5 խորհուրդ մասնագետից, որոնք կօգնեն ազատվել փորկապությունից ու կանխել աղիների աշխատանքի խանգարումները

17:50 • 28.04.20

Փորկապությունը բավական տարածված խնդիր է, սակայն կարանտինի պայմաններում այն կարող է էլ ավելի հաճախ զարգանալ՝ առաջացնելով տհաճ զգացողություններ և խիստ բացասաբար անդրադառնալով մարդու կյանքի որակի վրա։ Ինչպես նշում է բժիշկ-գաստրոէնտերոլոգ Ռոբերտ Լերիգոն, անգամ եթե նախկինում մարդը երբևէ աղիների աշխատանքի հետ կապված որևէ խնդիր չի ունեցել, միևնույն է կարանտինի պայմաններում կարող է բախվել աղիների աշխատանքի խանգարման ու փորկապության խնդրին։

Մասնագետի խոսքով՝ որոշ դեպքերում փորկապությունը զարգանում է չափազանց պինդ կղանքի պատճառով, ինչը հանգեցնում է կղազատման ակտի դժվարացման։ Բացի այդ, որոշ դեպքերում կղանքը լինում է սովորականից քիչ քանակությամբ, իսկ երբեմն էլ դեֆեկացիան դժվարանում է անգամ եթե կղանքը սովորականից պինդ չի լինում։

Կարանտինի պայմաններում այս խնդրի զարգացումը, որպես կանոն, կապված է լինում ցիրկադային ռիթմերի փոփոխությունների հետ, իսկ դրանք որոշվում են քնի և առույգության ցիկլերով և կրկնվում են յուրաքանչյուր 24 ժամը մեկ։ Ինչպես նշում է բժիշկը, հաստ աղիքն ունի իր սեփական ռիթմը, որը կարող է հեշտությամբ խանգարվել ֆիզիկական վարժությունների պակասի, քնի վատ որակի, սննդակարգի փոփոխությունների ու սթրեսի հետևանքով, իսկ ինքնամեկուսացման պատճառով այս գործոնները մարդկանց առօրյայի մասն են կազմում։

Նման խնդիրներից խուսափելու համար պարզապես հարկավոր է վերանայել կենսակերպն ու անել մի քանի պարզ փոփոխություն։ Մասնագետը ներկայացրել է հինգ խորհուրդ, որոնց հետևելը թույլ կտա խուսափել փորկապությունից ու կարգավորել աղիների աշխատանքը։

Լինել ֆիզիկապես ակտիվ

Փորկապությունից ազատվելու և խնդրի կրկնությունը կանխելու հարցում շատ մեծ նշանակություն ունի ֆիզիկական ակտիվությունը, ուստի բժիշկ Լերիգոն խորհուրդ է տալիս շաբաթական առնվազն երկու անգամ 20 րոպե տևողությամբ մարզանք անել՝ կատարելով աերոբային վարժություններ։ Անգամ նման կարճատև ու պարզ մարզումները դրական ազդեցություն կունենան աղիների ակտիվության վրա և կօգնեն կանխել փորկապությունը կամ ազատվել արդեն իսկ ի հայտ եկած խնդրից։

Օգտագործել օգտակար մթերք

Մանրաթելերով հարուստ մթերքը պահում է հեղուկը կղանքի մեջ՝ թույլ չտաով որ այն պնդանա և կանխելով կղազատման ակտի դժվարացումը։ Սա է պատճառը, որ մասնագետները խորհուրդ են տալիս հարստացնել սննդակարգն ընկույզներով, թեփով, ոսպով, մրգերով, տերևավոր բանջարեղենով, լոբազգիներով, մրգերով, սալորաչրով ու ամբողջահատիկ մթերքով։

Բացի այդ, սննդակարգում հարկավոր է ներառել օմեգա-3 ճարպաթթուներով ու մագնեզիումով հարուստ մթերք ու պրոբիոտիկներ, որոնք կօգնեն օրգանիզմին կարգավորել աղիների աշխատանքը։ Միևնույն ժամանակ խորհուրդ է տրվում սահմանափակել ճարպերով ու օսլայով հարուստ մթերքի գործածությունը, քանի որ դրանք միայն էլ ավելի կվատթարացնեն աղիների աշխատանքն ու կբարձրացնեն փորկապության զարգացման հավանականությունը։

Բավարար քանակությամբ ջուր խմել

Ջուրը մարդու օրգանիզմի համար կենսական նշանակություն ունեցող հեղուկ է, սակայն շատերն այնուամենայնիվ մոռանում են դրա կարևորության մասին և հազվադեպ են օրվա ընթացքում բավարար քանակությամբ ջուր խմում։ Հարկ է հիշել, որ որքան չոր ու պինդ է կղանքը, այնքան ավելի է դժվարանում կղազատման գործընթացը, ուստի այս խնդրի դեմ պայքարի լավագույն միջոցներից մեկը բավարար քանակությամբ ջուր խմել է։ Ընդ որում ՝ սա հատկապես կարևոր է կարանտինի ընթացքում, ուստի մասնագետը խորհուրդ է տալիս հետևել օրվա ընթացքում ընդունած ջրի քանակությանն ու անպայման օրական մի քանի բաժակ ջուր խմել։

Ճիշտ օգտվել զուգարանակոնքից

Դեֆեկացիայի ակտը հեշտացնելու համար մասնագետները խորհուրդ են տալիս սովորել ճիշտ օգտվել զուգարանակոնքից։ Որքան էլ զարմանալի է՝ մարդիկ, որպես կանոն, սխալ են օգտվում զուգարանակոնքից՝ նստելով ինչպես աթոռին, մինչդեռ մարդու օրգանների դասավորությունը թույլ չի տալիս այս դիրքով ինչպես հարկն է դատարկել աղիները, ինչը փորկապության դեպքում կարող է էլ ավելի վատթարացնել վիճակը։ Նման խնդիրներից խուսափելու համար մասնագետները խորհուրդ են տալիս պարզապես ոտքերի տակ որևէ բան դնել, ինչը կօգնի մի փոքր բարձրացնել դրանք և հեշտացնել դեֆեկացիայի ակտը։

Ազատվել անհանգստությունից

Երկարատև կարանտինը կարող է բարձրացնել սթրեսի ու անհանգստության մակարդակը, սակայն հարկավոր է անել հնարավոր ամեն բան լարվածությունից և անհանգստությունից ազատվելու համար։ Նման դեպքերում շատ արդյունավետ կարող են լինել շնչառական վարժությունները, յոգան կամ մեդիտացիան։ Բացի այդ, հանգստանալու ամենապարզ ու արդյունավետ միջոցներից մեկը որոշ ժամանակ միայնակ լռության մեջ անցկացնելն է։

Նյութի աղբյուրը՝ MedikForum.ru