Շաքարային դիաբետի մասին հուշող 7 ախտանշան, որոնք ոչ մի դեպքում չի կարելի անուշադրության մատնել

Շաքարային դիաբետը շատ վտանգավոր ու տարածված անբուժելի հիվանդություն է, որը կարող է երկար ժամանակ զարգանալ առանց որևէ ակնհայտ ախտանշանի՝ ի վերջո հանգեցնելով շատ լուրջ բարդությունների։ Այս հիվանդության դեպքում մարդիկ ստիպված են մշտական վերահսկողության տակ պահել արյան մեջ շաքարի մակարդակը, դեղորայք ընդունել և խստորեն հետևել սննդակարգին, ինչը կարող է իր ազդեցությունն ունենալ մարդու կյանքի որակի վրա։

Շաքարային դիաբետի հիմնական վտանգն այն լուրջ բարդություններն են, որոնք զարգանում են խնդիրը ժամանակին չնկատելու և դրա հետագա զարգացումը կանխելու համար անհրաժեշտ միջոցները չձեռնարկելու դեպքում, սակայն խնդիրն այն է, որ շատ հաճախ մարդիկ այս խանգարման մասին հուշող ախտանշանները վերագրում են այլ խնդիրներին, ինչի հետևանքով այն ժամանակին չի ախտորոշվում։ Նման խնդիրներից խուսափելու համար մասնագետները ներկայացրել են այս հիվանդության մասին հուշող ամենատարածված ախտանշանները, որոնք ոչ մի դեպքում չի կարելի անտեսել։

Հաճախամիզություն

Շաքարային դիաբետի մասին վկայող ամենատարածված ախտանշաններից է հաճախամիզությունը, որը հատկապես շատ է անհանգստացնում գիշերվա ժամերին։ Այս ախտանշանը պայմանավորված է արյան մեջ գլյուկոզայի բարձր մակարդակով, որից երիկամները փորձում են ազատվել մեզի միջոցով։

Անհագ ծարավ

Երկրորդ տիպի շաքարային դիաբետի դեպքում մարդու երիկամները բավական ծանրաբեռնված են աշխատում, ինչի հետևանքով հաճախամիզությունից բացի հայտ է գալիս նաև մեկ այլ տհաճ ախտանշան՝ անհագ ծարավը։

Հոգնածության զգացում

Անբացատրելի հոգնածությունը կարող է պայմանավորված լինել տարբեր խնդիրներով, այդ թվում նաև շաքարային դիաբետով։ Այս դեպքում հոգնածության պատճառ կարող է դառնալ բջիջներում գլյուկոզայի մշտական պակասը։ Բացի այդ, շաքարային դիաբետի մյուս ախտանշանը՝ գիշերային հաճախամիզությունը, նույնպես կարող է հանգեցնել հոգնածության, քանի որ այն բացասաբար է անդրադառնում քնի որակի վրա, թույլ չի տալիս ինչպես հարկն է հանգստանալ ու վերականգնվել քնած ժամանակ։

Քոր սեռական օրգանների հատվածում

Այս խանգարման դեպքում սեռական օրգանների քորը պայմանավորված է լինում սնկային հիվանդությամբ։ Բանն այն է, որ մեզի մեջ շաքարի բարձր մակարդակը նպաստում է սնկերի ակտիվ բազմացմանը, ինչի հետևանքով էլ զարգանում է սնկային հիվանդություն։ Այս ախտածին տարրերը բազմանում են ջերմ և խոնավ միջավայրում, ուստի արտաքին սեռական օրգանները, բերանն ու մարմնի որոշակի այլ հատվածները ստեղծում են ամենաբարենպաստ պայմանները դրանց աճի համար։ Հենց այս սնկերի բազմացումն էլ հանգեցնում է առնանդամի և հեշտոցի շուրջ քորի և տհաճ զգացողությունների առաջացման։ 

Վերքերի դանդաղ ապաքինում

Շաքարային դիաբետը խիստ բացասաբար է անդրադառնում իմունային համակարգի վրա, ինչն էլ անդրադառնում է վերքերի ապաքինման արագության վրա։ Բացի այդ, արյան մեջ շաքարի բարձր մակարդակը նեղացնում է արյունատար անոթներն ու բացասաբար է անդրադառնում արյան շրջանառության վրա, ինչը նույնպես կարող է դառնալ վերքերի դանդաղ ապաքինման պատճառ։ 

Տեսողության վատթարացում

Շաքարային դիաբետի հետ կապված ամենատարածված հիվանդությունը ռետինոպաթիան է, որը կարող է զարգանալ շաքարային դիաբետով պայմանավորված զարկերակային բարձր ճնշման հետևանքով։ Առհասարակ այս հիվանդությունը խիստ բացասաբար է անդրադառնում տեսողության վրա և կարող է անդառնալի հետևանքներ ունենալ, ինչը պայմանավորված է նրանով, որ շաքարի բարձր մակարդակը դանդաղ փոփոխում է աչքերի ցացաթացանթի կառուցվածքը՝ հանգեցնելով տեսողության վատթարացման։

Քաշի ավելացում կամ նվազում

Քաշի կտրուկ ավելացումը կամ նվազումն առանց որևէ պատճառի նույնպես կարող է կապված լինել շաքարային դիաբետի հետ, քանի որ այս հիվանդության պատճառով օրգանիզմը չի կարողանում վերամշակել ինսուլինը։ Այս դեպքում բջիջները չեն ստանում բավարար քանակությամբ գլյուկոզա, ինչի հետևանքով օրգանիզմն ստիպված է լինում էներգիա ստանալու համար օգտագործել մկանային սպիտակուցները։

Նյութի աղբյուրը՝ med2.ru