից մեկը։ Այն հազվադեպ է հայտնաբերվում զարգացման վաղ փուլերում, ինչի հետևանքով շատ հաճախ բուժումը բավական արդյունավետ չի լինում և հիվանդությունը մահվան ելք է ունենում։ Սա է պատճառը, որ հարկավոր է շատ ուշադիր լինել օրգանիզմի տված ազգանշանների նկատմամբ և պարբերաբար բուժզննում անցնել խանգարումները զարգացման վաղ փուլերում հայտնաբերելու համար։

Քաղցկեղի այս տեսակն այն հիվանդություններից է, որոնց բուժման արդյունավետությունը կախված է վաղ ախտորոշումից, ուստի Cancer Research UK-ի ուռուցքաբանները ներկայացրել են այն ախտանշանները, որոնք կհուշեն ենթաստամոքսային գեղձի քաղցկեղի մասին։ Այս ախտանշանները բավական արտասովոր են և հաճախ վերագրվում են այլ՝ ոչ շատ լուրջ հիվանդություններին, ինչի պատճառով էլ խնդիրը հայտնաբերվում է չափազանց ուշ, սակայն մասնագետները հորդորում են ոչ մի դեպքում չանտեսել դրանք և անպայման դիմել մասնագետին անգամ չնչին կասկածների դեպքում։

Բժիշկներն առանձնացնում են այս հիվանդության մասին հուշող չորս արտասովոր ախտանշան, որոնց ոչ բոլորն են պատշաճ ուշադրություն դարձնում։ Այդ ախտանշանները կապված են լինում աղեստամոքսային տրակտի աշխատանքի հետ, ուստի մարդիկ դրանք հազվադեպ են կապում ենթաստամոքսային գեղձի ախտահարման հետ։ Նման ախտանշաններին ուշադրություն դարձնելը կօգնի ժամանակին հայտնաբերել հիվանդությունն ու սկսել բուժումը հնարավորինս շուտ։

Սննդի յուրացման հետ կապված խնդիրներ

Երբ ուռուցքը խցանում է ենթաստամոքսային գեղձի ծորանները, գեղձի արտադրած հյութերը բավարար քանակությամբ չեն հայտնվում աղիներում։ Սա կարող է դառնալ սննդի վատ յուրացման պատճառ և հանգեցնել քաշի զգալի նվազման առանց որևէ ջանք գործադրելու։

Փորլուծություն 

Փորլուծությունը ևս պայմանավորված է լինում գեղձի ծորանների խցանմամբ։ Այս դեպքում սնունդը չի մարսվում ինչպես հարկն է, ինչի հետևանքով չափազանց արագ է անցնում մարսողական տրակտով և հանգեցնում է փորլուծության։

Կղանքի մեջ ճարպի պարունակություն

Այս ախտանշանն ի հայտ է գալիս, երբ ենթաստամոքսային գեղձի ֆերմենտների պակասի հետևանքով օրգանիզմը չի կարողանում յուրացնել ճարպերը։ Նման դեպքերում ճարպի բարձր պարունակության պատճառով կղանքը դառնում է կպչուն և ձեռք է բերում անբնական բաց գույն։

Կղանքի մեջ բծերի առկայություն

ենթաստամոքսային գեղձի քաղցկեղը հանգեցնում է նրան, որ կղանքի մեջ նկատվում են մասամբ յուրացված կամ ընդհանրապես չյուրացված սննդարար նյութերի, ճարպի և լեղու կուտակումներ, ինչի հետևանքով այն պատվում է բծերով։

Վերոնշյալ ախտանշաններից բացի գոյություն ունեն նաև ենթաստամոքսային գեղձի քաղցկեղի մասին հուշող այլ ախտանշաններ ևս, որոնք չի կարելի անտեսել։ Դրանց շարքին են դասվում.

• ընդհանուր ինքնազգացողության վատթարացումը,
• տենդը,
• որովայնի ցավերը (հատկապես ուտելուց հետո և պառկած դիրքով),
• մեզի գույնի մգացումը,
• մարսողության խանգարումը,
• կղանքի մեջ արյան մակարդուկների առկայությունը։

Նյութի աղբյուրը՝ medikforum.ru