Քթի փակվածություն, արյունահոսություն. որոնք են քթի քաղցկեղի մասին հուշող հիմնական ախտանշանները

Քաղցկեղն ամենավտանգավոր հիվանդություններից մեկն է, որը տարեկան միլիոնավոր մարդկանց մահվան պատճառ է դառնում։ Այս հիվանդությունը կարող է ախտահարել մարդու օրգանիզմի ամենատարբեր հյուսվածքներն ու օրգանները, իսկ ժամանակին չախտորոշելու դեպքում տարածվել նաև այլ հյուսվածքների հատվածում։

Քաղցկեղի ամենահազվադեպ հանդիպող տեսակներից մեկը քթի քաղցկեղն է, որի բուժման արդյունավետությունը, ինչպես և քաղցկեղի ցանկացած այլ տեսակի դեպքում, կախված է լինում հիվանդության վաղ ախտորոշումից, ուստի դրա ախտանշանները ժամանակին նկատելն ու միջոցներ ձեռնարկելը շատ կարևոր է։ Սակայն այս հիվանդության դեպքում խնդիրն այն է, որ այն հաճախ դրսևորվում է ախտանշաններով, որոնք նման են այլ հիվանդությունների ախտանշաններին, ուստի հաճախ են անուշադրության մատնվում, ինչի հետևանքով չարորակ ուռուցքը շարունակում է զարգանալ ու տարածվել։

Ինչպես նշում են Cancer Research UK-ի փորձագետները, քթի քաղցկեղի դեպքում ի հայտ եկող ախտանշանները նման են շատ ավելի տարածված և ոչ այդքան վտանգավոր հիվանդությունների ախտանշաններին, ինչպիսին են հասարակ մրսածությունն ու սինուսիտը։ Սա է պատճառը, որ մարդիկ հաճախ լուրջ ուշադրություն չեն դարձնում դրանց և հազվադեպ են բուժզննում անցնում։

Մասնագետների խոսքով՝ քթի քաղցկեղը զարգանում է քթի խոռոչի ետին հատվածի կամ հարակից խոռոչների լորձաթաղանթին, իսկ երբեմն էլ տարածվում և ախտահարում է նաև ավշային հանգույցները։ 

Հիվանդությունը դրսևորվում է տարբեր ախտանշաններով, որոնցից առավել հաճախ հանդիպողներն են.

• քթի մշտական փակվածությունը, որը սովորաբար նկատվում է միայն մի կողմում,
• հոտառության փոփոխությունն ու հոտերի նկատմամբ զգայունության նվազումը,
• լորձը, որը քթի խոռոչից դեպի կոկորդ է հոսում,
• անդադար հոսող արտադրությունը,
• քթային արյունահոսությունը։

Ուռուցքաբանների խոսքով՝քթի քաղցկեղով հիվանդների մեծ մասի մոտ նկատվում է քթի փակվածութուն, ուստի այս անվնաս թվացող ախտանշանը ոչ մի դեպքում չի կարելի անուշադրության մատնել։ Բացի այդ, հիվանդության մասին կարող են հուշել մի շարք այլ ախտանշաններ, այդ թվում.

• դեմքի ցավն ու թմրածությունը, հատկապես՝ այտերի վերին հատվածում,
• պարանոցի գեղձերի այտուցվածությունը,
• տեսողության մասնակի կորուստը կամ պատկերի երկակիությունը,
• մշտական արցունքահոսությունը,
• ականջի ցավն ու ճնշման զգացողությունը։

Հարկ է հիշել, որ այս ախտանշանները ոչ միշտ են պայմանավորված լինում չարորակ նորագոյացությամբ, ուստի խուճապի մատնվելու և հուսահատվելու կարիք չկա։ Դրանց առկայության դեպքում հարկավոր է անհապաղ բուժզննում անցնել, պարզել դրանց առաջացման պատճառն ու անհրաժեշտության դեպքում սկսել բուժումը։

Նյութի աղբյուրը՝ medikforum.ru